Panchali Panchabhartruka: హీరోగా మారుతున్న రాప్ సింగర్ రోల్ రైడా!

పక్కా ఫ్యామిలీ కామెడీ ఎంటర్‌టైనర్స్‌కి తెలుగు ప్రేక్షకులు ఎప్పుడూ బ్రహ్మరథం పడుతుంటారు. సరిగ్గా అదే కోవలో, అవుట్ అండ్ అవుట్ నవ్వులు పూయించేందుకు సిద్ధమవుతున్న సరికొత్త చిత్రం “పాంచాలి పంచభర్తృక”. నటకిరీటి రాజేంద్రప్రసాద్ ప్రధాన పాత్రలో నటిస్తున్న ఈ చిత్రాన్ని రోయల్ థ్రోన్ ప్రొడక్షన్స్, ఓం సాయిరాం ఆర్ట్స్ బ్యానర్లపై రాజ్ పవన్, వెంకట్ దుగ్గిరెడ్డి సంయుక్తంగా నిర్మిస్తున్నారు. ఈ చిత్రానికి గంగ సప్తశిఖర దర్శకత్వం వహిస్తున్నారు. టైటిల్‌తోనే ఆడియన్స్‌లో మంచి ఆసక్తిని రేకెత్తించిన ఈ మూవీ నుంచి.. ఇటీవల “సెనోరిటా రాసిస్తా నా ఆస్తి నీ పేరిట” అనే రెట్రో స్టైల్ సాంగ్‌ను మేకర్స్ విడుదల చేశారు.

ఈ పాటకు సోషల్ మీడియాలో అనూహ్య స్పందన లభిస్తుండటంతో పాటు ట్రెండింగ్‌లో నిలిచింది. ఈ నేపథ్యంలో చిత్ర బృందం తాజాగా మీడియాతో సమావేశమై సినిమాకు సంబంధించిన పలు ఆసక్తికర విశేషాలను పంచుకుంది. రాజేంద్రప్రసాద్ మాట్లాడుతూ.. “ఈ మధ్య కాలంలో నాకు ఇలాంటి వైవిధ్యమైన పాత్ర రావడం చాలా అరుదు. ఒకప్పటి నా సినిమాల్లో లాగానే.. ఈ చిత్రంలోనూ పాటలు, ఫైట్లతో నాటి వింటేజ్ రాజేంద్రప్రసాద్‌ను మీరు మళ్లీ చూస్తారు” అని ఎంతో ఉత్సాహంగా చెప్పారు. తన రాప్ సాంగ్స్‌తో యూత్‌లో క్రేజ్ తెచ్చుకున్న రోల్ రైడా, ఈ సినిమాలో మొదటిసారిగా హీరో పాత్రలో కనిపించబోతున్నాడు. “ప్రేక్షకులకు ఇదొక పర్ఫెక్ట్ ఫన్ ట్రీట్. సినిమా మొదలైనప్పటి నుంచి పూర్తయ్యే వరకు ఆడియన్స్ నవ్వుతూనే ఉంటారు” అని రోల్ రైడా తెలిపాడు.