Lokesh Kanagaraj: LCU ముగియదట.. అభిమానులకి లోకేష్ కనగరాజ్ గట్టి హామీ.. ఖైదీ 2, విక్రమ్ 2, రోలెక్స్‌పై క్లారిటీ!

Lokesh Kanagaraj: ఒక దర్శకుడు తన సినిమాలన్నింటినీ ఒకే ప్రపంచంలో భాగంగా చూపిస్తూ ప్రేక్షకుల్లో ప్రత్యేకమైన ఉత్సాహాన్ని కలిగించడం చాలా అరుదు. కోలీవుడ్ స్టార్ దర్శకుడు లోకేష్ కనగరాజ్ రూపొందించిన లోకేష్ సినిమాటిక్ యూనివర్స్ (LCU) అలాంటి అరుదైన ప్రయోగాల్లో ఒకటి. ఖైదీతో మొదలైన ఈ ప్రయాణం ‘విక్రమ్’, ‘లియో’ సినిమాలతో మరింత విస్తరించింది. అయితే ఇటీవల ఎల్‌సీయూ ఇక ముగిసిపోయిందనే ప్రచారం సోషల్ మీడియాలో వేగంగా వైరల్ కావడంతో అభిమానుల్లో కూడా నిరాశ నెలకొంది. ఈ నేపథ్యంలో తొలిసారి స్పందించిన లోకేష్ కనగరాజ్ అన్ని పుకార్లకు ఒక్కసారిగా చెక్ పెట్టారు.

ఇటీవల గలాటా నిర్వహించిన ఓ కార్యక్రమంలో పాల్గొన్న లోకేష్ కనగరాజ్, ఎల్‌సీయూపై వస్తున్న వార్తలను పూర్తిగా ఖండించారు. అవసరమైతే తన జీస్క్వాడ్ ప్రొడక్షన్ హౌస్‌ను మూసివేస్తానేమో కానీ, ఎల్‌సీయూను మాత్రం ఎప్పటికీ ఆపనని స్పష్టం చేశారు. సోషల్ మీడియాలో వైరల్ అవుతున్న ప్రచారాలకు ఎలాంటి నిజం లేదని, అభిమానులు అలాంటి వార్తలను నమ్మాల్సిన అవసరం లేదని చెప్పారు. ఎల్‌సీయూ అనే పేరును తాను సృష్టించలేదని కూడా లోకేష్ వెల్లడించారు. ఈ ట్యాగ్‌ను అభిమానులే సోషల్ మీడియాలో ఉపయోగించడం ప్రారంభించారని, తర్వాత అదే పేరును తాను కూడా స్వీకరించానని చెప్పారు. ప్రస్తుతం ఈ యూనివర్స్‌లో పూర్తి చేయాల్సిన ఎన్నో కథలు, పాత్రలు ఇంకా మిగిలి ఉన్నాయని ఆయన తెలిపారు. అందువల్ల ఈ ప్రయాణం ఇప్పుడే ముగిసే ప్రశ్నే లేదని స్పష్టం చేశారు.

తన భవిష్యత్ ప్రాజెక్టులపై కూడా లోకేష్ కీలక వివరాలు వెల్లడించారు. కార్తీతో తెరకెక్కనున్న ఖైదీ 2, కమల్ హాసన్‌తో విక్రమ్ 2, అలాగే సూర్య ప్రధాన పాత్రలో రానున్న రోలెక్స్ స్టాండలోన్ చిత్రం అన్నీ తన కమిట్‌మెంట్స్‌లో భాగమేనని చెప్పారు. ఈ సినిమాలన్నీ తప్పకుండా తెరకెక్కుతాయని అభిమానులకు హామీ ఇచ్చారు. అయితే ప్రస్తుతం ఐకాన్ స్టార్ అల్లు అర్జున్‌తో రూపొందిస్తున్న భారీ పాన్ ఇండియా చిత్రం పూర్తయిన తర్వాతే ఈ ప్రాజెక్టులపై పూర్తిస్థాయిలో దృష్టి సారిస్తానని తెలిపారు. అలాగే తన నిర్మాణ సంస్థ జీస్క్వాడ్ బ్యానర్‌పై రూపొందుతున్న ‘బెంజ్’ చిత్రం కూడా ఎల్‌సీయూలో భాగమేనని లోకేష్ స్పష్టం చేశారు. భాగ్యరాజ్ కన్నన్ దర్శకత్వంలో రాఘవ లారెన్స్, రవి మోహన్ ప్రధాన పాత్రల్లో తెరకెక్కుతున్న ఈ చిత్రం కూడా అదే యూనివర్స్‌ను మరింత విస్తరించే ప్రయత్నంగా నిలవనుంది. దీంతో ఎల్‌సీయూ భవిష్యత్‌పై అభిమానుల్లో మరింత ఆసక్తి పెరిగింది.

లోకేష్ సినిమాటిక్ యూనివర్స్ ప్రయాణం 2019లో కార్తీ నటించిన ఖైదీతో ప్రారంభమైంది. ఆ తర్వాత 2022లో విడుదలైన విక్రమ్ ఈ యూనివర్స్‌కు మరింత హైప్ తెచ్చింది. ముఖ్యంగా ‘విక్రమ్’ క్లైమాక్స్‌లో సూర్య రోలెక్స్ పాత్రలో చేసిన అతిథి పాత్ర దేశవ్యాప్తంగా సంచలనం సృష్టించింది. అనంతరం వచ్చిన లియో కూడా ఈ ప్రపంచంలో భాగమేనని లోకేష్ స్పష్టం చేయడంతో ప్రేక్షకుల్లో మరింత ఉత్సాహం పెరిగింది. ఇదిలా ఉండగా, దర్శకుడిగానే కాకుండా నటుడిగానూ లోకేష్ కొత్త ప్రయాణాన్ని ప్రారంభిస్తున్నారు. అరుణ్ మాథేశ్వరన్ దర్శకత్వంలో రూపొందుతున్న ‘డీసీ’ చిత్రంతో ఆయన నటుడిగా కూడా ప్రేక్షకుల ముందుకు రానున్నారు. మరోవైపు రజనీకాంత్‌తో తెరకెక్కించిన ‘కూలీ’ వంటి భారీ ప్రాజెక్ట్ తర్వాత వరుసగా అల్లు అర్జున్ సినిమా, ఖైదీ 2, విక్రమ్ 2, రోలెక్స్, బెంజ్ వంటి సినిమాలు లైన్లో ఉండటంతో లోకేష్ కనగరాజ్ షెడ్యూల్ పూర్తిగా బిజీగా మారింది. అయితే తాజాగా ఆయన ఇచ్చిన స్పష్టమైన హామీతో ఎల్‌సీయూ భవిష్యత్‌పై వస్తున్న అన్ని సందేహాలకు తెరపడింది.