Cinema News: థియేటర్లలో ఫ్లాప్.. యూట్యూబ్‌లో చరిత్ర సృష్టించిన బెల్లంకొండ సినిమా!

Cinema News: 2017లో విడుదలైన ‘జయ జానకి నాయక’ థియేటర్లలో ఆశించిన విజయాన్ని అందుకోలేకపోయింది. బోయపాటి శ్రీను దర్శకత్వంలో బెల్లంకొండ శ్రీనివాస్ హీరోగా తెరకెక్కిన ఈ ఫ్యామిలీ యాక్షన్ డ్రామా భారీ బడ్జెట్ తోనే తెరకెక్కించారు. అయితే అంచనాలను ఈ సినిమా ఏమాత్రం రీచ్ కాలేదు. కానీ డిజిటల్ ప్రపంచంలో మాత్రం ఈ సినిమా ఊహించని రీతిలో సంచలనం సృష్టించింది. ‘ఖూన్‌ఖార్’ పేరుతో హిందీలో డబ్ చేసిన ఈ చిత్రాన్ని యూట్యూబ్‌లో విడుదల చేయగా, నార్త్ ఆడియన్స్ విశేషంగా ఆదరించారు. బోయపాటి మార్క్ మాస్ యాక్షన్, ఫ్యామిలీ ఎమోషన్స్ , కమర్షియల్ ఎలిమెంట్స్ హిందీ ప్రేక్షకులను బాగా ఆకట్టుకున్నాయి. దీంతో సినిమా వ్యూస్ క్రమంగా పెరుగుతూ రికార్డ్ వ్యూస్ ను సొంతం చేసుకుంది. రీసెంట్ గా ‘ఖూన్‌ఖార్’ యూట్యూబ్‌లో ఏకంగా 1 బిలియన్ (100 కోట్ల) వ్యూస్ దాటింది. భారతీయ సినిమాలకు ఇది అత్యంత అరుదైన ఘనతగా చెప్పాలి. యూట్యూబ్‌లో ఈ స్థాయి వ్యూస్ సాధించిన తొలి భారతీయ చిత్రాల్లో ఒకటిగా ఈ సినిమా నిలిచినట్లు సినీ వర్గాలు పేర్కొంటున్నాయి.

ఈ రికార్డు మరోసారి హిందీ మార్కెట్‌లో డబ్ చేసిన దక్షిణాది సినిమాల ప్రభావాన్ని చాటిచెప్పింది. గత కొన్నేళ్లుగా డిజిటల్ వేదికల ద్వారా బెల్లంకొండ శ్రీనివాస్‌కు ఉత్తరాదిలో ప్రత్యేకమైన ఫ్యాన్ బేస్ ఏర్పడింది. ఆ ప్రయాణంలో ‘ఖూన్‌ఖార్’ అతిపెద్ద విజయాల్లో ఒకటిగా నిలిచింది. అలాగే దర్శకుడు బోయపాటి శ్రీనుకు కూడా ఇది ప్రత్యేకమైన మైలురాయి. థియేటర్లలో పెద్ద విజయం సాధించని సినిమా కూడా డిజిటల్ ప్లాట్‌ఫామ్‌లలో సత్తా చాటగలవని ‘జయ జానకి నాయక’ నిరూపించింది. విడుదలైన ఎన్నో సంవత్సరాల తర్వాత కూడా ప్రేక్షకుల ఆదరణతో కొత్త చరిత్ర సృష్టించడం ఈ సినిమా ప్రత్యేకతగా నిలిచింది.