తల్లి కాబోతున్న ‘సోడాల శ్రీదేవి’

తెలుగమ్మాయి ఆనంది ప్రస్తుతం తమిళంలో హీరోయిన్ గా మంచి గుర్తింపు తెచ్చుకుంది. కెరీర్ ప్రారంభంలో ‘ఈ రోజుల్లో, బస్ స్టాప్’ చిత్రాలు ఆనందికి మంచి విజయాన్ని అందించాయి. కానీ ఆ తర్వాత నటించిన తెలుగు సినిమాలు సక్సెస్ కాలేదు. దాంతో తమిళ చిత్రసీమలోకి అడుగుపెట్టి… అక్కడ వరుస విజయాలను తన ఖాతాలో జమ చేసుకుంది. ఈ నేపథ్యంలోనే తమిళ దర్శక నిర్మాత నవీన్ బావమరిది, అసిస్టెంట్ డైరెక్టర్ సోక్రటీస్ తో ప్రేమలో పడింది. పెద్దల అంగీకారంతో ఆనంది వివాహం ఈ యేడాది జనవరి 7వ తేదీ సోక్రటీస్ తో వరంగల్ లో నిరాడంబరంగా జరిగింది.

Read Also : అందరూ మోసగాళ్ళే… “అనబెల్ సేతుపతి” ట్రైలర్

విశేషం ఏమంటే… వివాహం తర్వాత ఆనంది నటించిన రెండు తెలుగు సినిమాలు విడుదలయ్యాయి. అందులో ఒకటి ఫిబ్రవరిలో వచ్చిన ‘జాంబిరెడ్డి’ కాగా మరొకటి గతవారం విడుదలైన ‘శ్రీదేవి సోడా సెంటర్’. ఈ రెండు సినిమాలూ మాస్ ఆడియెన్స్ ను విశేషంగా ఆకట్టుకున్నాయి. తాజా చిత్రం ‘శ్రీదేవి సోడా సెంటర్’లో సోడా శ్రీదేవిగా నటించి, నటిగానూ మెప్పించింది ఆనంది. ఈ తెలుగు కథానాయిక త్వరలో తల్లి కాబోతోందట. ప్రస్తుతం ఆమెకు ఆరవ నెల అని, అతి త్వరలోనే కుటుంబ సభ్యులు ఆనందికి సీమంతం కూడా చేయబోతున్నారని తెలుస్తోంది. అదే జరిగితే మరో మూడు నెలల్లో ఆనంది పండంటి బిడ్డకు జన్మనివ్వడం ఖాయం.