Dinesh kumar: హార్ట్ టచ్ చేసే మూవీ ‘వెంకట్రామయ్య గారి తాలూకా’.. ప్రతి ఒక్కరినీ ఆకట్టుకుంటుంది!

జానపద గాయని కోమలి నిర్మాతగా మారి నిర్మించిన భావోద్వేగ కుటుంబ కథా చిత్రం ‘వెంకట్రామయ్య గారి తాలూకా’. ఈ సినిమా జూలై 17న ప్రేక్షకుల ముందుకు రానుంది. దినేష్ కుమార్ హీరోగా, ఈటీవీ ప్రభాకర్ కుమార్తె దివిజ ప్రభాకర్ హీరోయిన్‌గా పరిచయమవుతున్న ఈ చిత్రానికి సతీష్ ఆవాల కథ, స్క్రీన్‌ప్లే, మాటలు అందించడంతో పాటు దర్శకత్వం కూడా వహించారు. కోమలి క్రియేషన్స్ బ్యానర్‌పై కోమలి మహేందర్ తొట్టె, సోమేష్ సారిపల్లి సంయుక్తంగా ఈ చిత్రాన్ని నిర్మించారు.

సినిమా విడుదలకు సమయం ఆసన్నమవడంతో హైదరాబాద్‌లోని ప్రసాద్ ల్యాబ్స్‌లో మంగళవారం ప్రీ రిలీజ్ వేడుకను చిత్ర యూనిట్ ఘనంగా నిర్వహించింది. ఈ కార్యక్రమానికి తెలంగాణ రక్షణ సేన పార్టీ అధ్యక్షురాలు కల్వకుంట్ల కవిత ముఖ్య అతిథిగా హాజరయ్యారు. ప్రముఖ దర్శకుడు దశరథ్ కూడా వేడుకలో పాల్గొని సినిమా ఘనవిజయం సాధించాలని ఆకాంక్షించారు. ఈ సందర్భంగా హీరో దినేష్ కుమార్ మాట్లాడుతూ.. చిన్న గ్రామం నుంచి వచ్చిన కోమలి నిర్మాతగా ఈ స్థాయిలో సినిమా నిర్మించడం ఎంతో స్ఫూర్తిదాయకమని అన్నారు. ప్రతి ప్రేక్షకుడి హృదయాన్ని తాకే భావోద్వేగ కథతో పాటు అన్ని వర్గాల ప్రేక్షకులను అలరించే అంశాలు ఈ చిత్రంలో ఉన్నాయని తెలిపారు. ప్రేక్షకులు తప్పకుండా ఈ సినిమాను ఆదరిస్తారని ఆశాభావం వ్యక్తం చేశారు.

హీరోయిన్ దివిజ ప్రభాకర్ మాట్లాడుతూ.. ఈ సినిమా కథ ప్రతి ఒక్కరినీ ఆకట్టుకునేలా ఉంటుందని చెప్పారు. చిత్ర యూనిట్ సభ్యులంతా ఎంతో అంకితభావంతో పనిచేశారని, ముఖ్యంగా నిర్మాత కోమలి ఎంతో శ్రమించి ఈ చిత్రాన్ని నిర్మించారని పేర్కొన్నారు. జూలై 17న థియేటర్లలో విడుదల కానున్న ఈ చిత్రాన్ని ప్రేక్షకులు ఆదరించి విజయవంతం చేయాలని కోరారు. వెంకట్రామయ్య గారి తాలూకా సినిమా తప్పక విజయం సాదిస్తుందని ధీమా వ్యక్తం చేశారు.

ముఖ్య అతిథిగా హాజరైన కల్వకుంట్ల కవిత మాట్లాడుతూ.. ‘ఫోక్ సింగర్‌గా మంచి గుర్తింపు తెచ్చుకున్న కోమలి ఇప్పుడు నిర్మాతగా మారి మంచి సినిమా నిర్మించడం అభినందనీయం. ఈ చిత్రం ఘన విజయం సాధించాలని కోరుకుంటున్నా. చిన్న సినిమాలకు ప్రభుత్వం ప్రత్యేక ప్రోత్సాహకాలు, రాయితీలు కల్పించాలి. తెలంగాణలో చిన్న చిత్రాల అభివృద్ధికి మా పార్టీ ఎల్లప్పుడూ అండగా ఉంటుంది. తెలుగు సినిమాల మాదిరిగానే తెలుగు ప్రజలు కూడా ఐక్యంగా ఉండాలి’ అని పిలుపునిచ్చారు. భావోద్వేగ కుటుంబ కథాంశంతో రూపొందిన ‘వెంకట్రామయ్య గారి తాలూకా’ చిత్రం ఇప్పటికే ప్రచార కార్యక్రమాలతో మంచి ఆసక్తిని రేకెత్తిస్తోంది. ఈ సినిమా ప్రేక్షకులను ఎంతవరకు ఆకట్టుకుంటుందో చూడాలి.