Mahesh Babu Birthday: ఆగస్టు నెల వచ్చిందంటే మహేష్ బాబు అభిమానులకు అది ఓ ప్రత్యేక పండుగే. ప్రతి ఏడాది ఆయన పుట్టినరోజు సందర్భంగా అభిమానులు వివిధ కార్యక్రమాలతో సంబరాలు చేసుకుంటారు. ఈసారి ఆ వేడుకలకు మరింత ప్రత్యేకత తీసుకురావడానికి ఆయన కెరీర్లో నిలిచిపోయే బ్లాక్బస్టర్లలో ఒకటైన ‘దూకుడు’ మరోసారి వెండితెరపై సందడి చేయబోతోంది. ఆగస్టు 9న మహేష్ బాబు 51వ పుట్టినరోజు సందర్భంగా ఈ చిత్రాన్ని రీమాస్టర్డ్ 4K వెర్షన్లో ప్రపంచవ్యాప్తంగా థియేటర్లలో రీ రిలీజ్ చేయనున్నట్లు అధికారికంగా ప్రకటించారు. దీంతో అభిమానులు మరోసారి ఈ సినిమాను చూసేందుకు ఉత్సాహం చూస్తున్నారు.
2011లో విడుదలైన ‘దూకుడు’ అప్పట్లో బాక్సాఫీస్ను షేక్ చేసిన సినిమాల్లో ఒకటిగా నిలిచింది. దర్శకుడు శ్రీను వైట్ల రూపొందించిన ఈ యాక్షన్ కామెడీ ఎంటర్టైనర్లో మహేష్ బాబు స్టైలిష్ నటన, కామెడీ టైమింగ్, పంచ్ డైలాగ్లతో ప్రేక్షకులను విపరీతంగా ఆకట్టుకున్నారు. సమంత కథానాయికగా నటించిన ఈ సినిమా ఇప్పటికీ టెలివిజన్లో ప్రసారమైనప్పుడల్లా మంచి ఆదరణ పొందుతూనే ఉంది. అదే క్రేజ్ను మరోసారి థియేటర్లలో ఆస్వాదించే అవకాశం అభిమానులకు దక్కుతోంది.
చిత్ర బృందం వెల్లడించిన వివరాల ప్రకారం, ఆగస్టు 1వ తేదీ సాయంత్రం 7 గంటల నుంచి అడ్వాన్స్ బుకింగ్లు ప్రారంభమవుతున్నాయి. రీమాస్టర్డ్ 4K ప్రింట్తో విడుదలవుతున్న ఈ మూవీ అత్యుత్తమ విజువల్ క్వాలిటీతో ప్రేక్షకులకు కొత్త అనుభూతిని అందించనుంది. గతంలో రీ రిలీజ్ అయిన మహేష్ సినిమాలకు అభిమానులు భారీ స్పందన ఇచ్చిన నేపథ్యంలో, ఈసారి కూడా ‘దూకుడు’కి మంచి ఓపెనింగ్స్ వచ్చే అవకాశం ఉందని ట్రేడ్ వర్గాలు అంచనా వేస్తున్నాయి.
గత రెండు దశాబ్దాలుగా మహేష్ బాబు తెలుగు సినీ పరిశ్రమలో టాప్ హీరోగా తన స్థానాన్ని పదిలం చేసుకున్నారు. ‘ఒక్కడు’, ‘పోకిరి’, ‘దూకుడు’, ‘బిజినెస్మ్యాన్’ వంటి కల్ట్ హిట్ల నుంచి ‘శ్రీమంతుడు’ ‘మహర్షి’, ‘సరిలేరు నీకెవ్వరు’, ‘సర్కారు వారి పాట’ వరకు వరుస విజయాలతో తనకంటూ ప్రత్యేక గుర్తింపు సంపాదించారు. కమర్షియల్ ఎంటర్టైనర్లతో పాటు సోషల్ మెసేజ్ ఉన్న కథలను కూడా ఎంచుకుంటూ ప్రేక్షకులను అలరిస్తున్నారు.
ఇక ప్రస్తుతం మహేష్ బాబు తన కెరీర్లోనే అత్యంత ప్రతిష్టాత్మక ప్రాజెక్ట్గా భావిస్తున్న ‘వారణాసి’ షూటింగ్లో బిజీగా ఉన్నారు. దర్శకధీరుడు ఎస్.ఎస్. రాజమౌళి తెరకెక్కిస్తున్న ఈ గ్లోబల్ యాక్షన్ అడ్వెంచర్ లో ప్రియాంక చోప్రా జోనాస్, పృథ్వీరాజ్ సుకుమారన్ కీలక పాత్రలు పోషిస్తున్నారు. భారీ స్థాయిలో రూపొందుతున్న ఈ మూవీకి ఎం.ఎం. కీరవాణి సంగీతం అందిస్తుండగా, 2027 ఏప్రిల్ 7న విడుదల చేయాలని చిత్ర బృందం లక్ష్యంగా పెట్టుకుంది.
ఒకవైపు ‘వారణాసి’పై దేశవ్యాప్తంగా అంచనాలు పెరుగుతుండగా, మరోవైపు ‘దూకుడు’ రీ రిలీజ్ మహేష్ అభిమానులకు డబుల్ ట్రీట్గా మారింది. పుట్టినరోజు వేడుకల మధ్య తమ అభిమాన హీరో కెరీర్లో నిలిచిపోయిన ఈ బ్లాక్బస్టర్ను మరోసారి థియేటర్లలో చూసే అవకాశం రావడంతో అభిమానులు కూడా చూసేందుకు ఇప్పటినుంచే సిద్ధమవుతున్నారు. ఈ రీ రిలీజ్తో మరోసారి సినిమా హాళ్లలో మహేష్ అభిమానుల సందడి పీక్స్కు చేరే అవకాశాలు కనిపిస్తున్నాయి.