Unstoppable: ”పిల్లా నువ్వులేని జీవితం, ఈడోరకం- ఆడోరకం” వంటి హాస్య ప్రధాన చిత్రాలతో రచయితగా తనదైన ముద్రవేసుకున్న డైమాండ్ రత్నబాబు దర్శకత్వంలో రూపొందుతున్న హిలేరియస్ ఎంటర్ టైనర్ ‘అన్ స్టాపబుల్’. ‘అన్ లిమిటెడ్ ఫన్’ అనేది ఉపశీర్షిక. బిగ్ బాస్ విన్నర్ విజె సన్నీ, సప్తగిరి హీరోలుగా నటిస్తున్న ఈ చిత్రంలో నక్షత్ర, అక్సాఖాన్ హీరోయిన్లు. ఎ2 బి ఇండియా ప్రొడక్షన్ లో రజిత్ రావు ఈ చిత్రాన్ని నిర్మిస్తున్నారు. హైదరాబాద్, నిజామాబాద్, గోవాలో చిత్రీకరణ జరుపుకున్న ఈ సినిమా షూటింగ్ పూర్తి చేసుకొని పోస్ట్ ప్రొడక్షన్ వర్క్ జరుపుకుంటోంది. ఇదిలా ఉంటే… తాజాగా ‘అన్ స్టాపబుల్’ మోషన్ పోస్టర్ ని ప్రముఖ నిర్మాత దిల్ రాజు విడుదల చేసి, చిత్ర బృందానికి శుభాకాంక్షలు తెలిపారు.
ఈ సందర్భంగా డైమండ్ రత్నబాబు మాట్లాడుతూ, ”థియేటర్ లో కుటుంబంతో సహా వచ్చి హాయిగా నవ్వుకునే చిత్రమిది. సన్నీ, సప్తగిరి పోటీపడి నటించారు. అత్యున్నత సాంకేతిక నిపుణులను ఇచ్చినందుకు నిర్మాత రజిత్ రావుకి కృతజ్ఞతలు” అని అన్నారు. నిర్మాత మాట్లాడుతూ, ”సినిమాలపై ప్యాషన్ తో ఈ రంగానికి వచ్చాను. నా మొదటి సినిమాకి తెలుగు ప్రేక్షకులు, మీడియా సపోర్ట్ కావాలి. మోషన్ పోస్టర్ రిలీజ్ చేసిన ‘దిల్’ రాజు గారికి కృతజ్ఞతలు” అని చెప్పారు. బిత్తిరి సత్తి , షకలక శంకర్, పృధ్వీ కీలక పాత్రలు పోషిస్తున్న ఈ సినిమాలో, డిజే టిల్లు మురళి, సూపర్ విమన్ లిరీషా, రాజా రవీంద్ర ,పోసాని కృష్ణ మురళి, చమ్మక్ చంద్ర, విరాజ్ ముత్తంశెట్టి, గీతా సింగ్, రోహిణి, రూప లక్ష్మీ, మణి చందన, విక్రమ్ ఆదిత్య, రఘుబాబు, ఆనంద్ చక్రపాణి, గబ్బర్ సింగ్ బ్యాచ్ నటిస్తున్నారు. ఈ సినిమాకు భీమ్స్ సిసిరోలియో సంగీతాన్ని అందిస్తున్నారు.
