JanaNayagan : జననాయగన్ ఓటీటీ రైట్స్ అమెజాన్ రీ-ఎంట్రీ?

తమిళ సూపర్ స్టార్ విజయ్ తన సినీ కెరీర్‌కు వీడ్కోలు పలుకుతూ నటించిన చివరి చిత్రం ‘జననాయగన్’. ఈ సినిమాపై మొదటి నుండి భారీ అంచనాలు ఉన్నప్పటికీ సెన్సార్ సమస్యల వల్ల విడుదల వాయిదా పడుతూ వస్తోంది. దాంతో ఈ సినిమా ఓటీటీ రైట్స్ డీల్ కూడా క్యాన్సిల్ అయింది. వాస్తవానికి ఈ చిత్రం డిజిటల్ రైట్స్‌ను ప్రముఖ ఓటీటీ ప్లాట్‌ఫామ్ అమెజాన్ ప్రైమ్ వీడియో భారీ ధరకు సొంతం చేసుకుంది. అయితే ప్రకటించిన తేదీకి సినిమా విడుదల కాకపోవడంతో ఈ డీల్ రద్దయింది.

కానీ తమిళనాడు రాజకీయాల్లో సంచలనం సృష్టిస్తూ విజయ్ ముఖ్యమంత్రిగా బాధ్యతలు చేపట్టడంతో ‘జననాయగన్’ ప్రాజెక్టుకు ఒక్కసారిగా గ్లోబల్ స్థాయిలో హైప్ పెరిగింది. ఒక రాష్ట్ర ముఖ్యమంత్రి ఆఖరి సినిమా కావడంతో దీని డిజిటల్ రైట్స్ కోసం మళ్ళీ పోటీ మొదలైంది. ఈ నేపథ్యంలోనే అమెజాన్ ప్రైమ్ వీడియో మరోసారి కేవీఎన్ ప్రొడక్షన్స్ తో చర్చలు జరుపుతున్నట్లు సమాచారం. విజయ్ క్రేజ్‌ను క్యాష్ చేసుకునేందుకు భారీ ఆఫర్‌ను మేకర్స్ ముందు ఉంచినట్లు ట్రేడ్ వర్గాలలో టాక్ వినిపిస్తోంది. చాలా కాలంగా సెన్సార్ బోర్డు వద్ద పెండింగ్‌లో ఉన్న ఈ చిత్రం త్వరలోనే లైన్ క్లియర్ చేసుకుని థియేటర్లలోకి వచ్చే అవకాశం ఉంది. హెచ్. వినోద్ దర్శకత్వంలో తెరకెక్కిన ఈ చిత్రంలో పూజా హెగ్డే, బాబీ డియోల్ కీలక పాత్రల్లో నటిస్తున్నారు. ఓటీటీ డీల్ కుదిరిన తర్వాత అధికారిక విడుదల తేదీపై స్పష్టత వచ్చే అవకాశం ఉంది. ప్రస్తుతానికి ‘జననాయగన్’ చుట్టూ జరుగుతున్న ఈ పరిణామాలు అటు అభిమానుల్లో ఇటు ఇండస్ట్రీలో హాట్ టాపిక్‌గా మారాయి.