Suhas: సుహాస్, సూరి ‘మండాడి’ షూటింగ్ పూర్తి!

వైవిధ్యమైన చిత్రాలతో టాలీవుడ్‌లో తనకంటూ ఒక ప్రత్యేక గుర్తింపు తెచ్చుకున్న నటుడు సుహాస్, ఇప్పుడు కోలీవుడ్‌లోకి గ్రాండ్‌గా ఎంట్రీ ఇచ్చేందుకు సిద్ధమయ్యారు. సుహాస్, నటుడు సూరి ప్రధాన పాత్రల్లో నటిస్తున్న ‘మండాడి’ చిత్ర షూటింగ్ విజయవంతంగా పూర్తయింది. ‘మండాడి’ చిత్రం మత్స్యకారుల జీవితాలు మరియు తీరప్రాంత నేపథ్యంలో సాగుతుంది. ముఖ్యంగా ఇందులో ఉండే సెయిల్‌బోట్ రేస్ (పడవ పందాలు) సన్నివేశాలు సినిమాకు ప్రధాన ఆకర్షణగా నిలవనున్నాయి. రియలిస్టిక్ లుక్ కోసం మేకర్స్ వాస్తవ ప్రదేశాలలో, ఎంతో వ్యయప్రయాసల కోర్చి చిత్రీకరణ జరిపారు.

ఈ సినిమాతో సుహాస్ తమిళ చిత్ర పరిశ్రమలోకి అడుగుపెడుతున్నారు. ఈ ప్రాజెక్ట్ కోసం సుహాస్ ఏకంగా 100 రోజుల కాల్ షీట్స్‌ కేటాయించడం విశేషం. కథపై ఉన్న నమ్మకంతోనే ఆయన ఇంత సమయాన్ని కేటాయించారని తెలుస్తోంది. పాత్ర డిమాండ్ మేరకు సూరి, సుహాస్ ఇద్దరూ తమ లుక్స్‌ను, శరీరాకృతిని మార్చుకుని సహజత్వానికి దగ్గరగా కనిపించబోతున్నారు. షూటింగ్ కంప్లీట్ అవ్వడంతో చిత్ర బృందం ప్రస్తుతం ఎడిటింగ్, విజువల్ ఎఫెక్ట్స్ మరియు సౌండ్ డిజైన్ పనుల్లో నిమగ్నమై ఉంది. ప్రముఖ దర్శకుడు వెట్రిమారన్ క్రియేటివ్ ప్రొడ్యూసర్‌గా వ్యవహరిస్తున్న ఈ చిత్రాన్ని ఆర్ఎస్ ఇన్ఫోటైన్‌మెంట్ బ్యానర్‌పై ఎల్రెడ్ కుమార్ నిర్మిస్తున్నారు. మహేష్ మాథ్యూ కంపోజ్ చేసిన యాక్షన్ సీక్వెన్స్ మరియు ఎమోషనల్ డ్రామా ప్రేక్షకులకు కొత్త అనుభూతిని ఇస్తాయని చిత్ర యూనిట్ ధీమా వ్యక్తం చేస్తోంది. త్వరలోనే విడుదల తేదీపై మేకర్స్ అధికారిక ప్రకటన చేయనున్నారు.