‘ది ప్యారడైజ్’ సినిమా టీజర్ తర్వాత పెద్దగా అప్డేట్లు లేకపోవడం, ముఖ్యంగా ట్రైలర్ కట్ రాలేదనే అసంతృప్తి ప్రేక్షకుల్లో ఉంది. దీనిపై డైరెక్టర్ శ్రీకాంత్ ఓదెల తన అభిప్రాయాన్ని వ్యక్తం చేశారు. అయితే ఒకరకంగా సంచలన వ్యాఖ్యలు చేశారనే చెప్పాలి. సినిమాలకు రోజుకో అప్డేట్ ఇవ్వడం, ట్రైలర్ల మీద ట్రైలర్లు రిలీజ్ చేయడం తనకు చిరాకు కలిగిస్తుందని శ్రీకాంత్ అన్నారు. ఇప్పుడున్న హడావుడిలో ఏదో ఒక కట్ చేసి ట్రైలర్ ఇవ్వడం తనకిష్టం లేదని, మనస్పూర్తిగా సంతృప్తి కలగనప్పుడు థియేట్రికల్ ట్రైలర్ రిలీజ్ చేయాల్సిన అవసరమే లేదని తేల్చి చెప్పారు.
తను సుకుమార్ వద్ద అసిస్టెంట్ డైరెక్టర్గా నాలుగేళ్లు గేటు దగ్గరే నిలబడి అవకాశాన్ని దక్కించుకున్నానని, సొంత ఆలోచనలతోనే కథలు రాస్తానని చెప్పారు. ఈ సినిమాలో తెలంగాణ జానపద గీతం ‘యేషనాగుల’ పాటను చిన్నప్పుడు విన్న అనుభవంతోనే జోడించానని తెలిపారు. ఈ సినిమాలో నాలుగు భారీ యాక్షన్ బ్లాక్స్ ఉన్నప్పటికీ, చివరికి థియేటర్ల నుంచి బయటకు వచ్చే ప్రేక్షకులను ఎమోషన్ వెంటాడుతుందని పేర్కొన్నారు.
నాని హీరోగా నటిస్తున్న ఈ సినిమాలో కయాదు లోహార్, సంపూర్ణేష్ బాబు, మోహన్ బాబు వంటి వారు ఇతర కీలకపాత్రలో నటించారు. ఈ సినిమాని ఎస్ఎల్వీ సినిమాస్ బ్యానర్ మీద సుధాకర్ చెరుకూరి అత్యంత ప్రతిష్టాత్మకంగా నిర్మించారు.