Shehnaaz Gill : షూటింగ్లో ప్రమాదం: పొరపాటున ముక్కు పుడక మింగేసిన నటి!

సినీ ప్రపంచంలో తెరవెనుక జరిగే ప్రమాదాలు ఒక్కోసారి నటీనటులకు వెన్నులో వణుకు పుట్టిస్తుంటాయి. తాజాగా ప్రముఖ నటి, గాయని షెహనాజ్ గిల్ సెట్‌లో ఊహించని ప్రమాదానికి గురయ్యారు. షూటింగ్ సమయంలో ఆమె అనుకోకుండా తన ముక్కు పుడకను మింగేయడం తీవ్ర కలకలం రేపింది. ప్రముఖ దర్శకుడు అరవింద్ ఖైరా తెరకెక్కిస్తున్న ‘ఇష్క్‌నామా’ అనే పంజాబీ పీరియడ్ లవ్ స్టోరీ షూటింగ్ సెట్‌లో ఈ ఘటన చోటుచేసుకుంది. ఒక సన్నివేశంలో భాగంగా వేగంగా పరిగెడుతుండగా, ఆమె ముక్కుకు ఉన్న పుడక ఊడి నోట్లోకి జారిపోయింది. ఏమీ తోచని స్థితిలో ఆమె దాన్ని మింగేసి కంగారుగా తీవ్రంగా దగ్గడం మొదలుపెట్టారు. ఆ సమయంలో పక్కనే ఉన్న తోటి నటుడు సౌరభ్ సచ్‌దేవా వెంటనే స్పందించి, ఆమె వెనుక తడుతూ ప్రమాదం నుండి బయటపడేసే ప్రయత్నం చేశారు. ఈ భయానక అనుభవానికి సంబంధించిన ‘బిహైండ్ ద సీన్స్’ (BTS) వీడియోను షెహనాజ్ స్వయంగా తన ఇన్‌స్టాగ్రామ్ ఖాతాలో పంచుకోవడంతో సామాజిక మాధ్యమాల్లో వైరల్‌గా మారింది.