Prabhas : ‘రాధేశ్యామ్’పై ప్రశాంత్ నీల్ సెటైర్.. సలార్ 2 టైంలో చూసుకుంటానన్నా ప్రభాస్

పాన్ ఇండియా రెబల్ స్టార్ ప్రభాస్, స్టార్ డైరెక్టర్ ప్రశాంత్ నీల్ కలయిక అంటేనే సినీ అభిమానుల్లో విపరీతమైన క్రేజ్. ఇటీవల విడుదలైన 418 ప్రమోషనల్ వీడియోలో వీరిద్దరితో పాటు దర్శకుడు కీర్తన్ నాదగౌడ కూడా సందడి చేశారు. ప్రశాంత్ నీల్ సమర్పణలో, కీర్తన్ నాదగౌడ దర్శకత్వంలో రూపొందిన హారర్ థ్రిల్లర్ చిత్రం ‘418’ ప్రమోషన్స్‌లో భాగంగా చిత్ర యూనిట్ ఒక వినూత్న వీడియోను రూపొందించింది. అయితే సినిమా ప్రమోషన్ కంటే కూడా, ప్రభాస్ చేసిన సెన్సేషనల్ కామెంట్లే ఇప్పుడు నెట్టింట తీవ్ర చర్చనీయాంశంగా మారాయి.  కీర్తన్ తెరకెక్కించిన ‘418’ పోస్టర్లు, కీహోల్ కాన్సెప్ట్‌ను గమనించిన ప్రభాస్.. ఈ సినిమాను ప్రశాంత్ నీల్ ఎందుకు సమర్పిస్తున్నారో సరదాగా ఆరా తీశారు. ప్రశాంత్ సినిమాల్లాగే ఇది కూడా డార్క్ థీమ్‌తో ఉండటం వల్లేనా అని ప్రభాస్ ప్రశ్నించగా, ప్రశాంత్ నీల్ నవ్వుతూ “మళ్లీ ఇది కూడా ‘రాధేశ్యామ్’ లాగా కలర్‌ఫుల్‌గా తీస్తే బాగోదు కదా” అంటూ చమత్కరించారు.

దానికి ప్రభాస్ గట్టిగా నవ్వుతూ, “అబ్బో.. గట్టి పంచే పడిందిగా! ‘సలార్ 2’ షూటింగ్‌లో నీ సంగతి చెప్తా” అంటూ నవ్వుల పువ్వులు పూయించారు. ఒక స్టార్ హీరో తన ప్లాప్ సినిమాను ఇంత ఓపెన్‌గా ప్రస్తావించడం, దర్శకుడితో కలిసి సరదాగా ట్రోల్ చేసుకోవడం సోషల్ మీడియాలో హాట్ టాపిక్‌గా మారింది.  ఈ సరదా సంభాషణ తర్వాత ప్రభాస్ పుట్టినరోజు సందర్భంగా ప్రశాంత్ నీల్ ఆయనకు శుభాకాంక్షలు తెలిపారు. ఆ సమయంలో ప్రభాస్ “నా గిఫ్ట్ ఎక్కడ?” అని అడగ్గా, నీల్ “సలార్ 2 ఎప్పుడు మొదలుపెడుతున్నామో అదే గిఫ్ట్” అంటూ అసలు నిజాన్ని బయటపెట్టారు. ఎప్పుడెప్పుడా అని ఎదురుచూస్తున్న పాన్ ఇండియా ప్రాజెక్ట్ ‘సలార్ 2’ వచ్చే ఏడాది జూన్‌లో సెట్స్‌పైకి వెళ్లనున్నట్లు ప్రశాంత్ నీల్ స్వయంగా స్పష్టం చేయడంతో ప్రభాస్ “ఈ విషయం జనాలకు గట్టిగా చెప్పు” అంటూ అభిమానులకు అదిరిపోయే క్లారిటీ ఇచ్చారు.

దర్శకుడు కీర్తన్ నాదగౌడ మాట్లాడుతూ.. ‘418’ అనేది ఎటువంటి కామెడీ లేదా రొమాన్స్ లేకుండా, ప్రేక్షకులను భయపెట్టే స్వచ్ఛమైన ‘స్ట్రిక్ట్లీ హారర్’ చిత్రమని పేర్కొన్నారు. ప్రశాంత్ నీల్ ప్రెజెంట్ చేస్తున్న ఈ చిత్రం థియేటర్లలో ప్రేక్షకులకు సరికొత్త భయాందోళనలను పరిచయం చేయనుందని చిత్ర బృందం ధీమా వ్యక్తం చేసింది. ప్రభాస్ చేసిన వ్యాఖ్యలు, ‘సలార్ 2’ గురించిన అప్‌డేట్‌తో ఈ వీడియో క్షణాల్లో వైరల్‌గా మారింది.