కొత్త సినిమా మొదలెట్టేసిన నయనతార

సౌత్ లో బిజీయెస్ట్ హీరోయిన్ ఎవరైనా ఉన్నారంటే నయనతారే! గత యేడాది ఆమె నటించిన తమిళ చిత్రం ‘మూకుత్తి అమ్మన్’ ఓటీటీలో విడుదల కాగా, తాజాగా ఈ యేడాది ఆగస్ట్ 13న మరో తమిళచిత్రం ‘నేత్రికన్’ సైతం ఓటీటీలోనే విడుదల కాబోతోంది. ఈ మధ్యలో నయన్ నటించిన మలయాళ చిత్రం ‘నిళల్’ థియేట్రికల్ రిలీజ్ అయ్యింది. ‘మూకుత్తి అమ్మన్’ తెలుగులో ‘అమ్మోరు తల్లి’గా డబ్ కాగా, ‘నిళల్’ను ‘నీడ’ పేరుతో డబ్ చేసి ఆహాలో ఇటీవలే స్ట్రీమింగ్ చేశారు. ఇదిలా ఉంటే ఆ మధ్య నయనతార నూతన దర్శకుడు జి. ఎస్. విఘ్నేష్ చిత్రంలో నటించబోతోందనే వార్తలు వచ్చాయి.

Read Also : రేపు థియేటర్లలో రెండు రీమేక్ చిత్రాల ఢీ!

ప్రముఖ నిర్మాణ సంస్థ డ్రీమ్ వారియర్ పిక్చర్స్ కు చెందిన ఎస్. ప్రభు దీన్ని నిర్మిస్తున్నారు. ఈ సినిమా షూటింగ్ సైలెంట్ గా ఇటీవల మొదలైపోయింది. నయనతార ప్రస్తుతం ఆసినిమా షూటింగ్ లో పాల్గొంటోంది. ఆమె పాత్ర చుట్టూనే ఈ థ్రిల్లర్ మూవీ కథ సాగుతుందని చెబుతున్నారు. నయన్ నటించిన ‘మాయ’, తాప్సీ మూవీ ‘గేమ్ ఓవర్’కు సంగీతం సమకూర్చిన రాన్ ఏతాన్ యోహన్ ఈ తాజా చిత్రానికి సంగీతం సమకూర్చబోతున్నాడు. డ్రీమ్ వారియర్ పిక్చర్స్ సంస్థ నుండి రాబోతున్న 38వ చిత్రమిది.