నేచురల్ స్టార్ నాని ప్రయాణం పూలపాన్పు కాదు. ఎలాంటి బ్యాక్ గ్రౌండ్ లేకుండా ఇండస్ట్రీకి వచ్చి.. స్వయంకృషితో అంచలంచలుగా ఎదిగిన ఆయన ప్రయాణం ఎంతో మందికి స్ఫూర్తిదాయకం. భారీ అంచనాల మధ్య ఆయన లేటెస్ట్ మూవీ ‘ది ప్యారడైజ్’ మరికొన్ని గంటల్లో ప్రేక్షకుల ముందుకు రాబోతున్న వేళ.. నాని సతీమణి సోషల్ మీడియాలో పెట్టిన ఓ ఎమోషనల్ నోట్ ఇప్పుడు సంచలనంగా మారింది. 16 ఏళ్ల క్రితం నాని ఎదుర్కొన్న అవమానాన్ని, ఆయన పడ్డ కష్టాన్ని గుర్తుచేసుకుంటూ ఆమె చేసిన వ్యాఖ్యలు అభిమానుల కంటతడి పెట్టిస్తున్నాయి. అసలు 2009లో ఏం జరిగిందో వివరిస్తూ ఆమె ఎమోషనల్ అయ్యారు. “నాకు ఇంకా గుర్తుంది.. 2009లో నీ సినిమా చూడటం కోసం మేమంతా కాలేజ్ బంక్ కొట్టి థియేటర్ కు వెళ్ళాం. కానీ తీరా అక్కడికి వెళ్లాక తెలిసింది ఏంటంటే.. రిలీజ్ రోజున ఆ సినిమాకు కనీసం మార్నింగ్ షో కూడా పడలేదని! ఒక కొత్త హీరో సినిమా కరెక్ట్ టైం కి థియేటర్లలోకి తీసుకురావడం ఎంత కష్టమో అప్పుడు నాకు అర్థమైంది” అంటూ నాని కెరీర్ తొలినాళ్లలో పడ్డ స్ట్రగుల్స్ ను ఆమె కళ్లకు కట్టారు.
“కానీ 16 ఏళ్ల తర్వాత నేడు పరిస్థితులు పూర్తిగా మారాయి. కేవలం నీ పేరు మీద ఉన్న నమ్మకంతోనే ‘ది ప్యారడైజ్’ సినిమా కోసం జనాలు థియేటర్లకు పోటెత్తుతున్నారు. ఒక్కో సినిమాతో నువ్వు సంపాదించుకున్న ఈ నమ్మకం చూస్తుంటే చాలా గర్వంగా, ఎమోషనల్ గా ఉంది. ఈ ‘రోమ్ నగరం’ ఒక్కరోజులో నిర్మించబడలేదు.. ఈ 16 ఏళ్ల నీ కష్టానికి, పోరాటానికి నేనే ప్రత్యక్ష సాక్షిని” అంటూ భర్త సక్సెస్ పట్ల ఆమె గర్వం వ్యక్తం చేశారు. నాని ప్రతి సినిమాను తన సొంత బిడ్డలా ప్రేమిస్తారని ఆమె తెలిపారు. “నీ ప్రతి సినిమాను ఓ పసిబిడ్డలా చూసుకున్నావు. కొన్ని నడిచాయి, కొన్ని పరిగెత్తాయి, ఇంకొన్ని దారిలో దెబ్బలు తిన్నాయి.. కానీ అవేవీ నీకు ముఖ్యం కాదు, అదెప్పటికీ నీ బిడ్డే. ఈరోజు రాత్రి ‘ప్యారడైజ్’ కూడా తన బేబీ స్టెప్స్ వేయబోతోంది. ఏం జరిగినా అంతా మంచే జరుగుతుంది.. నీకు ఎప్పుడూ అండగా మేమున్నాం!” అంటూ నాని భార్య చేసిన ఈ హృదయపూర్వక పోస్ట్ సోషల్ మీడియాలో విపరీతంగా వైరల్ అవుతోంది. భార్య ఇచ్చిన ఈ ఎమోషనల్ బూస్ట్ తో ‘ది ప్యారడైజ్’ బాక్సాఫీస్ వద్ద ఎలాంటి విధ్వంసం సృష్టిస్తుందో చూడాలి!