Nagarjuna: సినిమా మొదలుపెట్టే ముందే ‘పాన్ ఇండియా’ అని ఆలోచించడం వల్ల వచ్చే అనవసరపు తలనొప్పులను అక్కినేని నాగార్జున చాలా ప్రాక్టికల్‌గా ఎండగట్టారు. ఇటీవల చిన్న సినిమా మొదలు పెద్ద ప్రాజెక్ట్ వరకు ప్రతి ఒక్కరూ పాన్ ఇండియా అంటూ హడావుడి చేస్తుండటంపై నాగ్ తనదైన శైలిలో చురకలు అంటించారు. సినిమా తీసేటప్పుడే పాన్ ఇండియా అని మైండ్‌లో పెట్టుకుంటే మొత్తం గందరగోళం మొదలవుతుందని నాగార్జున విశ్లేషించారు. “మనం మొదట్లోనే అలా అనుకుంటే ఏ భాష యాక్టర్లను పెట్టుకోవాలి? వేరే వాళ్లను తెచ్చి ఇరికించాలా? డైలాగులు ఎలా రాయాలి? ఈ డైలాగ్ ఆ భాషోళ్లకు నచ్చుతుందా? మన కల్చర్, మనం కట్టే లుంగీలు వాళ్లకు ఎక్కుతాయా? అంటూ పనికిమాలిన నాన్సెన్స్ అంతా బుర్రలోకి వచ్చేస్తుంది” అంటూ నాగ్ అసలు విషయాన్ని బయటపెట్టారు.
ఇతర రాష్ట్రాల ప్రేక్షకుల అభిరుచుల కోసం కథలోని సహజత్వాన్ని మార్చడం సరికాదని ఆయన తేల్చిచెప్పారు. “తెలుగు సినిమాని తెలుగు సినిమా లాగే తీయాలి.. ఆ తర్వాతే మిగతావన్నీ” అంటూ సూటిగా స్పష్టం చేశారు. మన నేటివిటీని కాపాడుకుంటూ మంచి సినిమా తీస్తే, దాన్ని దేశవ్యాప్తంగా ప్రేక్షకులే ఆదరిస్తారనే విషయాన్ని నాగార్జున గుర్తుచేశారు. కథను వదిలేసి అనవసరపు కమర్షియల్ లెక్కలు వేసుకునే మేకర్స్‌కు నాగ్ మాటలు కచ్చితంగా ఒక రియాలిటీ చెక్ లాంటివని సినీ వర్గాలు భావిస్తున్నాయి.