Keerthy Suresh: లేడీ గ్యాంగ్‌స్టర్‌గా కీర్తి సురేశ్ ఊచకోత.. ఓటీటీ రిలీజ్ డేట్ లాక్!

Keerthy Suresh: వెండితెరపై చీరకట్టుతో, పద్ధతైన తెలుగుదనం ఉట్టిపడే పాత్రల్లో మెరిసిన జాతీయ ఉత్తమ నటి కీర్తి సురేశ్ ఇప్పుడు ఊహకందని ప్రయోగానికి తెరలేపారు. సాధారణంగా మాఫియా, గ్యాంగ్‌స్టర్ కథలంటే మగాళ్ల రక్తపాతం, తుపాకుల మోత మాత్రమే చూశాం. కానీ ఒక ఊరి మొత్తాన్ని తమ కనుసన్నల్లో ఉంచుకుని శాసించే ‘మహిళా డాన్ల’ మధ్య జరిగే భీకర అంతర్యుద్ధాన్ని చూపించేందుకు కీర్తి సురేశ్ సిద్ధమయ్యారు. బాలీవుడ్ పవర్‌హౌస్ పర్ఫార్మర్ రాధికా ఆప్టేతో కలిసి ఆమె నటించిన అత్యంత క్రేజీ క్రైమ్ థ్రిల్లర్ సిరీస్ ‘అక్క’ (Akka) డిజిటల్ స్క్రీన్‌పై విధ్వంసం సృష్టించేందుకు ముస్తాబైంది. ‘అక్క’ సిరీస్ కాన్సెప్ట్ వింటేనే ఒళ్లు గగుర్పొడిచేలా ఉంది. 1980ల కాలంలో దక్షిణ భారతదేశంలోని ‘పెర్నూరు’ అనే ఒక కల్పిత పట్టణం నేపథ్యంలో ఈ కథ సాగుతుంది. ఆ ప్రాంతంలో చట్టం లేదు.. పోలీసుల మాట చెల్లదు.. అక్కడ కేవలం మహిళా గ్యాంగ్‌స్టర్లదే అంతిమ తీర్పు. స్వయంకృత నిబంధనలతో ఆ ప్రాంతాన్ని తమ గుప్పిట్లో ఉంచుకున్న లేడీ క్వీన్స్ మధ్య నడిచే పచ్చి రక్తపాతమే ఈ కథాంశం.

అయితే, అప్పటివరకు ఒకరికొకరు అండగా నిలిచిన ఆ మహిళా సామ్రాజ్యంలోకి ఒక బయటి వ్యక్తి ప్రవేశించడంతో సీన్ మొత్తం రివర్స్ అవుతుంది. వారి మధ్య ఉన్న సోదరీభావం నిలువునా బద్దలై.. కుర్చీ కోసం, అధికారం కోసం అంతర్గత కుట్రలు మొదలవుతాయి. అధికారాన్ని చేజిక్కించుకోవడానికి ఒకరిపై ఒకరు జరిపే క్రూరమైన దాడులు, హింసాత్మక పోరుతో పెర్నూరు నగరం కాస్తా రణరంగంగా ఎలా మారిందన్నది ఒళ్ళు గగుర్పొడిచే రీతిలో దర్శకుడు తెరకెక్కించారు. ఇటీవలే ‘ది ప్యారడైజ్’ చిత్రంలో ‘ఏషనాగుల’ పాటతో దుమ్మురేపిన కీర్తి, ఆ వెంటనే తమిళ చిత్రం ‘డోరోతి’తో సర్‌ప్రైజ్ ఇచ్చారు. ఆ జోరు తగ్గకముందే ఇప్పుడు కెరీర్‌లోనే ఎన్నడూ చూడని అత్యంత వయోలెంట్, రా అండ్ రస్టిక్ పాత్రతో డిజిటల్ ప్లాట్‌ఫారమ్‌ను షేక్ చేయడానికి వస్తున్నారు. ప్రముఖ ఓటీటీ దిగ్గజం నెట్‌ఫ్లిక్స్ ఈ ఏడాది ఫిబ్రవరిలోనే ‘అక్క’ ప్రాజెక్ట్‌ను ప్రకటించి దేశవ్యాప్తంగా క్యూరియాసిటీని పెంచింది. తాజా సమాచారం ప్రకారం, ఈ భారీ బడ్జెట్ క్రైమ్ డ్రామాను అక్టోబరు 30 నుంచి గ్రాండ్‌గా స్ట్రీమింగ్ చేయనున్నట్లు తెలుస్తోంది. ఓటీటీ వేదికగా ‘అక్క’ సరికొత్త రికార్డులను తిరగరాయడం ఖాయంగా కనిపిస్తోంది.