Sumalatha: హైదరాబాద్‌లోని తెలుగు ఫిల్మ్ ఛాంబర్‌లో నిర్వహించిన తెలుగు సినీ కార్మిక సమాఖ్య (ఫెడరేషన్) మీడియా సమావేశం తీవ్ర ఉద్రిక్తతకు దారితీసింది. ఫెడరేషన్ నాయకులు మీడియా సమావేశం నిర్వహిస్తున్న హాల్‌లోకి డ్యాన్సర్స్ యూనియన్ అధ్యక్షురాలు, కొరియోగ్రాఫర్ జానీ మాస్టర్ భార్య సుమలత తన మద్దతుదారులతో కలిసి ఒక్కసారిగా ప్రవేశించడంతో పరిస్థితి రణరంగంగా మారింది. ‘ఫెడరేషన్, డ్యాన్సర్స్ అసోసియేషన్ ప్రెస్ మీట్’ అని ప్రచారం చేస్తూ, డ్యాన్సర్స్ యూనియన్ అధ్యక్షురాలినైన తనను పిలవకుండా సమావేశం ఎలా నిర్వహిస్తారంటూ సుమలత ఫైర్ అయ్యారు. ఫైల్స్, పత్రాలు చేతబూని నేరుగా వేదికపై కూర్చున్న ఫెడరేషన్ కార్యవర్గ నేతల వద్దకు దూసుకెళ్లి తీవ్ర వాగ్వాదానికి దిగారు. జానీ మాస్టర్‌పై గతంలో నాన్-కోఆపరేషన్‌ను ఎత్తివేసిన తర్వాత, మళ్లీ ఆయనను ఎందుకు పని చేయకుండా బ్యాన్ చేశారంటూ సూటిగా వారిని ప్రశ్నించారు.
సుమలత నేతలను నిలదీస్తుండగా, ఫెడరేషన్ సభ్యులు ఆమెను మాట్లాడకుండా అడ్డుకునే ప్రయత్నం చేశారు. దీంతో ఇరువర్గాల మధ్య తీవ్ర తోపులాట, గందరగోళం చోటుచేసుకుంది. ఒకరిపై ఒకరు అరుచుకుంటూ పెద్ద పెట్టున నినాదాలు చేయడంతో మీడియా సమావేశం పూర్తిగా రసాభాసగా మారింది. కెమెరాలు, మీడియా ప్రతినిధుల సమక్షంలోనే పరస్పర వాదనలు, దూషణలతో ఛాంబర్ ప్రాంగణం దద్దరిల్లింది. తన భర్త జానీ మాస్టర్ ఎక్కడా మీడియా ముందుకు రాకపోయినా, వ్యక్తిగత కక్షతో ఆయన పొట్టకొట్టేలా నిర్ణయాలు తీసుకుంటున్నారని సుమలత ఆవేదన వ్యక్తం చేశారు. డ్యాన్సర్స్ యూనియన్‌లో జరుగుతున్న అవకతవకలను తాను ప్రశ్నిస్తున్నందుకే తన భర్తను అడ్డం పెట్టుకుని వేధిస్తున్నారని ఆమె ఆరోపించారు. అనూహ్యంగా జరిగిన ఈ హైడ్రామాతో ఫిల్మ్ ఛాంబర్‌లో ఏం జరుగుతుందో తెలియక కొద్దిసేపు తీవ్ర గందరగోళ పరిస్థితులు నెలకొన్నాయి.
