ప్రస్తుత తెలుగు చిత్రసీమలో యాక్షన్ పేరుతో వెండితెరకు రక్తాభిషేకం చేయడం ఒక కొత్త ట్రెండ్గా మారింది. ఒకప్పుడు కథ, కథనాలు, బలమైన భావోద్వేగాలు కమర్షియల్ విజయాన్ని నిర్ణయించేవి. కానీ ఇప్పుడు తెరపై కత్తులతో ఊచకోత కోస్తేనే, నరనరాన భయం పుట్టించేలా రక్తపాతం సృష్టిస్తేనే సినిమా హిట్ అవుతుందనే భావన పెరిగిపోతోంది. హింసను అతిగా చూపించడమే కమర్షియలిజం అనే రేంజ్లో మేకర్స్ రక్తాన్ని పారించడం కలవరపెడుతోంది.
ఇటీవల వచ్చిన అనేక భారీ చిత్రాలలో ఓవర్ యాక్షన్, కత్తి పడితే తలలు తెగిపడటం సాధారణ విషయంగా మారిపోయాయి. ‘ది ప్యారడైజ్’ లాంటి సినిమాల్లో కత్తి పడితే తలలు తెగిపడేంతగా నరమేధాన్ని చూపించారు. ఇక ‘టాక్సిక్’ హింసకు పరాకాష్టగా చూపించారు. పవన్ కళ్యాణ్ ‘ఓజీ’ కమర్షియల్గా ఓకే అనిపించుకున్నప్పటికీ అందులోనూ వైలెన్స్ హద్దులు దాటిందనే వ్యాఖ్యలు వినిపించాయి. సందీప్ రెడ్డి వంగా ‘యానిమల్’ క్లైమాక్స్ సీన్ పై వచ్చిన తీవ్ర విమర్శలు, విజయ్ దేవరకొండ ‘రౌడీ జనార్ధన్’ టీజర్ నిండా రక్తం నింపేయడం ఈ పరిస్థితికి నిదర్శనాలు. ఈ స్థాయి ఓవర్ యాక్షన్, విపరీతమైన రక్తం చిందించే సన్నివేశాలు ఫ్యామిలీ ఆడియన్స్ను తీవ్రంగా ఇబ్బందిపెడుతున్నాయి. కుటుంబ సమేతంగా థియేటర్లకు వెళ్లి హాయిగా సినిమా చూసే వాతావరణం మాయమవుతోంది. కేవలం బి-సి సెంటర్ల మాస్ క్రేజ్, కలెక్షన్ల కోసమే మేకర్స్ ఈ విధమైన హింసను ఆశ్రయిస్తున్నారనే విమర్శలు వెల్లువెత్తుతున్నాయి. కత్తీ-రక్తం మాత్రమే సినిమాను గట్టెక్కిస్తాయా? లేక కంటెంట్ లేని వైలెన్స్ ప్రేక్షకులకు విసుగు తెప్పిస్తుంది తప్ప ఎప్పటికి మెప్పించదు. ఈ విషయం మేకర్స్ కు ఎప్పడు తెలుస్తుందో.