EVV Cinema: కోర్టు రోషన్’తో ఈవీవీ కుమారుడి సినిమా

టాలీవుడ్‌లో వినోదాత్మక చిత్రాలకు కేరాఫ్ అడ్రస్‌గా నిలిచిన లెజెండరీ నిర్మాణ సంస్థ ‘ఈవీవీ సినిమా’ సుదీర్ఘ విరామం తర్వాత మళ్లీ సరికొత్త ప్రాజెక్ట్‌తో ప్రేక్షకుల ముందుకు రాబోతోంది. దివంగత ప్రముఖ దర్శకుడు ఈ.వీ.వీ. సత్యనారాయణ స్థాపించిన ఈ బ్యానర్, ‘ఎన్‌వీఆర్ ఎంటర్‌టైన్‌మెంట్స్’ సంస్థతో చేతులు కలిపి ఒక విలక్షణమైన చిత్రాన్ని పట్టాలెక్కించింది. ఈవీవీ సినిమా బ్యానర్‌లో వస్తున్న ప్రొడక్షన్ నెం.10, అలాగే ఎన్‌వీఆర్ ఎంటర్‌టైన్‌మెంట్స్ బ్యానర్‌లో ప్రొడక్షన్ నెం.1గా రూపొందుతున్న ఈ చిత్రం ఇటీవల పూజా కార్యక్రమాలతో గ్రాండ్‌గా ప్రారంభమైంది.

ఈవీవీ సినిమా బ్యానర్‌పై ఈవీవీ తనయుడు, నటుడు ఆర్యన్‌ రాజేష్‌ నిర్మాతగా మారారు. ఆయన మరో నిర్మాత ఎన్‌.వి.కృష్ణారెడ్డితో కలిసి ఈ క్రేజీ ప్రాజెక్ట్‌ను సంయుక్తంగా నిర్మిస్తున్నారు. పూర్తిగా ఒక నిజ జీవిత కథ ఆధారంగా, మనసుకు హత్తుకునే తీవ్రమైన భావోద్వేగాలతో కూడిన ఒక ఇంటెన్స్ లవ్ డ్రామాగా ఈ సినిమా తెరకెక్కబోతోంది. ‘కోర్ట్’ సినిమాతో నటుడిగా విమర్శకుల నుండి ప్రశంసలు అందుకుని, టాలీవుడ్‌లో ప్రామిసింగ్ యంగ్ హీరోగా గుర్తింపు తెచ్చుకున్న హర్ష్ రోషన్ ఈ సినిమాలో కథానాయకుడిగా నటిస్తున్నారు. ఆయనకు జోడీగా ప్రియాంక ఆచర్ నటిస్తోంది. ఈ కొత్త తరం ప్రేమకథను అరుణ్ బాలాజీ, శ్రీ రంజని సంయుక్తంగా డైరెక్ట్ చేయనున్నారు. నిజ జీవితంలో ఉండే ఎమోషన్స్, మానవ సంబంధాల చుట్టూ ఈ కథను వారు అల్లినట్లు తెలుస్తోంది.
llywood News