‘మెగాస్టార్’ చిరంజీవి అభిమానులకు ఒకేసారి రెండు అదిరిపోయే శుభవార్తలు. ఒకవైపు ‘మన శంకరవరప్రసాద్ గారు’ ప్రతిష్టాత్మక జాతీయ స్థాయి గుర్తింపును సొంతం చేసుకోగా.. మరోవైపు సోషియో-ఫాంటసీ చిత్రం ‘విశ్వంభర’ నుంచి కీలక అప్‌డేట్ వచ్చింది. ఈ సినిమా ట్రైలర్ కట్ పూర్తయినట్లు దర్శకుడు స్వయంగా వెల్లడించడంతో మెగా అభిమానుల్లో ఉత్సాహం నెలకొంది. ఒకవైపు మన శంకరవరప్రసాద్ గారు జాతీయ స్థాయిలో గుర్తింపు పొందడం.. మరోవైపు విశ్వంభర ట్రైలర్ సిద్ధం కావడం మెగాస్టార్ అభిమానులకు డబుల్ ధమాకాగా మారింది.
అనిల్ రావిపూడి దర్శకత్వంలో చిరంజీవి, వెంకటేష్ మల్టీస్టారర్‌గా తెరకెక్కిన మన శంకరవరప్రసాద్ గారు మరో అరుదైన మైలురాయిని అందుకుంది. గోవాలో జరగనున్న 57వ ఇంటర్నేషనల్ ఫిల్మ్ ఫెస్టివల్ ఆఫ్ ఇండియాలో ప్రతిష్టాత్మకమైన ఇండియన్ పనోరమా విభాగానికి ఈ చిత్రం అధికారికంగా ఎంపికైంది. జాతీయ స్థాయి చలనచిత్ర వేడుకలో ఈ గుర్తింపు దక్కించుకోవడం చిత్ర బృందంతో పాటు మెగా అభిమానులకు ఆనందాన్ని కలిగిస్తోంది. ఇప్పటికే ప్రేక్షకుల ఆదరణ పొందిన ఈ సినిమా ఖాతాలో మరో ప్రత్యేక గుర్తింపు చేరినట్లయింది.
మరోవైపు చిరంజీవి నటిస్తున్న సోషియో-ఫాంటసీ చిత్రం విశ్వంభర నుంచి కూడా అదిరిపోయే అప్‌డేట్ వచ్చింది. వశిష్ఠ దర్శకత్వంలో తెరకెక్కుతున్న ఈ విజువల్ వండర్ ట్రైలర్ కట్ పూర్తిగా సిద్ధమైంది. భారీ విజువల్ ఎఫెక్ట్స్ (VFX)తో రూపొందుతున్న ఈ సినిమా కోసం అభిమానులు ఎంతోకాలంగా ఎదురుచూస్తున్నారు. సాంకేతిక పనుల కారణంగా సినిమా విడుదలలో జాప్యం జరుగుతున్నప్పటికీ.. తాజాగా ట్రైలర్ సిద్ధం కావడం ఆసక్తిని పెంచుతోంది. సినిమా థియేట్రికల్ రిలీజ్ డేట్‌ను అధికారికంగా ఖరారు చేసిన వెంటనే ట్రైలర్‌ను విడుదల చేయాలని మేకర్స్ భావిస్తున్నారు. దీంతో ట్రైలర్ లాంచ్ ఎప్పుడు ఉంటుందా? అని అభిమానులు ఆసక్తిగా ఎదురుచూస్తున్నారు.