BVS Ravi: బాలయ్య ‘అన్‌స్టాపబుల్’ సీక్రెట్ బయటపెట్టిన బి.వి.ఎస్. రవి! అసలు విషయం ఇదే..

BVS Ravi: టాలీవుడ్‌లో వైవిధ్యమైన కథలతో, మాటలతో తనదైన ముద్ర వేసుకున్న రచయిత, దర్శకుడు బి.వి.ఎస్.రవి ఇటీవల ఎన్టీవీ పాడ్‌కాస్ట్ షోలో పాల్గొని పలు ఆసక్తికరమైన విషయాలను పంచుకున్నారు. తెలుగు ఓటీటీ రంగంలో సరికొత్త రికార్డులు సృష్టించి, టాప్ టాక్ షోగా దూసుకుపోతున్న నందమూరి బాలకృష్ణ ‘అన్‌స్టాపబుల్’ (Unstoppable) షో వెనుక ఉన్న ఆసక్తికరమైన విషయాలను ఈ పాడ్‌కాస్ట్‌లో ఆయన బయటపెట్టారు. అసలు ఈ షో ఐడియా ఎవరిదో? బాలకృష్ణ సెట్స్‌పై ఎలా ఉంటారు అనే విషయాలను పంచుకున్నారు.

ఈ సందర్భంగా ఆయన మాట్లాడుతూ.. బాలకృష్ణ గారితో ఒక వినూత్నమైన టాక్ షో చేయాలనే ఆలోచన మొదట ప్రముఖ నిర్మాత, ‘ఆహా’ అధినేత అల్లు అరవింద్ గారికి వచ్చిందని అన్నారు. ఈ విలక్షణమైన ప్రాజెక్ట్ కోసం తాను కూడా ఒక రైటర్‌గా టీమ్‌లో చేరానని వివరించారు. బాలయ్య బాబు ఇమేజ్‌కు సరిపోయేలా, ఆయనలోని సరికొత్త కోణాన్ని ప్రేక్షకులకు చూపించాలనే లక్ష్యంతోనే ఈ షోను డిజైన్ చేసినట్లు వెల్లడించారు. బాలకృష్ణ గారి వర్కింగ్ స్టైల్ – ఎనర్జీ లెవెల్స్ గురించి ఆయన మాట్లాడుతూ ఆశ్చర్యకరమైన విషయాలను చెప్పారు. “బాలయ్య బాబు ఎనర్జీ సామాన్యమైనది కాదు. ఆయన ఉదయం 5:30 గంటలకే సెట్స్‌కు వచ్చేస్తారు. అక్కడ నుండి రాత్రి 7:30 గంటల వరకు నాన్‌స్టాప్‌గా, అదే ఎనర్జీతో షూటింగ్‌లో దూసుకుపోతారు” అని ఆయన కొనియాడారు. వయసుతో సంబంధం లేకుండా బాలకృష్ణ చూపిస్తున్న ఈ అంకితభావం, ఎనర్జీనే ‘అన్‌స్టాపబుల్’ షో ఇంతటి ఘనవిజయం సాధించడానికి ప్రధాన కారణమని స్పష్టం చేశారు.