Siva Kandukuri: ‘భూతద్దం భాస్కర్ నారాయణ’గా యంగ్ హీరో!

 

‘చూసి చూడంగానే’ చిత్రంతో హీరోగా ఎంట్రీ ఇచ్చాడు ప్రముఖ నిర్మాత రాజ్ కందుకూరి తనయుడు శివ. ఆ తర్వాత అతను చేసిన ‘గమనం’ చిత్రం వివిధ భాషల్లో విడుదలై విమర్శకుల ప్రశంసలు అందుకుంది. తాజాగా శివ కందుకూరి నటించిన మరో సినిమా ఫస్ట్ గ్లింప్స్ మంగళవారం విడుదలైంది. పురుషోత్తం రాజ్‌ ని దర్శకుడిగా పరిచయం చేస్తూ, స్నేహల్‌ జంగాల, శశిధర్‌ కాశి, కార్తీక్‌ ముడుంబై సంయుక్తంగా మిలియన్‌ డ్రీమ్స్‌ క్రియేషన్స్‌, విజయ సరాగ ప్రొడక్షన్స్‌ బ్యానర్స్‌ పై ‘భూతద్దం భాస్కర్ నారాయణ’ అనే సినిమాను నిర్మిస్తున్నారు. ఇందులో శివ కందుకూరి సరసన రాశి సింగ్ హీరోయిన్ గా నటిస్తోంది.

ఈ రోజు విడుదల చేసిన ఫస్ట్‌ గ్లింప్స్‌ లో ఓపెన్‌ చేస్తే శేషపాన్పుపై పవళించిన విష్ణుమూర్తి వద్దకు నారద మునితో పాటు ఇంద్రుడు వచ్చి కలియుగంలో రాక్షసులు భువిపైకి అవతరించబోతున్నారు. అట్టి రాక్షసుల నుంచి కాపాడమని వేడుకొంటాడు. దానికి సాక్షాత్తు ఆ నారాయణుడు ‘చింతించకు ఇంద్రదేవా.. కలియుగంబున భువిపైన జనియించి, ఏ ఉపద్రవం తలెత్తకుండా చూసెదనని అభయం ఇస్తున్నాన’ని చెప్పడంతో హీరో శివ కందుకూరి భూతద్ధం భాస్కర్‌ నారాయణ రూపంలో ఎంట్రీ ఇస్తాడు. షర్టు వేసుకుని, లుంగీ కట్టుకుని, నల్ల కళ్లజోడు పెట్టుకుని, రివాల్వర్‌ తీసుకుంటాడు. పోలీస్‌ జీపు నుంచి దిగి స్టైల్‌గా సిగరెట్‌ అంటించి అందర్నీ ఆకట్టుకుంటాడు భూతద్ధం భాస్కర్‌ నారాయణ. ఈ గ్లింప్స్‌ ని చూస్తే ఇది ఒక మైథాలజీ నేపథ్యంలో జరిగే ఇంట్రెస్టింగ్‌ స్టోరీలా అనిపించడమే కాదు, గ్రామీణ వాతావరణంలో జరిగే ఒక డిటెక్టివ్‌ కథ అనేది అర్థమౌతోంది. ఈ చిత్రానికి శ్రీచరణ్‌ పాకాల, విజయ్‌ బుల్గానిన్‌ సంగీతం అందించారు. ప్రస్తుతం పోస్ట్‌ ప్రొడక్షన్‌ వర్క్ శరవేగంగా జరుగుతోందని త్వరలోనే మరిన్ని వివరాలు తెలియచేస్తామని దర్శక నిర్మాతలు తెలిపారు. అరుణ్‌, దేవీప్రసాద్‌, వర్షిణి, శివకుమార్‌, షఫీ, శివన్నారాయణ, కల్పలత, రూపలక్ష్మి, అంబటి శ్రీను, చైతన్య, వెంకటేశ్‌ కాకుమాను, ప్రణవి, దివిజ, ప్రభాకర్‌, కమల్‌, గురురాజ్‌ ఇందులో ఇతర ప్రధాన పాత్రలను పోషిస్తున్నారు.