Raaka: బన్నీ ‘రాకా’ పెద్ద స్కెచ్చే.. కానీ ‘శక్తి’ పోట్లు?

ఐకాన్ స్టార్ అల్లు అర్జున్, సెన్సేషనల్ డైరెక్టర్ అట్లీ కాంబోలో రాబోతున్న ప్రాజెక్ట్ అనౌన్స్‌మెంట్ నుంచే అంచనాలు ఆకాశాన్ని తాకాయి కానీ తాజాగా విడుదలైన టైటిల్ పోస్టర్ ‘రాకా’, అందులో బన్నీ ఊహించని డీ-గ్లామరైజ్డ్ లుక్ ఇప్పుడు సోషల్ మీడియాలో ఒక రేంజ్ చర్చకు దారితీసింది. స్టైలిష్ స్టార్‌గా పిలవబడే అల్లు అర్జున్‌ను అట్లీ Rawగా, మురికి పట్టిన దుస్తులు, గుండు, చెదిరిన జుట్టుతో చూపించడం అభిమానులను ఆశ్చర్యపరిచింది. ఈ డీ-గ్లామరైజ్డ్ అవతార్‌పై కొందరు “అట్లీ ఏదో మ్యాజిక్ చేయబోతున్నాడు” అని ప్రశంసిస్తుంటే, మరికొందరు మాత్రం బన్నీని ఇలా చూడలేకపోతున్నామంటూ మిశ్రమంగా స్పందిస్తున్నారు.

అయితే ‘రాకా’ అనే పేరు వినగానే నెటిజన్లు జూనియర్ ఎన్టీఆర్ కెరీర్‌లో భారీ డిజాస్టర్‌గా నిలిచిన ‘శక్తి’ సినిమాను గుర్తు చేసుకుంటున్నారు. అందులో విలన్ పేరు ‘రాకా’ కావడంతో, యాంటీ ఫ్యాన్స్ ఆ పాత ఫ్లాప్ రిఫరెన్స్‌లను బయటకు తీసి ట్రోల్ చేయడం ప్రారంభించారు ఈ దెబ్బకు సోషల్ మీడియాలో ‘శక్తి’, ‘మెహర్ రమేష్’ వంటి హ్యాష్ ట్యాగ్‌లు మళ్లీ ట్రెండింగ్‌లోకి వచ్చాయి. అయితే తమ హీరో లుక్‌ను, టైటిల్‌ను కావాలనే టార్గెట్ చేస్తున్నారంటూ అల్లు అర్జున్ అభిమానులు గట్టిగానే కౌంటర్లు ఇస్తున్నారు. “అక్కడ ఉన్నది అట్లీ.. కమర్షియల్ ఎలిమెంట్స్‌తో బాక్సాఫీస్‌ను షేక్ చేయడం ఆయనకు వెన్నతో పెట్టిన విద్య” అని బన్నీ ఫ్యాన్స్ ధీమా వ్యక్తం చేస్తున్నారు. ఒకప్పటి విలన్ పేరు పెట్టినంత మాత్రాన సినిమా రిజల్ట్ మారిపోదని, ఇది సరికొత్త రికార్డులు సృష్టిస్తుందని వారు వాదిస్తున్నారు. అయితే ఈ ‘రాకా’ ట్రోలింగ్ బన్నీ సినిమాకు నెగటివ్ అవుతుందా లేక పబ్లిసిటీగా మారుతుందా అనేది కాలమే నిర్ణయించాలి!