Homemade Face Pack: పార్లర్ మెరుపు కావాలా? పాల మీగడతో ఈ చిట్కా ట్రై చేయండి..

Homemade Face Pack: అందమైన, మెరిసే చర్మం కోసం ఖరీదైన బ్యూటీ ప్రొడక్ట్స్‌నే ఆశ్రయించాల్సిన అవసరం లేదని నిపుణులు చెబుతున్నారు. ఇంట్లోనే సులభంగా దొరికే పాల మీగడ (క్రీమ్), బంగాళాదుంప రసంతో తయారు చేసే ఫేస్ ప్యాక్ చర్మానికి సహజమైన మెరుపును అందించడంలో సహాయపడుతుంది. చర్మానికి సరిపడితే ఈ చిట్కా మృదుత్వం, తేమను కాపాడటంలో ఉపయోగపడుతుంది.

పాల మీగడ ఎందుకు మంచిది?

పాల మీగడలో ఉండే లాక్టిక్ యాసిడ్ మృత చర్మ కణాలను తొలగించడంలో సహాయపడుతుంది. అలాగే సహజ కొవ్వు చర్మానికి తేమను అందించి మృదువుగా, హైడ్రేటెడ్‌గా ఉంచుతుంది.

బంగాళాదుంప రసం వల్ల కలిగే ప్రయోజనాలు

బంగాళాదుంప రసంలో విటమిన్-సి, యాంటీఆక్సిడెంట్లు ఉండటంతో చర్మం తాజాగా కనిపించేందుకు దోహదపడుతుంది. టానింగ్, పిగ్మెంటేషన్, చిన్న చిన్న మచ్చలు తగ్గించేందుకు గృహ చిట్కాల్లో దీనిని విస్తృతంగా ఉపయోగిస్తారు. అయితే ఫలితాలు వ్యక్తి చర్మ తత్వాన్ని బట్టి మారవచ్చు.

ఫేస్ ప్యాక్ ఎలా తయారు చేయాలి?

ఒకటి లేదా రెండు టీస్పూన్ల తాజా పాల మీగడలో కొద్దిగా తాజా బంగాళాదుంప రసం వేసి బాగా కలపాలి. బంగాళాదుంప రసం సరిపడని వారికి బియ్యం కడిగిన నీటిని ప్రత్యామ్నాయంగా ఉపయోగించవచ్చు.

ఎలా ఉపయోగించాలి?

ముందుగా ముఖాన్ని శుభ్రంగా కడిగి, ఈ మిశ్రమాన్ని ముఖం, మెడపై సమానంగా రాయాలి. 15 నుంచి 20 నిమిషాల తర్వాత సాధారణ నీటితో కడిగి, చివరగా మాయిశ్చరైజర్ రాసుకోవాలి. ఈ ఫేస్ ప్యాక్‌ను వారానికి రెండు నుంచి మూడు సార్లు ఉపయోగించవచ్చు.

తప్పనిసరిగా గుర్తుంచుకోవాల్సిన విషయం

ప్రతి ఒక్కరి చర్మ తత్వం వేర్వేరుగా ఉంటుంది. కాబట్టి ఈ ఇంటి చిట్కాను ఉపయోగించే ముందు తప్పనిసరిగా ప్యాచ్ టెస్ట్ చేయాలి. దురద, మంట, ఎరుపు లేదా అలర్జీ లక్షణాలు కనిపిస్తే వెంటనే వాడటం ఆపేయాలి. తీవ్రమైన చర్మ సమస్యలు ఉన్నవారు చర్మవ్యాధి నిపుణుల సలహా తీసుకోవడం మంచిది.