Homemade Face Mask: కాలుష్యం, దుమ్ము, ఎండ ప్రభావం వల్ల చర్మం సహజ కాంతిని కోల్పోవడం సాధారణ సమస్యగా మారింది. దీంతో చాలా మంది ఖరీదైన బ్యూటీ ఉత్పత్తులు, పార్లర్ ట్రీట్మెంట్లపై ఆధారపడుతున్నారు. అయితే చర్మాన్ని ఆరోగ్యంగా, కాంతివంతంగా ఉంచేందుకు ఇంట్లోనే సహజ పదార్థాలతో తయారు చేసుకునే హెర్బల్ ఫేస్ మాస్క్ కూడా మంచి ప్రత్యామ్నాయంగా ఉపయోగపడుతుంది.
ఫేస్ మాస్క్లో ఉపయోగించే పదార్థాలు
ఈ ఫేస్ మాస్క్లో ఉపయోగించే పదార్థాలన్నీ సహజమైనవే. గులాబీ రేకుల పొడి, నారింజ తొక్క పొడి, బియ్యం పిండి, మసూర్ పప్పు పొడి, శనగపిండి, గంధపు పొడి, మంజిష్ఠ పొడిని సూచించిన పరిమాణాల్లో కలిపి గాలి చొరబడని డబ్బాలో నిల్వ చేసుకోవాలి. అవసరమైనప్పుడు ఒకటి లేదా రెండు టీస్పూన్ల మిశ్రమంలో రోజ్వాటర్ కలిపి మెత్తని పేస్ట్గా తయారు చేసుకోవాలి. పొడి చర్మం ఉన్నవారు కొన్ని చుక్కల కుంకుమాది తైలాన్ని కూడా కలపవచ్చు.
ఎలా ఉపయోగించాలి..?
తయారుచేసిన పేస్ట్ను ముఖం, మెడపై సమంగా రాసి 15 నుంచి 20 నిమిషాల పాటు ఆరనివ్వాలి. అనంతరం సాధారణ నీటితో సున్నితంగా మసాజ్ చేస్తూ కడిగేయాలి. వారానికి ఒకటి లేదా రెండు సార్లు ఈ మాస్క్ను ఉపయోగిస్తే చర్మం తాజాగా కనిపించడంలో, మృతకణాలు తొలగించడంలో సహాయపడుతుందని నిపుణులు సూచిస్తున్నారు. ముఖం కడిగిన తర్వాత తేలికపాటి మాయిశ్చరైజర్ లేదా కుంకుమపువ్వు, చందనం కలిగిన హైడ్రేటింగ్ క్రీమ్ను ఉపయోగించడం వల్ల చర్మంలో తేమ నిలిచి మృదుత్వం పెరుగుతుంది. అయితే సున్నితమైన చర్మం ఉన్నవారు ఈ ఫేస్ మాస్క్ను ఉపయోగించే ముందు తప్పనిసరిగా ప్యాచ్ టెస్ట్ చేయాలి. అలాగే ఇందులోని ఏ పదార్థానికైనా అలర్జీ ఉంటే ఉపయోగించకుండా ఉండటం మంచిది.