Ragi Drumstick Leaves Roti: ఎముకల పుష్టికి అవసరమైన కాల్షియం, కంటి సమస్యలను దూరం చేసే విటమిన్లు పుష్కలంగా లభించే అద్భుతమైన ఆహారాల కలయిక రాగిపిండి, మునగాకు. మన పెద్దల కాలం నుండి వస్తున్న ఈ సాంప్రదాయ వంటకం ఎదిగే పిల్లలకు, ఇంట్లోని పెద్దవారికి సంపూర్ణ పోషణను అందిస్తుంది. దీనిని తెలంగాణ ప్రాంతంలో రాగి మునగాకు సర్వపిండి అని, ఆంధ్ర ప్రాంతంలో రాగి మునగాకు తపాలా చెక్క అని కూడా పిలుస్తుంటారు.
లంచ్ బాక్స్ కోసం, సాయంత్రం స్నాక్గా లేదా రాత్రి డిన్నర్గా ఎప్పుడైనా దీనిని ఎంతో సులభంగా తయారు చేసుకోవచ్చు. శీతాకాలంలో అయితే ఈ రొట్టెలు రెండు రోజుల పాటు నిల్వ కూడా ఉంటాయి. మరి ఈ పోష్టిక ఆహారాన్ని ఎలా తాయారు చేయాలో చూసేద్దామా..
కావలసిన పదార్థాలు:
* రాగి పిండి: 2 కప్పులు,
* ఉల్లిపాయ తరుగు: 1 (సన్నగా తరిగినది),
* ఉప్పు: రుచికి సరిపడా,
* లేత మునగాకు: గుప్పెడు,
* వెల్లుల్లి తరుగు: 2 రెబ్బలు (సన్నగా తరిగినవి),
* పచ్చి కొబ్బరి తురుము: ¼ కప్పు,
* ఎండుమిర్చి ముక్కలు: 4,
* గోరువెచ్చని/వేడి నీళ్లు: 450 మి.లీ,
* నూనె: కాల్చడానికి తగినంత.
తయారీ విధానం:
ముందుగా ఒక వెడల్పాటి గిన్నెలో రాగిపిండి, సన్నగా తరిగిన ఉల్లిపాయ, రుచికి సరిపడా ఉప్పు, శుభ్రం చేసిన లేత మునగాకు, వెల్లుల్లి తరుగు, పచ్చి కొబ్బరి తురుము, ఎండుమిర్చి ముక్కలు వేయండి. ఇందులో దాదాపు 450 మి.లీ వేడినీళ్లు పోసి చెంచా లేదా విస్కర్ సహాయంతో కలపాలి. వేడినీళ్లు పోయడం వల్ల పిండిలోని పచ్చి వాసన పోయి, పిండి కాస్త మగ్గుతుంది. ఆ తర్వాత చేతితో ఆకు, ఉల్లిపాయ, వెల్లుల్లిని నలుపుతూ పిండిని గట్టిగా ముద్దలా కలపాలి. ఇలా చేయడం వల్ల మునగాకు, ఇతర పదార్థాల రుచులు పిండికి బాగా పడతాయి. ఈ పిండి ముద్దను కనీసం 30 నిమిషాల పాటు నాననివ్వాలి.
30 నిమిషాల తర్వాత ఒక కుండ లేదా మూకుడును బోర్లించి, దానిపై తడి కాటన్ గుడ్డను పరవాలి. ఇప్పుడు బత్తాయి కాయ పరిమాణంలో పిండి ముద్దను తీసుకుని క్లాత్ పై ఉంచాలి. చేతికి కొద్దిగా నూనె లేదా తడి రాసుకుంటూ పావు అంగుళం కంటే తక్కువ మందంతో సమానంగా రొట్టెలా ఒత్తుకోవాలి.
పెనం బాగా వేడెక్కిన తర్వాత, గుడ్డతో సహా రొట్టెను పెనంపై బోర్లించి వేసి నెమ్మదిగా గుడ్డను తీసేయాలి. రొట్టెను మీడియం మంటపై 2 నిమిషాల పాటు కాలనివ్వాలి. రాగి రొట్టె లోపల వరకు సరిగ్గా కాలడానికి సమయం పడుతుంది, కాబట్టి హై ఫ్లేమ్లో కాకుండా మీడియం ఫ్లేమ్లోనే కాల్చాలి. రెండు నిమిషాల తర్వాత అంచుల వెంట, పైన అర టీస్పూన్ నువ్వుల నూనె లేదా పల్లీ నూనె వేయాలి. ఒక వైపు కాలిన తర్వాత తిరగేసి, రెండో వైపు కూడా మరో 3 నిమిషాల పాటు కాల్చుకోవాలి. బాగా కాలిన వేడివేడి రాగి మునగాకు రొట్టెను ఏదైనా రోటి పచ్చడి లేదా ఉల్లిపాయ కారంతో కలిపి తింటే ఎంతో రుచికరంగా ఉంటుంది.