Healthy Summer Drinks : ఎండ కాలం వచ్చిందంటే చాలు.. ఫ్రిజ్ లోని చల్లని నీళ్లు, సాఫ్ట్ డ్రింక్స్ వైపు మన మనసు లాగుతుంది. కానీ ఇవి తాత్కాలిక ఉపశమనాన్ని ఇచ్చినా, ఆరోగ్యానికి మాత్రం అంత మంచివి కావని నిపుణులు చెబుతున్నారు. అందుకే మన పెద్దలు చెప్పినట్లుగా సహజసిద్ధమైన డ్రింక్స్ తీసుకోవడం ఉత్తమం. ఎండల తీవ్రత పెరిగే కొద్దీ మన శరీరంలో శక్తి తగ్గిపోయి, నీరసం ఆవహిస్తుంది. ఇలాంటి సమయంలో శరీరానికి తక్షణ శక్తిని ఇస్తూ, వేడిని తగ్గించే అద్భుతమైన డ్రింగ్ ‘సత్తు డ్రింక్’. ఈ ‘సత్తు డ్రింక్’ అనేది ఒక నాచురల్ సమ్మర్ కూలర్ లాంటిది. దీనిని తాగడం వల్ల శరీర వేడి తగ్గడమే కాకుండా, జీర్ణక్రియ మెరుగుపడటంతో పాటు ఎన్నో ఆరోగ్య ప్రయోజనాలు కూడా శరీరానికి అందుతాయి. ఆ ఆరోగ్య ప్రయోజనాలు ఏంటి, దీనిని సింపుల్గా ఇంట్లో ఎలా చేసుకోవాలో ఈ స్టోరీలో తెలుసుకుందాం.
READ ALSO: Nuzvid: రైస్ పుల్లింగ్ పేరుతో 2.5 కోట్ల ఘరాన మోసం బట్టబయలు..!
తయారీకి కావాల్సిన పదార్థాలు ఇవే..
ఈ డ్రింక్ చేయడానికి ముందుగా మనం ‘సత్తు ప్రీమిక్స్’ పౌడర్ని సిద్ధం చేసుకోవాలి. దానికి కావాల్సిన పదార్థాలు ఏంటంటే..
ఉప్పు శెనగలు (Roasted Gram): 1 కప్పు (పొట్టు తీసినవి)
ఎండుమిరపకాయలు: 2
జీలకర్ర: 1 టీస్పూన్
మిరియాలు: ½ టీస్పూన్
పుదీనా ఆకులు: 2 టేబుల్ స్పూన్లు (దోరగా వేయించినవి)
ఉప్పు & నల్ల ఉప్పు (Black Salt): రుచికి తగినంత
తయారీ విధానం ఇదే..
ముందుగా పొట్టు తీసిన ఉప్పు శెనగలను లో ఫ్లేమ్ మీద కొద్దిగా వెచ్చబడే వరకు వేయించి పక్కన పెట్టుకోవాలి. తర్వాత అదే పాన్లో ఎండుమిరపకాయలు, జీలకర్ర, మిరియాలు, పుదీనా ఆకులు వేసి క్రిస్పీగా అయ్యే వరకు రోస్ట్ చేయాలి. వేయించిన వీటన్నింటినీ పూర్తిగా చల్లార్చి, మిక్సీ జార్లో వేసి మెత్తటి పొడిలా గ్రైండ్ చేసుకోవాలి. ఈ పొడిని ఎయిర్ టైట్ జార్లో నిల్వ చేసుకుంటే నెల రోజుల పాటు వాడుకోవచ్చు.
సత్తు డ్రింక్ ఇలా చేసేయండి..
ఒక గిన్నెలో లేదా మట్టి కుండలో పావు కప్పు సత్తు పొడిని తీసుకోండి. తర్వాత అందులో సన్నగా తరిగిన ఉల్లిపాయ ముక్కలు, పచ్చిమిర్చి ముక్కలు, కొత్తిమీర వేయండి. అనంతరం అర లీటర్ నీళ్లు పోసి ఉండలు లేకుండా బాగా కలపాలి. లాస్ట్లో ఒక నిమ్మకాయ రసాన్ని పిండి, కొన్ని ఐస్ క్యూబ్స్ వేసి సర్వ్ చేసుకోవాలి. ఇంతే సింపుల్గా మీ ఇంట్లో హెల్తీ సమ్మర్ డ్రింక్ను తయారు చేసుకోవచ్చు.
సత్తు డ్రింక్తో ఆరోగ్య ప్రయోజనాలు ఏంటంటే..
పని ఒత్తిడిలో ఉన్నప్పుడు లేదా ఎండలో తిరిగినప్పుడు ఇది తాగితే వెంటనే ఎనర్జీ వస్తుంది. అలాగే ఇది నాచురల్ కూలర్ కావడంతో శరీరంలోని వేడిని క్షణాల్లో తగ్గిస్తుంది. ఇందులో పీచు పదార్థం ఎక్కువగా ఉండటం వల్ల జీర్ణ సమస్యలు కూడా తగ్గుతాయి. ఇది తాగిన తర్వాత ఎక్కువ సేపు ఆకలి వేయదు, కాబట్టి బరువు తగ్గాలనుకునే వారికి కూడా ఇది ఒక మంచి ఎంపికగా చెబుతున్నారు. ఈ వేసవిలో రసాయనాలతో కూడిన డ్రింక్స్ బదులుగా, ఇలా ఇంట్లోనే ‘సత్తు డ్రింక్’ తయారు చేసుకుని మీ ఆరోగ్యాన్ని కాపాడుకోండి.