Amla Murabba: తెల్ల జుట్టుకు చెక్.. మెరిసే చర్మానికి కేరాఫ్ అడ్రస్.. అమ్మమ్మల కాలం నాటి సీక్రెట్ ఇదే!

Amla Murabba: ఆయుర్వేదంలో ఉసిరికాయకు ఉన్న ప్రాముఖ్యత అంతా ఇంతా కాదు. విటమిన్-సి పుష్కలంగా ఉండే ఉసిరిని రోజూ తీసుకోవడం వల్ల చర్మం నిగారింపును సంతరించుకోవడమే కాకుండా, జుట్టు బలంగా పెరుగుతుంది. అయితే ఉసిరిలోని వగరుతనం వల్ల చాలామంది దీనిని తినడానికి ఇష్టపడరు. అలాంటి వారి కోసం వగరు లేకుండా, తేనెలాంటి రుచితో సంవత్సరం పాటు నిల్వ ఉండే ‘ఆమ్లా మురబ్బా’ను సింపుల్‌గా ఎలా తయారు చేసుకోవాలో ఈ స్టోరీలో తెలుసుకుందాం.

READ ALSO: INCA: ఐఎన్సీఏ అవార్డ్స్..ఉత్తమ నటుడుగా నాగ చైతన్య!

కావలసిన పదార్థాలు:
ఉసిరికాయలు – అర కేజీ

బెల్లం – 300 గ్రాములు (2 కప్పులు)

నిమ్మరసం – 1 టీస్పూన్

నల్ల ఉప్పు (Black Salt) – అర టీస్పూన్

జీలకర్ర పొడి – అర టీస్పూన్

ఉప్పు – చిటికెడు

తయారీ విధానం..
ముందుగా ఉసిరికాయలను శుభ్రంగా కడిగి, మరుగుతున్న నీళ్లలో వేసి 15-20 నిమిషాల పాటు ఉడికించాలి. ఇలా నీళ్లలో ఉడికించడం వల్ల ఉసిరిలోని వగరుతనం చాలా వరకు తగ్గుతుంది. ఉసిరికాయ రేకులు విడివడే వరకు ఉడికించడం ముఖ్యం. ఉడికిన ఉసిరికాయలు చల్లారిన తర్వాత, వాటిపై ఉండే పల్చటి పొరను తీసేసి, గింజలను వేరు చేసి ముక్కలుగా చేసుకోవాలి. తర్వాత ఈ ముక్కల్లో నిమ్మరసం, ఉప్పు, నల్ల ఉప్పు, జీలకర్ర పొడి వేసి బాగా కలపాలి. ఇందులోకి జీలకర్ర పొడికి బదులుగా సొంటి పొడి లేదా యాలకుల పొడిని కూడా వాడుకోవచ్చు. అనంతరం ఒక గిన్నెలో తురిమిన బెల్లం, ఉసిరి ముక్కలను వేసి మంటను మీడియం ఫ్లేమ్‌లో ఉంచి ఉడికించాలి. బెల్లం కరిగి ముదురు తీగ పాకం వచ్చే వరకు (సుమారు 20-30 నిమిషాలు) ఉడికించాలి. తయారైన మురబ్బా పూర్తిగా చల్లారిన తర్వాత తేనె లాంటి చిక్కదనానికి వస్తుంది. దీనిని గాజు సీసాలో భద్రపరుచుకుంటే బయట ఆరు నెలలు, ఫ్రిజ్‌లో పెడితే ఏడాది పాటు నిల్వ ఉంటుంది.

ఆరోగ్య ప్రయోజనాలు ఇవే..
ఉసిరిలో విటమిన్-సి పుష్కలంగా ఉంటుంది. ఇది శరీరంలో తెల్ల రక్త కణాల ఉత్పత్తిని పెంచి, ఇన్‌ఫెక్షన్లు, జలుబు, దగ్గు వంటి సమస్యల నుంచి రక్షణ కల్పిస్తుందని చెబుతున్నారు. ముఖ్యంగా సీజన్ మారేటప్పుడు వచ్చే వ్యాధులను అడ్డుకుంటుందన్నారు. దీనిలోని యాంటీ ఆక్సిడెంట్ గుణాలు రక్తాన్ని శుద్ధి చేస్తాయి. ఇది చర్మంపై ముడతలు, మచ్చలను తగ్గించి సహజమైన మెరుపును ఇస్తుంది. మురబ్బాలోని యాంటీ ఏజింగ్ లక్షణాలు మిమ్మల్ని ఎక్కువ కాలం యవ్వనంగా ఉంచుతాయి. జుట్టు రాలడం, తెల్లబడటం వంటి సమస్యలకు ఉసిరి ఒక వరం అని, ఇది జుట్టు కుదుళ్లను బలోపేతం చేసి, జుట్టు ఒత్తుగా, నల్లగా పెరగడానికి సహాయపడుతుందన్నారు. లోపలి నుంచి పోషణ అందించడం వల్ల జుట్టుకు సహజమైన కండిషనర్ లా పనిచేస్తుందని చెప్పారు.

ఉసిరిలో పీచు పదార్థం ఎక్కువగా ఉంటుంది. దీనిని ప్రతిరోజూ తీసుకోవడం వల్ల మలబద్ధకం, గ్యాస్, ఎసిడిటీ వంటి సమస్యలు తగ్గుతాయి. తిన్న ఆహారం త్వరగా జీర్ణమవ్వడానికి ఇది బాగా దోహదపడుతుందన్నారు. మనం ఈ మురబ్బాను బెల్లంతో తయారు చేస్తున్నాం కాబట్టి, ఇందులో ఐరన్ (ఇనుము) శాతం ఎక్కువగా ఉంటుంది. ఇది శరీరంలో హిమోగ్లోబిన్ స్థాయిని పెంచి, రక్తహీనత సమస్యను దూరం చేస్తుందన్నారు. ఉసిరి శరీరంలోని చెడు కొలెస్ట్రాల్‌ను తగ్గించి, రక్త ప్రసరణను మెరుగుపరుస్తుంది. దీనివల్ల రక్తపోటు అదుపులో ఉంటుంది, గుండె జబ్బుల ప్రమాదం కూడా తగ్గుతుంది. కంటి చూపు మందగించడం, కళ్లు ఎర్రబడటం వంటి సమస్యలతో బాధపడేవారికి ఉసిరి ఎంతో మేలు చేస్తుందని, ఇది కంటి నరాలను బలోపేతం చేసి చూపును కూడా మెరుగుపరుస్తుందన్నారు. ఇన్ని ఆరోగ్య ప్రయోజనాలు ఉన్న ఈ ఉసిరి మురబ్బాను మీకు ఖాళీ ఉన్నప్పుడు మీ ఇంట్లో తయారు చేసుకోండి.

READ ALSO: Raaka: అల్లు అర్జున్ ‘రాకా’ లో ‘శివగామి’.. ఫస్ట్ లుక్‌తోనే సెన్సేషన్!