Fridge Storage Tips : ఫ్రిజ్ అనేది కేవలం ఆహారాన్ని చల్లగా ఉంచే పరికరం మాత్రమే కాదు. సరైన విధంగా ఉపయోగిస్తే కూరగాయలు, పండ్లు, వండిన ఆహారం, పాల ఉత్పత్తులు ఎక్కువ రోజులు తాజాగా ఉండేలా చేస్తుంది. అయితే చాలా మంది ఆహార పదార్థాలను ఎలా పడితే అలా ఫ్రిజ్లో పెట్టేస్తుంటారు. దీనివల్ల అవి త్వరగా పాడవడం, రుచి మారిపోవడం, కొన్నిసార్లు ఆరోగ్య సమస్యలు కూడా రావడం జరుగుతుంది. మరి ఫ్రిజ్లో ఆహారం ఎక్కువ కాలం తాజాగా ఉండాలంటే ఎలాంటి జాగ్రత్తలు తీసుకోవాలి?
చాలామంది చేసే మొదటి పొరపాటు వేడిగా ఉన్న ఆహారాన్ని నేరుగా ఫ్రిజ్లో పెట్టడం. ఇలా చేయడం వల్ల ఫ్రిజ్లోని మొత్తం ఉష్ణోగ్రత ప్రభావితమవుతుంది. దీంతో ఇప్పటికే ఉన్న ఇతర ఆహార పదార్థాలపై కూడా ప్రభావం పడే అవకాశం ఉంటుంది. కాబట్టి వండిన ఆహారం పూర్తిగా చల్లారిన తర్వాత మాత్రమే ఫ్రిజ్లో ఉంచడం మంచిది. ఆహార పదార్థాలను ఎప్పుడూ మూత ఉన్న డబ్బాల్లో లేదా ఎయిర్ టైట్ కంటైనర్లలో నిల్వ చేయాలి. ఓపెన్గా ఉంచితే వాటి తేమ తగ్గిపోవడంతో పాటు ఫ్రిజ్లోని ఇతర ఆహారాల వాసనలు కూడా వాటికి అంటుకునే అవకాశం ఉంటుంది. ముఖ్యంగా కూరలు, పప్పులు, వండిన అన్నం వంటి వాటిని మూత లేకుండా ఉంచడం మంచిది కాదు.
కూరగాయలను నిల్వ చేసే విషయంలో కూడా కొంత జాగ్రత్త అవసరం. మార్కెట్ నుంచి తెచ్చిన వెంటనే కడిగి ఫ్రిజ్లో పెట్టడం కంటే అవసరమైనప్పుడు కడగడం మంచిదని నిపుణులు చెబుతున్నారు. ఎందుకంటే అదనపు తేమ కారణంగా కూరగాయలు త్వరగా పాడయ్యే అవకాశం ఉంటుంది. ఆకుకూరలను పొడి గుడ్డలో చుట్టి ఉంచితే అవి ఎక్కువ రోజులు తాజాగా ఉంటాయి. పండ్ల విషయంలో కూడా ప్రతి పండు ఒకే విధంగా నిల్వ చేయాల్సిన అవసరం లేదు. అరటిపండ్లు, మామిడిపండ్లు పూర్తిగా పండకముందు ఫ్రిజ్లో పెట్టకూడదు. అలాగే కోసిన పండ్లను ఎయిర్ టైట్ డబ్బాల్లో ఉంచడం వల్ల అవి తాజాగా ఉంటాయి.
ఫ్రిజ్ను అవసరానికి మించి నింపేయడం కూడా మంచిది కాదు. ఫ్రిజ్లో చల్లని గాలి సరిగా ప్రసరించడానికి కొంత ఖాళీ ఉండాలి. అన్ని వస్తువులను కుక్కేసి పెట్టేస్తే చల్లదనం సమానంగా అందక కొన్ని ఆహార పదార్థాలు త్వరగా పాడయ్యే అవకాశం ఉంటుంది. వండిన ఆహారాన్ని చాలా రోజుల పాటు ఫ్రిజ్లో నిల్వ ఉంచడం కూడా సురక్షితం కాదు. సాధారణంగా ఒకటి నుంచి మూడు రోజుల లోపే ఉపయోగించడం మంచిది. ఎక్కువ రోజులు నిల్వ ఉంటే బ్యాక్టీరియా పెరిగే ప్రమాదం ఉంటుంది. అందుకే ఫ్రిజ్లో పెట్టిన తేదీ గుర్తుంచుకోవడం మంచి అలవాటు.
ఫ్రిజ్ను తరచూ శుభ్రం చేయడం కూడా చాలా ముఖ్యం. పాడైన ఆహార పదార్థాలు, కారిపోయిన పదార్థాలు లోపల ఉండిపోతే దుర్వాసనతో పాటు ఇతర ఆహారాలపై కూడా ప్రభావం చూపుతాయి. వారానికి ఒకసారి అయినా ఫ్రిజ్ను పరిశీలించి అవసరం లేని వస్తువులను తొలగించడం మంచిది. చిన్న చిన్న జాగ్రత్తలు తీసుకుంటే ఫ్రిజ్లో ఉంచే ఆహారం ఎక్కువ రోజులు తాజాగా ఉండటమే కాకుండా ఆహార వృథాను కూడా తగ్గించుకోవచ్చు. సరైన నిల్వ పద్ధతులు పాటించడం ద్వారా కుటుంబ ఆరోగ్యాన్ని కాపాడుకోవడంతో పాటు ఖర్చులను కూడా కొంత మేర తగ్గించే అవకాశం ఉంటుంది.