Dal Chilla Recipe: ఉదయాన్నే తక్కువ సమయంలో ఆరోగ్యకరమైన అల్పాహారం తయారు చేయాలనుకునే వారికి చిల్లా మంచి ఎంపిక. సాధారణంగా పిండితో లేదా పెసరపప్పుతో చిల్లాలు చేస్తుంటారు. అయితే ఇంట్లో మిగిలిపోయిన పప్పుతో కూడా రుచికరమైన, ప్రోటీన్ అధికంగా ఉండే చిల్లా తయారు చేసుకోవచ్చు. ఈ రెసిపీ రుచిగా ఉండటమే కాకుండా ఆరోగ్యానికి కూడా ఎంతో మేలు చేస్తుంది. మన ఇళ్లలో చాలాసార్లు పప్పు మిగిలిపోతుంది. దాన్ని మళ్లీ వేడి చేసి తినడం లేదా పారేయడం చేస్తుంటాం. కానీ మిగిలిపోయిన పప్పుతో ఇలా చిల్లా చేస్తే కుటుంబ సభ్యులు ఎంతో ఇష్టంగా తింటారు. ముఖ్యంగా పిల్లలకు కూడా ఇది మంచి పోషకాహారంగా ఉంటుంది.
కావలసిన పదార్థాలు
1 గిన్నె మిగిలిపోయిన పెసరపప్పు
2 గిన్నెల శనగపిండి
1 ఉల్లిపాయ (సన్నగా తరిగినది)
2 పచ్చిమిరపకాయలు (సన్నగా తరిగినవి)
1 టీస్పూన్ జీలకర్ర
చిటికెడు కారం పొడి
చిటికెడు ఆమ్చూర్ పొడి
1/2 టీస్పూన్ గరం మసాలా
కొద్దిగా కొత్తిమీర
అవసరమైనంత నూనె
తయారీ విధానం
మొదట ఒక గిన్నెలో మిగిలిపోయిన పప్పును తీసుకోవాలి. అందులో శనగపిండి, ఉల్లిపాయ ముక్కలు, పచ్చిమిర్చి, కొత్తిమీర, జీలకర్ర, కారం పొడి, ఆమ్చూర్ పొడి, గరం మసాలా వేసి బాగా కలపాలి. అవసరమైతే కొద్దిగా నీరు వేసి మిశ్రమాన్ని దోశ పిండిలా తయారు చేసుకోవాలి. తర్వాత స్టవ్పై పెనం పెట్టి వేడి చేయాలి. పెనం మీద కొద్దిగా నూనె రాసి, తయారుచేసుకున్న మిశ్రమాన్ని పోసి గుండ్రంగా పరచాలి. ఒక వైపు కాలిన తర్వాత మరో వైపు తిప్పి రెండు వైపులా బంగారు రంగులోకి వచ్చేవరకు కాల్చాలి. ఇలా కరకరలాడే, కారంగా ఉండే దాల్ చిల్లా సిద్ధమవుతుంది. దీనిని పచ్చి చట్నీ, టమాటో సాస్ లేదా పెరుగుతో వడ్డిస్తే రుచి మరింత పెరుగుతుంది.
ఆరోగ్య ప్రయోజనాలు
ఈ చిల్లాలో పప్పు, శనగపిండి ఉండటంతో ప్రోటీన్ మరియు ఫైబర్ పుష్కలంగా లభిస్తాయి. దీన్ని అల్పాహారంగా తీసుకుంటే ఎక్కువసేపు ఆకలి వేయదు. శరీరానికి శక్తి అందుతుంది. జీర్ణక్రియ మెరుగుపడుతుంది. ముఖ్యంగా తక్కువ నూనెతో తయారుచేస్తే మరింత ఆరోగ్యకరంగా ఉంటుంది. మిగిలిపోయిన ఆహారాన్ని వృథా చేయకుండా ఇలా కొత్త వంటకం చేయడం మంచి అలవాటు. కాబట్టి ఇకపై పప్పు మిగిలితే పారేయకుండా ఈ టేస్టీ దాల్ చిల్లా ట్రై చేయండి.