Jowar Idli Recipe: ప్రస్తుతం వయసుకు సంబంధం లేకుండా బరువు పెరుగుతున్నారు. ఇలా అధిక బరువుతో బాధపడేవారు దాన్ని తగ్గించుకోవడానికి వివిధ ప్రయత్నాలు చేస్తుంటారు. కొందరు విపరీతమైన వర్కవుట్లు చేస్తే, మరికొందరు ఆహారపుటలవాట్లు మార్చుకుంటారు. ఇంకొందరైతే బరువు తగ్గాలని తిండి కూడా మానేస్తుంటారు. అయితే ఇలా నోరు కట్టేసుకొని బరువు తగ్గించుకునే బదులు కొన్ని రకాల చిరుధాన్యాలను ఆహారంలో చేర్చుకోవడం మేలంటున్నారు పోషకాహార నిపుణులు. ప్రత్యేకించి జొన్నలతో చేసిన వంటకాలను తరచుగా తీసుకోవడం ద్వారా బరువును అదుపులో ఉంచుకోవచ్చంటున్నారు. ఇలాంటి వాళ్ల కోసం ప్రస్తుతం జొన్నలతో ఈజీగా, టేస్టీగా చేసుకునే జొన్న ఇడ్లీని ఎలా తయారు చేసుకోవాలో చూద్దాం..
జొన్న ఇడ్లీకి కావలసిన పదార్థాలు:
జొన్న పిండి – ఒక కప్పు
మినప్పప్పు – అర కప్పు
మెంతులు – పావు చిన్న చెంచా
ఉప్పు – తగినంత
నీరు – అవసరానికి సరిపడా
వడ్డించడానికి – కొబ్బరి చట్నీ లేదా సాంబారు
READ MORE: Donald Trump: 11 యుద్ధ విమానాలు కూలిపోయాయి.. ట్రంప్ నోట మళ్లీ అదే మాట..
తయారీ విధానం
మొదట ఒక గిన్నెలో జొన్న పిండి, మినప్పప్పు, మెంతులు వేసి నీరు కలిపి ముద్దలా చేయాలి. ఈ మిశ్రమాన్ని రాత్రంతా మూతపెట్టి ఉంచాలి. ఉదయానికి అది ఉబ్బి మృదువుగా మారుతుంది. ఇదే ఇడ్లీలకు మెత్తదనాన్ని ఇస్తుంది. ఇప్పుడు ఉప్పు వేసి మెల్లగా కలపాలి. ఇడ్లీ ప్లేట్లకు కొద్దిగా నూనె రాసి ముద్దను పోయాలి. ఆవిరిలో పది నుంచి పన్నెండు నిమిషాలు ఉడికించాలి. ఉడికిన తర్వాత మోల్డ్ నుంచి తీసి వేడిగా వడ్డించాలి. ఈ ముద్దలో క్యారెట్ తురుము, పాలకూర ముక్కలు లేదా కొబ్బరి తురుము కలిపితే రంగు, రుచి, పోషకాలు ఇంకా పెరుగుతాయి. ఇడ్లీ ప్లేట్లు లేకపోతే చిన్న గిన్నెల్లో కూడా ఆవిరి మీద ఉడికించవచ్చు. వేడిగా ఉన్నప్పుడే తింటే ఇవి చాలా రుచిగా ఉంటాయి. మిగిలితే గాలి పోకుండా మూత ఉన్న డబ్బాలో పెట్టి ఫ్రిజ్లో రెండు రోజుల వరకు ఉంచవచ్చు. మళ్లీ తినాలంటే కొద్దిసేపు ఆవిరిలో పెట్టినా లేదా ముప్పై సెకన్లు వేడి చేసినా మళ్లీ మెత్తగా అవుతాయి.
