Healthy Jowar Laddu Recipe: స్వీట్లలో లడ్డూలు అంటే చాలా మందికి ఇష్టం ఉంటుంది. కానీ.. బయట తయారు చేసే పలు రకాల లడ్డూలు తినడం అంత మంచిది కాదు. దుకాణాల్లో విక్రయించే లడ్డూల్లో ఏ పిండి వాడుతారు? ఏ నూనే వాడుతారో అనే సందేహం వస్తుంది. అందుకే వాటిని పూర్తిగా ఆస్వాదించలేము. అందుకే ఇప్పుడు మనం ఇంట్లోనే జొన్న పిండితో తయారు చేసే జొన్న లడ్డూ గురించి తెలుసుకుందాం.. ఈ లడ్డూ ఎంత రుచిగా ఉంటుందో ఆరోగ్యానికి కూడా అంతే మేలు చేస్తుంది. జొన్నపిండి, గోధుమపిండి, నెయ్యి, కొబ్బరి పొడి, బాదం వంటి పోషకమైన పదార్థాలతో తయారయ్యే ఈ లడ్డూ తీపి తినాలనే కోరికను తీర్చడంతో పాటు శరీరానికి శక్తిని సైతం అందిస్తుంది. ఆరోగ్యాన్ని కాపాడుకుంటూనే స్వీట్ను ఆస్వాదించాలనుకునే వారికి ఇది మంచి ఎంపిక. జొన్నలో అధికంగా ఫైబర్ ఉండడం వల్ల జీర్ణక్రియ మెరుగుపడుతుంది, మలబద్ధకం తగ్గుతుంది, ఎక్కువసేపు తృప్తిగా ఉండేలా చేస్తుంది. బరువు నియంత్రణలో కూడా ఇది సహాయపడుతుంది. జొన్నలో ఐరన్, మ్యాగ్నీషియం, బీ విటమిన్లు వంటి ముఖ్యమైన పోషకాలు సమృద్ధిగా ఉంటాయి. ఐరన్ రక్తహీనతను నివారించడంలో ఉపయోగపడుతుంది. మ్యాగ్నీషియం కండరాలు, నరాల పనితీరును మెరుగుపరుస్తుంది. బీ విటమిన్లు శక్తి ఉత్పత్తికి తోడ్పడతాయి. ఈ జొన్న లడ్డూలను ఎలా తయారు చేయాలో ఇప్పుడు చూద్దాం..
కావాల్సిన పదార్థాలు (7 లడ్డూలకు):
నెయ్యి – అర కప్పు
జొన్న పిండి – అర కప్పు
గోధుమపిండి – అర కప్పు
కొబ్బరి పొడి – అర కప్పు
ముక్కలుగా కట్ చేసిన బాదం – పావు కప్పు
బ్రౌన్ షుగర్ – అర కప్పు
తయారీ విధానం:
మొదట తక్కువ మంటపై ఒక పాన్ వేడి చేసి అందులో నెయ్యి వేసుకోవాలి. నెయ్యి కరిగిన తర్వాత జొన్నపిండి, గోధుమపిండి వేసి నిరంతరం కలుపుతూ సుమారు 5 నిమిషాలు వేయించాలి. పిండులు బాగా కలిసిపోతూ మంచి వాసన వచ్చేవరకు వేయించాలి. తర్వాత కొబ్బరి పొడి వేసి మరో 2 నిమిషాలు తక్కువ మంటపై కలుపుతూ వేయించాలి. మిశ్రమం నుంచి నెయ్యి విడివడటం ప్రారంభమైతే సరిపోతుంది. అప్పుడు స్టౌ ఆఫ్ చేయాలి. ఈ మిశ్రమాన్ని ఒక గిన్నెలోకి తీసుకుని కొద్దిగా చల్లారనివ్వాలి. వేడి కొంచెం తగ్గాక బాదం ముక్కలు, బ్రౌన్ షుగర్ వేసి బాగా కలపాలి. మిశ్రమం ఇంకా ఇదే వేడిలో ఉన్నప్పుడే చిన్న చిన్న ముద్దలు తీసుకుని లడ్డూలుగా చేసుకోవాలి. కావాలంటే పై భాగంలో బాదం లేదా జీడిపప్పుతో అలంకరించవచ్చు. లడ్డూలు పూర్తిగా చల్లారిన తర్వాత డబ్బాలో నిల్వ చేసుకుంటే బెస్ట్.. ఇవి చాలా టేస్టీగా, ఆరోగ్యకరంగా ఉంటాయి.
