High Protein Roti Recipe: గోధుమ పిండిలో ఈ 3 పదార్థాలు కలపండి.. హై ప్రోటీన్ రోటీ రెడీ..
- Follow Us :
-
-
Add as a preferred
source on google
High Protein Roti Recipe: ఆరోగ్యంగా ఉండేందుకు, ఫిట్నెస్ను కాపాడుకునేందుకు ప్రోటీన్ చాలా ముఖ్యమైన పోషక పదార్థం. అయితే ప్రస్తుతం చాలామంది ప్రోటీన్ అవసరాలను తీర్చుకోవడానికి ఖరీదైన ప్రోటీన్ పౌడర్లు, సప్లిమెంట్లపై ఆధారపడుతున్నారు. కానీ వీటిలో నకిలీ ఉత్పత్తులు కూడా ఉండే అవకాశం ఉండటంతో ఆరోగ్య నిపుణులు సహజ ఆహారాల ద్వారా ప్రోటీన్ను పొందాలని సూచిస్తున్నారు. ఇలాంటి పరిస్థితుల్లో ఇంట్లోనే సులభంగా తయారు చేసుకునే ‘హై ప్రోటీన్ రోటీ’ మంచి ప్రత్యామ్నాయంగా నిలుస్తోంది. వేయించిన శనగలు, పనీర్, పెరుగును గోధుమ పిండితో కలిపి తయారు చేసే ఈ రోటీ ప్రోటీన్తో పాటు విటమిన్ బి12ను కూడా అందిస్తుంది. అంతేకాకుండా సాధారణ రోటీల కంటే మరింత మెత్తగా, రుచిగా ఉండటం దీని ప్రత్యేకత.
కావలసిన పదార్థాలు
* 1 కప్పు గోధుమ పిండి
* 3 టేబుల్ స్పూన్లు వేయించిన శనగలు
* కొద్దిగా పనీర్
* 3 టేబుల్ స్పూన్లు పెరుగు
* 2 టేబుల్ స్పూన్లు నీరు (అవసరాన్ని బట్టి)
* నెయ్యి
తయారీ విధానం
మొదట మిక్సీ జార్లో వేయించిన శనగలు, పనీర్, పెరుగు, కొద్దిగా నీరు వేసి మెత్తని పేస్ట్లా తయారు చేసుకోవాలి. అనంతరం ఒక గిన్నెలో గోధుమ పిండి తీసుకుని, తయారుచేసుకున్న పేస్ట్ను కొద్దికొద్దిగా కలుపుతూ మెత్తని పిండిగా ముద్ద చేసుకోవాలి. అవసరమైతే కొద్దిగా నీరు జోడించవచ్చు. పిండిని కలిపిన తర్వాత 10 నుంచి 15 నిమిషాల పాటు మూతపెట్టి పక్కన ఉంచాలి. అనంతరం చిన్న ఉండలుగా చేసుకుని రోటీల మాదిరిగా ఒత్తాలి. వేడి పెనంపై రెండు వైపులా బంగారు రంగు వచ్చే వరకు కాల్చి, చివరగా కొద్దిగా నెయ్యి రాసి వేడిగా వడ్డించాలి.
ఈ రోటీ ప్రత్యేకత ఏమిటి?
వేయించిన శనగలు, పనీర్ రెండూ అధిక ప్రోటీన్ను అందించే ఆహార పదార్థాలు. అలాగే పెరుగు విటమిన్ బి12తో పాటు శరీరానికి అవసరమైన ఇతర పోషకాలను అందిస్తుంది. అందువల్ల ఈ రోటీ సాధారణ గోధుమ రోటీతో పోలిస్తే మరింత పోషక విలువలను కలిగి ఉంటుంది.
దేనితో తింటే మరింత ఆరోగ్యం?
ఈ హై ప్రోటీన్ రోటీని పప్పు, కూరగాయల కూరలు, పెరుగు లేదా పచ్చడితో కలిపి తినవచ్చు. అలాగే తేలికపాటి స్నాక్గా కూడా ఉపయోగించుకోవచ్చు. పిల్లల లంచ్ బాక్స్లకు, జిమ్కు వెళ్లే వారికి, ఫిట్నెస్పై శ్రద్ధ పెట్టే వారికి ఇది అద్భుతమైన ఎంపికగా చెప్పవచ్చు. ప్రోటీన్ పౌడర్లపై ఆధారపడకుండా సహజంగా ప్రోటీన్ను పొందాలనుకునే వారికి ఈ హై ప్రోటీన్ రోటీ ఆరోగ్యకరమైన, రుచికరమైన పరిష్కారంగా నిలుస్తుంది.