IBPS RRB Recruitment: ఉద్యోగార్థులకు శుభవార్త.. బ్యాంకింగ్‌ రంగంలో 13,706 ఉద్యోగాల జాతర.!

IBPS RRB Recruitment 2026: గ్రామీణ బ్యాంకుల్లో కొలువు సాధించాలనుకునే నిరుద్యోగ యువతకు శుభవార్త. దేశవ్యాప్తంగా ఉన్న రీజినల్ రూరల్ బ్యాంకుల్లో (RRBs) గ్రూప్ ‘A’ ఆఫీసర్లు (స్కేల్-I, II, III), గ్రూప్ ‘B’ ఆఫీస్ అసిస్టెంట్ (మల్టీపర్పస్) పోస్టుల భర్తీకి ఇన్‌స్టిట్యూట్ ఆఫ్ బ్యాంకింగ్ పర్సనల్ సెలక్షన్ (IBPS) అధికారిక నోటిఫికేషన్ విడుదల చేసింది.

ఈ రిక్రూట్‌మెంట్ ద్వారా ఆంధ్రప్రదేశ్ గ్రామీణ బ్యాంక్, తెలంగాణ గ్రామీణ బ్యాంక్ సహా దేశవ్యాప్తంగా పలు గ్రామీణ బ్యాంకుల్లోని 13,706 ఉద్యోగాల ఖాళీలను భర్తీ చేయనున్నారు. అర్హత, ఆసక్తి గల అభ్యర్థులు అధికారిక వెబ్‌సైట్ ద్వారా ఆన్‌లైన్‌లో దరఖాస్తు చేసుకోవాల్సి ఉంటుంది.

ముఖ్యమైన తేదీలు:

ఈ నోటిఫికేషన్‌కు సంబంధించిన ఆన్‌లైన్ దరఖాస్తుల ప్రక్రియ సెప్టెంబర్ 1, 2026 నుంచి ప్రారంభమై సెప్టెంబర్ 21, 2026తో ముగుస్తుంది. దరఖాస్తు ఫీజు చెల్లింపుకు కూడా సెప్టెంబర్ 21 చివరి తేదీ. ఆఫీస్ అసిస్టెంట్, ఆఫీసర్ స్కేల్-I పోస్టులకు ప్రిలిమినరీ పరీక్షలను నవంబర్ లేదా డిసెంబర్ 2026లో నిర్వహిస్తారు. ఆ తర్వాత మెయిన్స్, సింగిల్ లెవెల్ పరీక్షలను డిసెంబర్ 2026 లేదా ఫిబ్రవరి 2027లో నిర్వహించనున్నారు. ఆఫీసర్ పోస్టులకు ఇంటర్వ్యూలు జనవరి లేదా ఫిబ్రవరి 2027లో జరుగుతాయి.

విద్యార్హతలు & వయోపరిమితి:

ఆఫీస్ అసిస్టెంట్ (మల్టీపర్పస్), ఆఫీసర్ స్కేల్-I (అసిస్టెంట్ మేనేజర్) పోస్టులకు గుర్తింపు పొందిన విశ్వవిద్యాలయం నుంచి ఏదైనా విభాగంలో బ్యాచిలర్స్ డిగ్రీ ఉత్తీర్ణులై ఉండటంతో పాటు స్థానిక భాషా పరిజ్ఞానం ఉండాలి. ఆఫీసర్ స్కేల్-II, III పోస్టులకు సంబంధిత విభాగంలో కనీసం 50% మార్కులతో డిగ్రీ/ప్రొఫెషనల్ అర్హతతో పాటు నిర్దేశిత పని అనుభవం అవసరం. సెప్టెంబర్ 1, 2026 నాటికి ఆఫీస్ అసిస్టెంట్ పోస్టుకు 18 నుంచి 28 ఏళ్లు, ఆఫీసర్ స్కేల్-I కు 18 నుంచి 30 ఏళ్లు, స్కేల్-II కు 21 నుంచి 32 ఏళ్లు, స్కేల్-III కు 21 నుంచి 40 ఏళ్ల మధ్య వయస్సు ఉండాలి. ప్రభుత్వ నిబంధనల ప్రకారం ఎస్సీ/ఎస్టీలకు 5 ఏళ్లు, ఓబీసీలకు 3 ఏళ్లు, దివ్యాంగులకు 10 ఏళ్ల గరిష్ట వయోపరిమితి సడలింపు ఉంటుంది.

పోస్టుల వారీగా ఖాళీల వివరాలు..

* ఆఫీస్ అసిస్టెంట్ (మల్టీపర్పస్): 8,183 ఖాళీలు,
* ఆఫీసర్ స్కేల్ 1 (పిఓ): 4,256 ఖాళీలు,
* ఆఫీసర్ స్కేల్ 2 (మేనేజర్): 1,047 ఖాళీలు,
* ఆఫీసర్ స్కేల్ 3 (సీనియర్ మేనేజర్): 220 ఖాళీలు.

దరఖాస్తు రుసుము:

ఆఫీసర్ కేడర్ పోస్టులకు దరఖాస్తు చేసుకునే ఎస్సీ, ఎస్టీ, దివ్యాంగ (PwBD) అభ్యర్థులు రూ. 175 ఫీజు చెల్లించాలి. ఇతర అభ్యర్థులందరికీ ఫీజు రూ. 850 గా నిర్ణయించారు. ఆఫీస్ అసిస్టెంట్ పోస్టుకు ఎస్సీ, ఎస్టీ, దివ్యాంగులు, ఎక్స్-సర్వీస్‌మెన్ అభ్యర్థులు రూ. 175, ఇతరులు రూ. 850 ఆన్‌లైన్ గేట్‌వే ద్వారా మాత్రమే చెల్లించాల్సి ఉంటుంది.

ఎంపిక విధానం:

ఆఫీస్ అసిస్టెంట్ పోస్టులకు ప్రిలిమ్స్, మెయిన్స్ పరీక్షల ద్వారా ఎంపిక చేస్తారు. వీరికి ఇంటర్వ్యూ ఉండదు. ఆఫీసర్ స్కేల్-I పోస్టుకు ప్రిలిమ్స్, మెయిన్స్ లతో పాటు ఇంటర్వ్యూ ఉంటుంది. ఆఫీసర్ స్కేల్-II, III పోస్టులకు సింగిల్ లెవెల్ ఆన్‌లైన్ పరీక్ష, ఇంటర్వ్యూ నిర్వహిస్తారు. ఇక అన్ని ఆబ్జెక్టివ్ పరీక్షల్లో నెగెటివ్ మార్కింగ్ ఉంటుంది. ప్రతి తప్పు సమాధానానికి 0.25 మార్కులు కట్ చేస్తారు. తెలుగు రాష్ట్రాల్లో హైదరాబాద్, కరీంనగర్, ఖమ్మం, వరంగల్, విజయవాడ, విశాఖపట్నం, గుంటూరు, తిరుపతి, కర్నూలు తదితర ప్రధాన నగరాల్లో పరీక్షా కేంద్రాలు ఉంటాయి.

దరఖాస్తు ఎలా చేసుకోవాలంటే..?

అభ్యర్థులు IBPS అధికారిక వెబ్‌సైట్ www.ibps.in సందర్శించి, ‘CRP RRBs XV’ లింక్ ద్వారా ముందుగా బేసిక్ వివరాలతో రిజిస్ట్రేషన్ పూర్తి చేయాలి. ఆ తర్వాత వారు చెప్పిన కొలతల్లో ఫోటోగ్రాఫ్, సంతకం, ఎడమ చేతి బొటనవేలు ముద్ర, హ్యాండ్‌రైటెన్ డిక్లరేషన్, 10వ తరగతి సర్టిఫికెట్‌ను అప్‌లోడ్ చేయాలి. వివరాలన్నీ సరిచూసుకున్న తర్వాత దరఖాస్తు ఫీజు చెల్లించి, భవిష్యత్ అవసరాల కోసం అప్లికేషన్ ఫారమ్ ప్రింటవుట్ కాపీని భద్రపరుచుకోవాలి.