Site icon NTV Telugu

Sydney Attack: ‘అహ్మద్ ఆస్ట్రేలియా హీరో’.. ఆస్పత్రిలో పరామర్శించిన ప్రధాని ఆంథోనీ

Suresh Maddala
Sydney

Sydney

ఆస్ట్రేలియాలోని సిడ్నీ బోండి బీచ్‌లో యూదులు లక్ష్యంగా ఉగ్రవాదులు విచక్షణారహితంగా కాల్పులకు తెగబడ్డారు. అయితే అహ్మద్ అల్ అహ్మద్ అనే వ్యక్తి మాత్రం.. ఉగ్రవాదులతో వీరోచితంగా పోరాడాడు. ఓ వైపు బుల్లెట్లు దూసుకొస్తున్నా… ఏ మాత్రం వెరవకుండా పోరాడాడు. అతడి తెగింపును యావత్తు ప్రపంచమంతా ప్రశంసిస్తోంది. అమెరికా అధ్యక్షుడు ట్రంప్ కూడా అహ్మద్‌ను హీరో అంటూ కొనియాడారు.

ఇది కూడా చదవండి: UN-India: ఒకరిని జైల్లో పెట్టారు.. ఇంకొకరిని అందలం ఎక్కించారు.. పాక్‌పై భారత్ ధ్వజం

తాజాగా ఆస్పత్రిలో చికిత్స పొందుతున్న అహ్మద్ అల్ అహ్మద్‌ను ఆస్ట్రేలియా ప్రధాని ఆంథోనీ అల్బనీస్ పరామర్శించారు. ఇందుకు సంబంధించిన ఫొటోను సోషల్ మీడియాలో పోస్ట్ చేశారు. ‘‘నువ్వు ఆస్ట్రేలియన్ హీరో.’’ అంటూ ప్రశంసించారు. దశాబ్దాల్లో దేశంలో అత్యంత ఘోరమైన తుపాకీ దాడిని ఆపడంలో అసాధారణ ధైర్యసాహసాలను ప్రదర్శించాడంటూ కొనియాడారు. ఆస్ట్రేలియా ప్రజల తరపున ధన్యవాదాలు తెలియజేస్తున్నట్లు పేర్కొన్నారు.

ఇది కూడా చదవండి: Mexico Video: మెక్సికోలో కూలిన విమానం.. ఏడుగురు మృతి

అహ్మద్ అల్ అహ్మద్‌ది సిరియా దేశం. ప్రశాంతంగా జీవితాన్ని గడిపేందుకు ఆస్ట్రేలియా వలస వచ్చి బ్రతుకుతున్నాడు. పండ్ల వ్యాపారం చేస్తున్నాడు. ఆదివారం బోండి బీచ్ దగ్గర ఉగ్రవాదులు కాల్పులు జరుపుతుండగా అడ్డుకున్నాడు. ఈ క్రమంలో అహ్మద్‌కు అనేక గాయాలయ్యాయి. ఎడమ చేతికి ఒక బుల్లెట్, ఎడమ భుజంపై గాయం అయింది. ఇంకా బుల్లెట్‌ను తొలగించలేదు. చేయిను తీసేయాలని చెప్పారు కానీ.. అలాంటిదేమీ జరగలేదు. ప్రస్తుతం అహ్మద్‌కు ప్రపంచ వ్యాప్తంగా సహాయ సహకారాలు.. మద్దతు లభిస్తోంది. బోండి బీచ్ కాల్పుల్లో నిందితుడి సహా 16 మంది మృతి చెందారు. పలువురు గాయపడ్డారు.

Exit mobile version