US-Iran: ఐక్యరాజ్యసమితి సర్వసభ్య సమావేశాల కోసం అమెరికాకు వెళ్లిన ఇద్దరు ఇరాన్ దౌత్యవేత్తల్ని ఆ దేశం బహిష్కరించింది. సర్వసభ్య సమావేశాలు ముగిసిన తర్వాత అమెరికా విడిచి వెళ్లిపోవాలని అమెరికా విదేశాంగ శాఖ వారిని ఆదేశించింది. ఈ ఆదేశాలను ధిక్కరించిన కారణంగా ఇద్దరు దౌత్యవేత్తల్న ట్రంప్ సర్కార్ బహిష్కరించింది. ఒక దౌత్యవేత్త శుక్రవారం అమెరికా విడి వెళ్లగా, మరొకరు శనివారం యూఎస్ నుంచి బయటకు వెళ్లినట్లు అమెరికా అధికారి తెలిపారు. అమెరికా విదేశాంగ మంత్రి మార్కో రూబియో ఈ విషయంలో చాలా కఠినంగా వ్యవహరించాలని సదరు అధికారి వెల్లడించారు.
అమెరికా, ఇరాన్ మధ్య దౌత్యపరమైన చర్చలు నిలిచిపోయిన తర్వాత ఈ పరిణామం చోటుచేసుకుంది. UNGA సమావేశాల సందర్భంగా ఇరు దేశాల మధ్య పరోక్ష చర్చలు జరిగినప్పటికీ పురోగతి కనిపించలేదు. ఆ తర్వాతే ఇరాన్ ప్రతినిధి బృందాన్ని అమెరికా విడిచి వెళ్లాలని రూబియో ఆదేశించినట్లు అమెరికా వర్గాలు వెల్లడించాయి.
ఇదిలా ఉంటే, అమెరికా చర్యల్ని ఇరాన్ ఖండించింది. తమ దౌత్యవేత్తలు నిర్ణయించిన షెడ్యూల్ ప్రకారమే న్యూయార్క్ నుంచి బయలుదేరినట్లు చెప్పింది. ఆ షెడ్యూల్‌ను సెప్టెంబర్ 17నే అమెరికా స్టేట్ డిపార్ట్‌మెంట్‌కు తెలియజేశామని తెలిపింది. అమెరికా చెబుతున్న బహిష్కరణ కథనాలను ఇరాన్ ఖండించింది.