రష్యాలోని దక్షిణ మాస్కోలో కారు బ్లాస్టింగ్ జరిగింది. ఈ ఘటనలో సీనియర్ రష్యన్ లెఫ్టినెంట్ జనరల్ ఫనిల్ సర్వరోవ్ ప్రాణాలు కోల్పోయారు. కారు కింద ఒక పేలుడు పరికరం ఉండడం వల్లే ఈ పేలుడు సంభవించినట్లుగా తెలుస్తోంది. అయితే దీని వెనుక ఉక్రెయిన్ హస్తం ఏదైనా ఉందా? అన్న కోణంలో రష్యన్ అధికారులు దర్యాప్తు చేస్తున్నారు.
దక్షిణ మాస్కోలో సోమవారం ఒక సీనియర్ రష్యన్ సైనిక అధికారి తన కారు కింద పేలుడు పరికరం పేలి మరణించారని రష్యన్ అధికారులు తెలిపారు. ఉక్రెయిన్ యుద్ధం ప్రారంభమైనప్పటి నుంచి సైనిక వ్యక్తులపై జరుగుతున్న ఉన్నత స్థాయి దాడుల్లో ఇదొక సంఘటన అని పేర్కొన్నారు. హత్య కోణంలో దర్యాప్తు చేస్తున్నట్లు అధికారులు వెల్లడించారు. ఉక్రెయిన్ నిఘా వర్గాల ద్వారానే ఈ దాడి జరిగినట్లుగా భావిస్తున్నట్లు దర్యాప్తు కమిటీ అధికారిక ప్రతినిధి స్వెత్లానా పెట్రెంకో అన్నారు.
ప్రాథమిక నివేదిక ప్రకారం.. మాస్కోలోని యాసెనెవో జిల్లాలో వాహనం కదలడం ప్రారంభించిన కొద్దిసేపటికే పేలిపోయింది. ఇంప్రూవైజ్డ్ ఎక్స్ప్లోజివ్ పరికరం కారణంగా ఈ పేలుడు సంభవించింది. ఈ ప్రమాదంలో సర్వరోవ్ అక్కడికక్కడే మరణించాడు. అయితే ఈ ఘటనకు ఇప్పటి వరకు ఎవరూ బాధ్యత వహించలేదు.
ప్రస్తుతం రష్యా-ఉక్రెయిన్ మధ్య శాంతి చర్చలు జరుగుతున్నాయి. ఇలాంటి తరుణంలో సైన్యాధికారి మరణించడం తీవ్ర కలకలం రేపుతోంది. మరోసారి రెండు దేశాల మధ్య ఉద్రిక్తతలు తలెత్తే పరిస్థితులు నెలకొననున్నాయి.
