రష్యా-ఉక్రెయిన్ మధ్య గత నాలుగేళ్లుగా యుద్ధం జరుగుతోంది. రెండు దేశాలు పరస్పరం దాడులు చేసుకుంటూనే ఉన్నాయి. ఇప్పటికే ఇరు దేశాల్లో భారీగా ఆస్తి, ప్రాణ నష్టం జరిగింది. కానీ యుద్ధం మాత్రం ఆగడం లేదు. ట్రంప్ రెండోసారి అధికారంలోకి వచ్చాక శాంతి ప్రయత్నాలు చేసినా ప్రయోజనం లేకుండా పోయింది. నేటికీ భీకర దాడులు చేసుకుంటూనే ఉన్నాయి.
అయితే తాజాగా ఒక సంచలన విషయం వెలుగులోకి వచ్చింది. దేశం కోసం ఎంతో నమ్మకంగా ఉండాల్సిన ఓ రష్యా సైనికుడు దేశ ద్రోహానికి పాల్పడినట్లుగా అంతర్జాతీయ కథనం వచ్చింది. అతగాడి నమ్మక ద్రోహం కారణంగా 300 మంది రష్యా సైనికుల ప్రాణాలు పోవడానికి కారకుడు అయినట్లుగా ది వాల్ స్ట్రీట్ జర్నల్ కథనం పేర్కొంది. 26 ఏళ్ల లెఫ్టినెంట్ లెవ్ స్టుప్నికోవ్.. ఉక్రెయిన్‌కు రహస్య సైనిక సమాచారం అందించడం కారణంగా ఈ మారణహోమం జరిగినట్లుగా తెలుస్తోంది.
గూఢచారి స్టుప్నికోవ్
రష్యా సైన్యంలో కీలక బాధ్యతలు నిర్వహించిన స్టుప్నికోవ్‌కు సైనికుల కదలికలు, ఆపరేషన్ ప్రణాళికలు, నిఘా డ్రోన్లు, కెమెరాల నుంచి అందే సమాచారం తెలుసుకునే అవకాశం ఉండేది. ఈ సమాచారాన్ని రహస్యంగా ఉక్రెయిన్ సైనిక నిఘా విభాగానికి చేరవేసినట్లు నివేదిక పేర్కొంది. అనంతరం రష్యా సైనిక విభాగం నుంచి తప్పించుకుని ఉక్రెయిన్‌కు చేరిన ఆయన.. పుతిన్ ప్రభుత్వానికి వ్యతిరేకంగా పోరాడుతున్న ఓ రష్యన్ వాలంటీర్ యూనిట్‌లో చేరినట్లు తెలిపింది. అయితే ఈ నిర్ణయం ఆయన వ్యక్తిగత జీవితంపైనా ప్రభావం చూపింది. స్టుప్నికోవ్ భార్య లిజాతో ఆయనకు సంబంధాలు దెబ్బతిన్నాయి. తన దేశానికి, తమ వివాహ బంధానికి ఆయన ద్రోహం చేశారని ఆమె ఆరోపించినట్లు కథనం వెల్లడించింది.
స్టుప్నికోవ్ బుడ్యోన్నీ మిలిటరీ అకాడమీ ఆఫ్ ది సిగ్నల్ కార్ప్స్‌లో చదువుకున్నారు. ఆ తర్వాత డాన్‌బాస్ ప్రాంతంలోని వ్యూహాత్మక పట్టణం వుహ్లేదార్‌ను స్వాధీనం చేసుకునేందుకు నియమించిన రష్యా బెటాలియన్‌లో చీఫ్ సిగ్నల్స్ ఆఫీసర్‌గా బాధ్యతలు చేపట్టారు. కమాండర్లు, ముందు వరుసలోని సైనిక విభాగాల మధ్య సమాచార వ్యవస్థను నిర్వహించడం, నిఘా వ్యవస్థల నుంచి అందే సమాచారాన్ని వారికి చేరవేయడం ఆయన విధుల్లో భాగం. అయితే ఈ బాధ్యతలను ఉపయోగించుకుని రష్యా సైనికుల స్థానాలు, వారి కదలికలు, రాబోయే ఆపరేషన్ల వివరాలను ఉక్రెయిన్‌కు అందించినట్లు నివేదిక పేర్కొంది. తూర్పు ఉక్రెయిన్‌లో ఓ రాత్రి స్టుప్నికోవ్ కడుపునొప్పి వచ్చినట్లు నటించి తన తోటి సైనికుల నుంచి దూరంగా వెళ్లినట్లు కథనం తెలిపింది. కొద్దిసేపటికే ఆయన అందించిన కోఆర్డినేట్ల ఆధారంగా ఉక్రెయిన్ క్షిపణి దాడులు జరిగాయని పేర్కొంది. ఈ దాడిలో కల్నల్ గుసేన్ ముసాయేవ్ సహా 68 మంది రష్యా సైనికులు మరణించగా, మరో 60 మంది గాయపడినట్లు నివేదిక వెల్లడించింది. ముసాయేవ్ ఉక్రెయిన్ లక్ష్యంగా పెట్టుకున్న కీలక వ్యక్తుల్లో ఒకరని కూడా కథనం పేర్కొంది. దాడి అనంతరం ఉక్రెయిన్‌కు చెందిన ఓ పరిచయస్తుడు స్టుప్నికోవ్‌కు సందేశం పంపినట్లు కథనం తెలిపింది. పేలుళ్లు జరిగాయా? ఫొటో పంపించు అని అడగ్గా.. అక్కడ పరిస్థితిని వివరిస్తూ ఆయన “అక్కడ అంతా మాంసపు ముద్దలే” అని సమాధానమిచ్చినట్లు నివేదిక పేర్కొంది.
2022 ఫిబ్రవరిలో రష్యా ఉక్రెయిన్‌పై పూర్తిస్థాయి దండయాత్ర ప్రారంభించినప్పుడు స్టుప్నికోవ్ ఆ దృశ్యాలను చూసి తీవ్రంగా కలత చెందినట్లు తెలిపాడు. ఉక్రెయిన్ నగరాలపై రష్యా హెలికాప్టర్లు ఎగరడం, బాంబు దాడులు జరగడం వంటి దృశ్యాలు తనను దిగ్భ్రాంతికి గురిచేశాయని పేర్కొన్నాడు. “వారు అమాయక పౌరులపై బాంబులు వేస్తున్నారు. అది దుష్ట చర్య” అని ఆయన వ్యాఖ్యానించినట్లు కథనం వెల్లడించింది. యుద్ధం కారణంగా ఉక్రెయిన్ ప్రజలు తీవ్ర ఇబ్బందులు ఎదుర్కొంటుంటే.. తన తోటి సైనికులు మాత్రం సాధారణ రోజువారీ పనులు కొనసాగించడం ఆయనకు అర్థం కాలేదని నివేదిక తెలిపింది. ఇంట్లో భార్య లిజాతో కలిసి రష్యా ప్రతిపక్ష నాయకుల వీడియోలు, ఉక్రెయిన్ బందీలుగా ఉన్న రష్యా యుద్ధ ఖైదీల ఇంటర్వ్యూలను చూసేవాడని కథనం పేర్కొంది. మిలిటరీ అకాడమీలో కూడా తనలాగే ఆలోచించే కొందరు క్యాడెట్లు ఉండేవారని స్టుప్నికోవ్ గుర్తుచేసుకున్నాడు. తమ అభిప్రాయాలను బహిరంగంగా చెప్పలేకపోయినా, ఒకరినొకరు చూసుకునే చూపుల్లోనే తమ ఆలోచనలను అర్థం చేసుకునేవారని తెలిపాడు. కొందరు అకాడమీని విడిచిపెట్టేందుకు ప్రయత్నించినప్పటికీ, వారి అభ్యర్థనలు నెలల తరబడి పెండింగ్‌లో ఉండేవని పేర్కొన్నాడు.
స్టుప్నికోవ్ తల్లి టటియానా యాంట్‌సెన్ కూడా పుతిన్ ప్రభుత్వాన్ని వ్యతిరేకించేవారని కథనం తెలిపింది. 49 ఏళ్ల ఆమె గతంలో రష్యా అధ్యక్షుడికి వ్యతిరేకంగా జరిగిన నిరసనల్లో పాల్గొన్నట్లు పేర్కొంది. 2024 ఫిబ్రవరిలో తన కుమారుడు యుద్ధరంగంలో విధులు నిర్వహించడం ప్రారంభించిన మూడు నెలల తర్వాత టటియానా డిమిత్రో కర్పెంకో అనే కంప్యూటర్ ప్రోగ్రామర్‌ను సంప్రదించారు. కర్పెంకో ఉక్రెయిన్ సైనిక నిఘా విభాగంతో కలిసి పనిచేస్తూ, ఎన్‌క్రిప్టెడ్ మెసేజింగ్ యాప్‌ల ద్వారా రష్యా నుంచి సమాచారాన్ని సేకరించే నెట్‌వర్క్‌ను నిర్వహిస్తున్నట్లు నివేదిక వెల్లడించింది. ఉక్రెయిన్ యుద్ధ ఖైదీలుగా ఉన్న రష్యా సైనికులతో వీడియో ఇంటర్వ్యూలను యూట్యూబ్‌లో ప్రచురించడం ద్వారా కూడా కర్పెంకో గుర్తింపు పొందినట్లు కథనం పేర్కొంది.
రష్యా సైనికుల్లో కొందరు తమ ఇళ్లకు తిరిగి వచ్చిన తర్వాత ఆయనను సంప్రదించి, డబ్బుకు బదులుగా సైనిక సమాచారాన్ని అందించేందుకు ముందుకొచ్చినట్లు నివేదిక తెలిపింది. 2023 అక్టోబర్‌లో ఉక్రెయిన్‌కు సహాయపడే సమాచారాన్ని అందించే రష్యా సైనికులకు 2.5 లక్షల రూబుళ్లు (సుమారు 2,700 డాలర్లు) చెల్లిస్తామని కర్పెంకో ప్రకటించినట్లు పేర్కొంది. స్టుప్నికోవ్‌ను రష్యా సైనిక విభాగం నుంచి బయటకు తీసుకురావడంలోనూ ఈ నెట్‌వర్క్ కీలక పాత్ర పోషించినట్లు కథనం వెల్లడించింది. ఎన్‌క్రిప్టెడ్ యాప్‌ల ద్వారా స్టుప్నికోవ్, కర్పెంకో, ఉక్రెయిన్ స్కౌట్లు పరస్పరం సంప్రదించుకుంటూ ప్రమాదకరమైన యుద్ధరేఖను దాటే మార్గాన్ని సిద్ధం చేసుకున్నట్లు తెలిపింది.
2024 జూలైలో స్టుప్నికోవ్ రాత్రి సమయంలో రష్యా సైనిక విభాగం నుంచి ఎవరికీ తెలియకుండా బయటకు వెళ్లినట్లు నివేదిక పేర్కొంది. అక్కడి నుంచి ఉత్తరం వైపు ప్రయాణిస్తూ ఉక్రెయిన్ సైనికుల స్థానాల దిశగా వెళ్లాడు. భూగర్భ బంకర్‌లో ఉన్న ఉక్రెయిన్ సైనికులు ప్రత్యక్ష వీడియో ఫీడ్ ద్వారా ఆయన కదలికలను గమనించినట్లు కథనం తెలిపింది. సుమారు 40 నిమిషాల తర్వాత ఉక్రెయిన్ 72వ బ్రిగేడ్ సైనికులు ఉన్న చెట్ల ప్రాంతానికి ఆయన చేరుకున్నాడు. రష్యా సైనిక దుస్తుల్లో తమవైపు వస్తున్న వ్యక్తిని చూసిన ఉక్రెయిన్ సైనికులు అప్రమత్తమయ్యారు. ఒక బంకర్ నుంచి తుపాకులు గురిపెట్టి.. “పాస్‌వర్డ్ ఏమిటి?” అని ప్రశ్నించారు. ముందుగా నిర్ణయించుకున్న సంకేత పదమైన ‘పీనట్ షాప్’ అని స్టుప్నికోవ్ సమాధానం ఇచ్చినట్లు నివేదిక వెల్లడించింది. అనంతరం ఉక్రెయిన్ సైనికులు ఆయనను తమ అదుపులోకి తీసుకున్నారు. ఆ తర్వాత పుతిన్ ప్రభుత్వానికి వ్యతిరేకంగా ఉక్రెయిన్‌తో కలిసి పోరాడుతున్న రష్యన్ వాలంటీర్ కార్ప్స్‌ (RVC)లో చేరినట్లు కథనం పేర్కొంది. ప్రస్తుతం ఆయన కమ్యూనికేషన్స్ స్పెషలిస్టుగా పనిచేస్తున్నట్లు నివేదిక తెలిపింది.
2025 ఫిబ్రవరిలో స్టుప్నికోవ్ తల్లి, సోదరి మోల్డోవా మీదుగా ఉక్రెయిన్‌కు వెళ్లేందుకు ప్రణాళిక రూపొందించినట్లు కథనం వెల్లడించింది. ఒక్కొక్కరు ఓ బ్యాగ్, ఓ సూట్‌కేస్ సర్దుకుని.. అక్కడి నుంచి కాలినడకన ఉక్రెయిన్‌లోకి ప్రవేశించి కర్పెంకోను కలవాలని భావించినట్లు పేర్కొంది. ఇదే సమయంలో స్టుప్నికోవ్ బతికే ఉన్నాడా? అతడిని లొంగిపోయేలా ఒప్పించగలరా? అనే విషయాలపై రష్యా సైనిక అధికారులు టటియానాకు పలుమార్లు ఫోన్ చేసినట్లు నివేదిక తెలిపింది. అయితే తన కుమారుడి ఆచూకీ కనుగొనాల్సిన బాధ్యత అధికారులదేనని ఆమె వారికి చెప్పినట్లు కథనం పేర్కొంది.
దాదాపు ఏడాది తర్వాత స్టుప్నికోవ్ తన అనుభవాలను కర్పెంకోకు ఇచ్చిన రెండు గంటల వీడియో ఇంటర్వ్యూలో వివరించినట్లు నివేదిక తెలిపింది. దీంతో ఆయన రష్యా సైన్యాన్ని వీడిన తీరు, ఉక్రెయిన్‌కు అందించినట్లు ఆరోపణలున్న రహస్య సమాచారం మరోసారి చర్చలోకి వచ్చాయి. మిలిటరీ అకాడమీలో దాదాపు పదేళ్ల క్రితం తాను చేసిన ప్రమాణానికి అనుగుణంగానే వ్యవహరించానని స్టుప్నికోవ్ అభిప్రాయపడ్డాడు. తన దేశ స్వేచ్ఛ, స్వాతంత్ర్యం, రాజ్యాంగ వ్యవస్థను కాపాడతానని ప్రమాణం చేశానని గుర్తుచేసుకున్నాడు.