Earthquake: భూకంపాల దెబ్బకు ఉలిక్కిపడ్డ రెండు దేశాలు.. జపాన్, వెనిజులాలో కలకలం

గత 24 గంటల్లో ప్రపంచంలోని రెండు వేర్వేరు ప్రాంతాల్లో భారీ భూకంపాలు సంభవించాయి. గురువారం ఉత్తర జపాన్‌లో 6.9 తీవ్రతతో భూకంపం నమోదవగా, బుధవారం వెనిజులాలో 7.1 తీవ్రతతో భూకంపం సంభవించింది. జపాన్‌లో ఎటువంటి పెద్ద నష్టం జరగకపోయినా, వెనిజులా రాజధాని కారకాస్‌లో భయాందోళనలు నెలకొన్నాయి.

జపాన్‌లో 6.9 తీవ్రతతో భూకంపం

జపాన్ వాతావరణ సంస్థ (JMA) ప్రకారం, గురువారం ఉత్తర జపాన్‌లోని ఇవాటే ప్రాంతానికి సమీపంలో 50 కిలోమీటర్ల లోతులో భూకంప కేంద్రంతో 6.9 తీవ్రత గల భూకంపం సంభవించింది. కానీ సునామీ హెచ్చరికలు జారీ చేయలేదు. హషికామి పట్టణం ఈ భూకంప ప్రభావానికి ఎక్కువగా గురైనప్పటికీ, పెద్దగా ఆస్తి నష్టం లేదా ప్రాణనష్టం జరిగినట్లు సమాచారం లేదు. ఏఎఫ్‌పీతో మాట్లాడిన ఒక స్థానిక మహిళ, భూకంపం బలంగా అనిపించినప్పటికీ తన ఇంట్లో ఒక ఫోటో ఫ్రేమ్ పడిపోవడం మినహా ఎటువంటి నష్టం జరగలేదని తెలిపారు.

వెనిజులాలో 7.1 తీవ్రతతో భూకంపం

వెనిజులాలో బుధవారం సాయంత్రం నిమిషాల వ్యవధిలో రెండు శక్తివంతమైన భూకంపాలు సంభవించి దేశాన్ని వణికించాయి. ఈ ప్రకంపనలతో రాజధాని కారకాస్‌లో పలు భవనాలు దెబ్బతినగా, ప్రజలు భయంతో ఇళ్లను, కార్యాలయాలను వదిలి వీధుల్లోకి పరుగులు తీశారు. అనంతర ప్రకంపనల భయంతో అనేక మంది రాత్రంతా బయటే గడిపినట్లు అధికారులు తెలిపారు. అమెరికా భూగర్భ శాస్త్ర సర్వే (USGS) ప్రకారం, మొదటి భూకంపం 7.1 తీవ్రతతో నమోదైంది. అనంతరం కొన్ని నిమిషాల వ్యవధిలోనే 7.5 తీవ్రతతో మరో భారీ భూకంపం సంభవించింది. ఈ వరుస ప్రకంపనల నేపథ్యంలో యూఎస్ పసిఫిక్ సునామీ హెచ్చరిక కేంద్రం ప్యూర్టో రికో, వర్జిన్ దీవుల ప్రాంతాలకు సునామీ హెచ్చరికలు జారీ చేసింది.

మొదటి భూకంపం వెనిజులా కరేబియన్ తీరంలోని మోరోన్ నగరానికి సమీపంలో, కారకాస్‌కు సుమారు 168 కిలోమీటర్ల దూరంలో 13 కిలోమీటర్ల లోతులో సంభవించినట్లు USGS వెల్లడించింది. అనంతరం మోరోన్‌కు 16 కిలోమీటర్ల దూరంలో, 10 కిలోమీటర్ల లోతులో రెండో భూకంపం నమోదైంది.

భూకంపం సంభవించిన వెంటనే కారకాస్‌లో ప్రజలు భవనాల నుంచి బయటకు పరుగులు తీశారు. కొన్ని ప్రాంతాల్లో గోడలు కూలిపోవడం, గృహోపకరణాలు వీధుల్లో చెల్లాచెదురుగా పడిపోవడం కనిపించింది. నగరంలోని కొన్ని ప్రధాన వాణిజ్య ప్రాంతాల్లో భారీ దుమ్ము మేఘాలు ఎగసిపడటంతో పరిస్థితి మరింత భయానకంగా మారింది. కారకాస్‌లోని అల్టమీరా ప్రాంతంలో పరిస్థితి అత్యంత తీవ్రంగా ఉందని వెనిజులా అంతర్గత వ్యవహారాల మంత్రి డియోస్డాడో కాబెయో తెలిపారు. ఇప్పటికే దెబ్బతిన్న భవనాలు అనంతర ప్రకంపనలతో మరింత ప్రమాదకరంగా మారే అవకాశం ఉన్నందున ప్రజలు ఇళ్లలోకి తిరిగి వెళ్లవద్దని ఆయన హెచ్చరించారు.

ఈ ఘటనలో కొంతమంది గాయపడినట్లు సమాచారం అందిందని, అంబులెన్సులు, అత్యవసర సేవల వాహనాలకు ప్రజలు మార్గం కల్పించాలని మంత్రి విజ్ఞప్తి చేశారు. ప్రభుత్వం సహాయక, రెస్క్యూ చర్యలను వేగవంతంగా కొనసాగిస్తోందని తెలిపారు. పిల్లలు, వృద్ధుల భద్రతకు ప్రాధాన్యత ఇవ్వాలని, కుటుంబ సభ్యులు పరస్పరం సంప్రదించుకుంటూ ఎవరూ సహాయం లేకుండా మిగలకుండా చూసుకోవాలని అధికారులు సూచించారు.

వరుసగా సంభవించిన ఈ రెండు భారీ భూకంపాలు కారకాస్‌తో పాటు పలు ప్రాంతాల్లో గణనీయమైన నష్టాన్ని కలిగించాయి. అనంతర ప్రకంపనల ముప్పు ఇంకా కొనసాగుతున్నందున ప్రజలు అప్రమత్తంగా ఉండాలని అధికారులు హెచ్చరిస్తున్నారు.