Hindus: అమెరికాలో విద్యాధికులు హిందువులే..

Hindus: అమెరికాలో అత్యధిక విద్యావంతులు హిందువులే అని తాజా అధ్యయనం ఒకటి వెల్లడించింది. మతాలపై చేసిన సర్వేలో ఈ విషయం వెల్లడైంది. ప్యూ రీసెర్చ్ సెంటర్ (Pew Research Center) ఇటీవల విడుదల చేసిన ‘2023-24 రిలిజియస్ ల్యాండ్‌స్కేప్ స్టడీ’లో అమెరికాలో వివిద మతాల విద్యాస్థాయిలపై ఆసక్తికరమైన గణాంకాలు వెల్లడయ్యాయి. జూలై 17, 2023 నుంచి మార్చి 4, 2024 మధ్యలో మొత్తం 36,908 మంది అమెరికన వయోజనుల నుంచి సేకరించిన డేటా ఆధారంగా ఈ నివేదిక వెల్లడైంది.

అమెరికా సగటుతో పోలిస్తే, ఆ దేశంలో ఉన్న హిందువులు బ్యాచిలర్ డిగ్రీ, అంతకన్నా ఎక్కువ విద్యను పూర్తి చేస్తున్నారు. హిందువులు 70 శాతం, యూదులు 65 శాతంతో ముందు వరసలో ఉన్నారు. యూఎస్‌లోని ప్రతీ 10 మంది హిందువుల్లో ఏడుగురు బ్యాచిలర్ డిగ్రీ లేదా అంతకన్నా ఎక్కువ విద్యను కలిగి ఉన్నారు. యూఎస్ సగటు చూస్తే ఇది 35 శాతం మాత్రమే ఉంది.

Read Also: Jowar Recipes: “జొన్న గుగ్గిళ్లు” ట్రై చేయండి.. వెయిట్ లాస్, షుగర్ కంట్రోల్‌కు బెస్ట్ రెసిపీ..

అమెరికా సగటు కన్నా ఎక్కువ విద్యను కలిగి ఉన్న మతాల్లో ముస్లింలు, బౌద్ధులు, ఆర్థడాక్స్ క్రిస్టియన్స్ ఉన్నారు. ప్రధాన ప్రొటెస్టంట్ క్రైస్తవులు కూడా జాతీయ సగటు కన్నా ఎక్కువగా ఉన్నట్లు తేలింది. ఇక ఎవాంజెలికల్ ప్రొటెస్టంట్స్, క్యాథలిక్కులు, బ్లాక్ ప్రొటెస్టంట్స్‌ల గ్రాడ్యుయేట్ల వాటా జాతీయ సగటు కన్నా తక్కువగా ఉందని అధ్యయనం తెలిపింది.

ఈ విద్యా వ్యత్యాసాలకు ప్రధానంగా వలస విధానం కారణమని నివేదిక తెలిపింది. హిందువులు, ముస్లింలు, బౌద్ధులలో చాలా మంది ఉన్నత విద్యా, స్కిల్డ్ వర్కర్ వీసాలు(H-1B వంటివి) ద్వారా అమెరికా వెళ్లారు. దీనివల్ల ఆయా కమ్యూనిటీల్లో సహజంగా విద్యావంతుల సంఖ్య ఎక్కువగా ఉంది. అమెరికా మొత్తం జనాభాలో క్రైస్తవులు దాదాపుగా 70 శాతం ఉండగా, యూదులు 2 శాతం, ముస్లింలు 1.3 శాతం, హిందువులు 1 శాతంలోపే ఉన్నారు. అయినప్పటికీ వీరంతా విద్యాపరంగా ముందంజలో ఉన్నారు.