Love: ప్రేమ ఈ భావన మానవ సంబంధాలను సరికొత్త స్థాయికి తీసుకెళ్తుంది. అయితే, ఈ ప్రేమ అనే భావన మానవ మెదడులోని ఏ భాగాలను ప్రభావితం చేస్తుందనే విషయాలపై శాస్త్రవేత్తలు అధ్యయనంలో కీలక విషయాలను తెలుసుకున్నారు. ప్రేమ అనే భావన మెదడులోని వివిధ భాగాలను ప్రేరేపితం చేస్తుందని తెలిసింది. అయితే, ఈ ప్రేమ అనేది వివిధ సందర్భాల్లో ఒక్కో విధంగా ఉంటుంది. తల్లిదండ్రుల మీద ప్రేమ, ప్రకృతి మీద ప్రేమ, జీవిత భాగస్వామితో రొమాంటిక్ రిలేషన్లో ఏర్పడే ప్రేమ, పెంపుడు జంతువులు ఇలా చాలా రకాల ప్రేమలు మెదడులోని పలు భాగాల్లో వెలుగులు తెస్తాయని తేలింది.
ఫిన్లాండ్లోని ఆల్టో యూనివర్సిటీ పరిశోధకులు మెదడు కార్యకలాపాలను కొలవడానికి ఫంక్షనల్ మాగ్నెటిక్ రెసొనెన్స్ ఇమేజింగ్ (ఎఫ్ఎమ్ఆర్ఐ)ని ఉపయోగించారు. ఆరు విభిన్న రకాల ప్రేమలకు సంబంధించి ప్రయోగాలు చేశారు. తత్వవేత్త, పరిశోధకురాలు అయిన పార్టిలి రిన్నే ఈ అధ్యయనానికి నేతృత్వం వహించారు. ప్రేమ యొక్క క్రియాశీలత మెదడులోని బేసల్ గాంగ్లియా, నుదిటి మధ్యరేఖ, ప్రిక్యూనియస్ మరియు తల వెనకవైపు ఉన్న టెంపోరోపారిటల్ జంక్షన్లోని సోషల్ సిచ్యువేషన్లలో ఏర్పడుతుందని ఆమె చెప్పారు.
Read Also: Paralympics 2024: అరంగేట్రంలోనే అదరగొట్టిన భారత పారా అథ్లెట్.. ప్రపంచ రికార్డుకు చేరువగా..!
తల్లిదండ్రుల ప్రేమ స్ట్రియాటమ్ ప్రాంతంలో మెదడు యొక్క రివార్డ్ సిస్టమ్లో లోతైన క్రియాశీలతని కలిగి ఉంది. మరే రకమైన ప్రేమలో ఇలా కనిపించలేదని రిన్నే చెప్పారు. మెదడు కార్యకలాపాలు ప్రేమించే వస్తువు యొక్క సాన్నిహిత్యం ద్వారా మాత్రమే కాకుండా, అది మానవుడా లేదా మరొక జాతి లేదా ప్రకృతి ద్వారా కూడా ప్రభావితమవుతుందని పరిశోధన కనుగొంది.
అపరిచితుల పట్ల దయతో కూడిన ప్రేమ, ఇతర సన్నిహిత సంబంధాలలో ప్రేమ కంటే తక్కువ మెదడు క్రియాశీలతను కలిగిస్తుంది. ప్రకృతిపై ప్రేమ మెదడు యొక్క రివార్డ్ సిస్టమ్ మరియు విజువల్ ఏరియాలను ప్రభావితం చేస్తుంది. పెంపుడు జంతువులు లేదా ప్రకృతి పట్ల ప్రేమకు భిన్నంగా మానవుల లేదా వ్యక్తుల మధ్య ప్రేమ మెదడుపై ప్రభావం చూపించే దానిలో తేడాలు ఉన్నట్లు పరిశోధకులు గుర్తించారు.
