Italy Earthquake: ఇటలీలో భారీ భూకంపం.. రిక్టర్ స్కేలుపై 6.1 తీవ్రత

దక్షిణ ఇటలీ తీర ప్రాంతంలో మంగళవారం ఉదయం బలమైన భూకంపం సంభవించింది. జర్మన్ రీసెర్చ్ సెంటర్ ఫర్ జియోసైన్సెస్ (GFZ) వెల్లడించిన వివరాల ప్రకారం, భూకంపం రిక్టర్ స్కేలుపై 6.1 తీవ్రతతో నమోదైంది. భూకంప కేంద్రం భూమి ఉపరితలం నుంచి సుమారు 253 కిలోమీటర్ల (157 మైళ్లు) లోతులో ఉన్నట్లు GFZ పేర్కొంది. భూకంపం తీవ్రంగా నమోదైనప్పటికీ, ఇప్పటివరకు ప్రాణనష్టం లేదా ఆస్తి నష్టం జరిగినట్లు ఎలాంటి అధికారిక నివేదికలు వెలువడలేదు.

భూకంపం కారణంగా సమీప ప్రాంతాల ప్రజలు ఒక్కసారిగా భయాందోళనలకు గురయ్యారు. అయితే, భూకంప కేంద్రం అత్యంత లోతులో ఉండటం వల్ల ఉపరితలంపై ప్రభావం పరిమితంగా ఉండే అవకాశం ఉందని నిపుణులు అభిప్రాయపడుతున్నారు. స్థానిక అధికారులు పరిస్థితిని నిరంతరం పర్యవేక్షిస్తూ, ఎలాంటి అత్యవసర పరిస్థితులు తలెత్తినా వెంటనే స్పందించేందుకు సిద్ధంగా ఉన్నట్లు తెలిపారు.