Iran War: ముంచుకొస్తున్న ‘‘మూడో ప్రపంచ యుద్ధం’’.. నాటో దేశాలపై ఇరాన్ దాడి.

Iran War: మధ్యప్రాచ్యంలో జరుగుతున్న ఇరాన్ యుద్ధం, ప్రపంచ యుద్ధంగా మారే అవకాశం ఉందా.? అంటే అందుకు ఔననే సమాధానాలే వస్తున్నాయి. ఈ యుద్ధం కేవలం అమెరికా,ఇజ్రాయిల్, ఇరాన్ మధ్యే ఉండకుండా మిడిల్ ఈస్ట్‌లోని అన్ని ప్రాంతాలకు విస్తరించింది. ఇరాన్ గల్ఫ్ లోని సౌదీ అరేబియా, కువైట్,బహ్రైయిన్, ఖతార్, యూఏఈ, ఒమన్ వంటి దేశాలపై దాడులు చేస్తోంది. ఈ దేశాల్లో చమురు, గ్యాస్ క్షేత్రాలతో పాటు యూఎస్ మిలిటరీ బేసుల్ని టార్గెట్ చేస్తోంది.

ఇదిలా ఉంటే, గత 48 గంటల్లో ఇరాన్, దాని మిత్రదేశాల మిలీషియా గ్రూపులు మూడు నాటో సభ్య దేశాలపై దాడులు చేయడం సంచలనంగా మారింది. ఫ్రాన్స్, ఇటలీ, టర్కీకి చెందిన సైనిక స్థావరాలే లక్ష్యంగా ఇరాన్ దాడులు చేసింది. ఈ దాడులు ప్రాంతీయ ఉద్రిక్తతల్ని పెంచడంతో పాటు నాటో దేశాలను ఈ యుద్ధంలోకి ఆకర్షిస్తున్నాయి. ఇది జరిగితే యుద్ధం ‘‘మూడో ప్రపంచ యుద్ధం’’గా మారిన ఆశ్చర్యపోనక్కర లేదు.

ఫ్రెంచ్ సైనిక స్థావరంపై దాడి:

ఇరాక్‌లోని ఎర్బిల్ సమీపంలో అత్యంత తీవ్రమైన సంఘటన జరిగింది. ఇరాన్ మద్దతుగల మిలీషియాల డ్రోన్ దాడిలో ఒక ఫ్రెంచ్ సైనికుడు మరణించాడు. ఫ్రెంచ్ సైన్యం ప్రకారం, సైనికులు ఎర్బిల్ నుండి 40 కిలోమీటర్ల దూరంలో ఉన్న ఒక శిక్షణా కేంద్రంలో ISIS కు వ్యతిరేకంగా పోరాడటానికి కుర్దిష్ దళాలకు శిక్షణ ఇస్తున్నారు.

ఈ దాడిలో ఫ్రెంచ్ ఆర్మీ అధికారి ఆర్నో ఫ్రెయిన్ మరణించగా, కనీసం ఆరుగురు సైనికులు గాయపడినట్లు సమాచారం. ఈ సంఘటన తర్వాత, ఫ్రెంచ్ అధ్యక్షుడు ఇమ్మాన్యుయేల్ మాక్రాన్ తీవ్రంగా స్పందించి, ఉగ్రవాదంపై పోరాడుతున్న సైనికులపై దాడులు ఆమోదయోగ్యం కాదని, బాధ్యులను జవాబుదారీగా ఉంచాలని అన్నారు.

ఇటలీ స్థావరంపై కూడా దాడి:

ఇరాక్‌లోని ఎర్బిల్‌లోని మరో సైనిక స్థావరాన్ని కూడా ఇరాన్ లక్ష్యంగా చేసుకుంది. ఇక్కడ ఇటాలియన్ దళాలు ఉన్నాయి. ఇరాన్ క్షిపణి దాడిలో స్థావరం సమీపంలో పేలుళ్లు సంభవించాయి, అయితే ప్రాథమిక నివేదికల ప్రకారం ఎవరికీ గాయాలు కాలేదు. ఈ దాడి కూడా ఇరాన్ మద్దతుగల గ్రూపులే చేశాయని సైనిక అధికారులు భావిస్తున్నారు. ఈ దాడి ఇరాక్‌లో మోహరించిన నాటో దళాలకు హెచ్చరిక సంకేతాలను లేవనెత్తింది.

టర్కీలోని ఇన్‌సిర్లిక్ వైమానిక స్థావరంపైకి మిస్సైల్స్:

మూడవ దాడి టర్కీలోని ప్రఖ్యాత ఇన్‌సిర్లిక్ వైమానిక స్థావరాన్ని లక్ష్యంగా చేసుకుంది. ఇది నాటోకు వ్యూహాత్మకంగా ముఖ్యమైనదిగా పరిగణించబడుతుంది. అమెరికా, మిత్రరాజ్యాల దేశాలకు ఇది ఆతిథ్యం ఇస్తుంది. నివేదికల ప్రకారం, ఇరాన్ ప్రయోగించిన క్షిపణిని నాటో వైమానిక రక్షణ దళాలు గాల్లోనే అడ్డుకున్నాయి, దీనివల్ల పెద్ద నష్టం తప్పింది. అయితే, ఈ సంఘటన ఈ ప్రాంతం అంతటా భద్రతా హెచ్చరికలను జారీ చేసింది. ఇంతలో, యుద్ధ సమయంలో అమెరికా సైనిక విమానాలకు సంబంధించిన సంఘటనలు కూడా బయటపడ్డాయి. పశ్చిమ ఇరాక్‌లో యుఎస్ మిలిటరీ బోయింగ్ కెసి-135 స్ట్రాటోట్యాంకర్ విమానం కూలిపోయినట్లు నిర్ధారించబడింది. యుఎస్ సెంట్రల్ కమాండ్ ప్రకారం, విమానంలో ఉన్న ఆరుగురిలో నలుగురు మరణించగా, మరో ఇద్దరి కోసం అన్వేషణ కొనసాగుతోంది. ఇరాక్‌లో పనిచేస్తున్న ఇరాన్ మద్దతుగల గ్రూపులు అమెరికా విమానాన్ని కూల్చివేసినట్లు పేర్కొన్నప్పటికీ, ఈ ప్రమాదం శత్రువు కాల్పుల ఫలితంగా జరగలేదని అమెరికా స్పష్టం చేసింది.