Cathy Gebe : జర్మనీ పార్లమెంట్ (బుండెస్టాగ్) లో మహిళల హక్కులు, వారిపై జరుగుతున్న హింసపై సుదీర్ఘ చర్చ జరుగుతోంది. ఈ క్రమంలో వామపక్ష పార్టీ ‘డై లింకే’కి చెందిన 29 ఏళ్ల యువ మహిళా ఎంపీ కేథీ గేబెల్ (Cathy Gebe) వేదికపై ప్రసంగిస్తూ.. ప్రతిపక్షాలు తీసుకొచ్చిన కొన్ని ప్రతిపాదనలను తీవ్రంగా విమర్శిస్తున్నారు. అయితే ఆమె మాట్లాడుతుండగా మధ్యలో జోక్యం చేసుకున్న ‘ఆల్టర్నేటివ్ ఫర్ జర్మనీ’ (AfD) పార్టీకి చెందిన పురుష ఎంపీ మార్టిన్ రైఖార్ట్ ఒక వివాదాస్పద వ్యాఖ్యతో ఆమెను అడ్డుకోవడానికి ప్రయత్నించారు.
ఆ ఒక్క మాటతో పార్లమెంట్ షాక్ అయ్యింది..
మార్టిన్ రైఖార్ట్ చేసిన వ్యాఖ్యలకు ఏమాత్రం తడుముకోకుండా కేథీ గేబెల్ ఇచ్చిన కౌంటర్ దెబ్బకు సభ ఒక్కసారిగా షాక్కు గురైంది. ఆమె మార్టిన్ వైపు చూస్తూ.. “స్త్రీ జననేంద్రియ భాగాన వేల సంఖ్యలో నరాల చివరలు ఉంటాయి.. కానీ మీరు అంతకంటే ఎక్కువ సున్నితంగా ఉన్నట్లున్నారు” అంటూ తీవ్రమైన వ్యంగ్యాస్త్రాన్ని ఆయనపై సంధించారు. ఆమె ఆ మాట అనగానే పార్లమెంట్లో ఉన్న పలువురు ఎంపీలు ఒక్కసారిగా నవ్వేశారు. అప్పటివరకు నోరు పారేసుకున్న ఎంపీ మార్టిన్ కొన్ని నిమిషాల పాటు తీవ్ర అసహనానికి, ఇబ్బందికి గురై మౌనంగా ఉండిపోయారు. అనంతరం గేబెల్ తన ప్రసంగాన్ని యథావిధిగా కొనసాగించారు.
నెట్టింట వైరల్ అయిన వీడియో..
నిజానికి ఈ ఘటన కొద్ది నెలల క్రితం మార్చిలో జరిగినప్పటికీ.. ఇటీవల కేథీ గేబెల్ ఈ వీడియో క్లిప్ను తన ఇన్స్టాగ్రామ్ ఖాతాలో మళ్లీ షేర్ చేయడంతో ఇది కాస్తా ఇప్పుడు సోషల్ మీడియాలో విపరీతంగా వైరల్ అవుతుంది. గేబెల్ సమయస్ఫూర్తిని, జవాబుదనాన్ని వేలాది మంది నెటిజన్లు ప్రశంసిస్తుండగా.. పార్లమెంట్ వంటి గౌరవప్రదమైన సభలో ఇలాంటి పదజాలం వాడటం సమంజసమేనా అని కొందరు ప్రశ్నిస్తున్నారు. ఈ వీడియో వైరల్ అయిన తర్వాత కేథీ గేబెల్ మరో వీడియోను విడుదల చేస్తూ ఒక ఆసక్తికరమైన విషయాన్ని పంచుకున్నారు. తను ప్రసంగంలో చెప్పిన సైంటిఫిక్ ఫ్యాక్ట్లో ఒక చిన్న తప్పు దొర్లిందని.. మెడికల్ రీసెర్చ్ ప్రకారం క్లిటోరిస్లో నరాల చివరల సంఖ్య 10 వేలకు పైగా ఉంటుందని, తను పొరపాటున వేరే అంకె చెప్పానని స్పష్టం చేస్తూ దానికి సంబంధించిన సైంటిఫిక్ లింకులను షేర్ చేశారు. అయితే, మహిళల హక్కుల విషయంలో రాజీపడేది లేదని, ఎవరైనా తప్పుడు ప్రతిపాదనలు చేస్తే విమర్శలు ఎదుర్కోవడానికి సిద్ధంగా ఉండాలని ఆమె తేల్చి చెప్పారు.
స్థానిక మహిళల గొంతుకగా కేథీ గేబెల్..
సైకాలజీ చదివిన కేథీ గేబెల్ జర్మనీలో మహిళా హక్కుల కోసం పోరాడే బలమైన గొంతుకగా గుర్తింపు తెచ్చుకున్నారు. తన పార్టీ తరపున మహిళా విధానాల ప్రతినిధిగా వ్యవహరిస్తూ.. లింగ సమానత్వం, మహిళల రక్షణ, లైంగిక హింస వంటి అంశాలపై ఆమె నిరంతరం గళం విప్పుతున్నారు. లైంగిక వేధింపుల కేసుల్లో బాధితులనే తప్పుబట్టే మనస్తత్వంపై గతంలో ఆమె పార్లమెంట్లో మాట్లాడిన వీడియోలు అంతర్జాతీయంగా పెద్ద సంచలనం సృష్టించాయి.