150 Words on One Sticky Note: ఒకే స్టిక్కీ నోట్‌పై 150 పదాలు.. భారత సంతతి క్లౌడ్ ఇంజనీర్ గిన్నిస్ వరల్డ్ రికార్డు!

From Sticky Note to Guinness Record: సాధారణంగా స్టిక్కీ నోట్స్‌ను చిన్న రిమైండర్లు, షాపింగ్ లిస్టులు లేదా సందేశాలు రాసుకోవడానికి ఉపయోగిస్తుంటాం. అయితే యునైటెడ్ అరబ్ ఎమిరేట్స్ (UAE)లో నివసిస్తున్న భారత సంతతికి చెందిన 29 ఏళ్ల సీనియర్ క్లౌడ్ ఇంజనీర్ పుష్పజ్యోతి రవికుమార్ మాత్రం స్టిక్కీ నోట్‌తో ఏకంగా గిన్నిస్ వరల్డ్ రికార్డు సృష్టించారు. ఒకే స్టిక్కీ నోట్‌పై 150 విభిన్న పదాలను స్పష్టంగా, చక్కటి చేతిరాతతో రాసి ఆమె ఈ అరుదైన రికార్డును సాధించారు. ఆమె ప్రత్యేకమైన చేతిరాత నైపుణ్యానికి గుర్తింపుగా గిన్నిస్ వరల్డ్ రికార్డ్స్ లో ఆమె పేరు నమోదైంది.

చిన్న నోట్‌పై 150 పదాలు

పరిమిత స్థలంలో 150 పదాలను రాయడం అంత సులభమైన విషయం కాదు. ప్రతి పదం స్పష్టంగా కనిపించేలా, ఒకదానితో మరొకటి కలిసిపోకుండా రాయాల్సి ఉంటుంది. ఇందుకోసం పుష్పజ్యోతి ప్రత్యేకమైన వ్యూహాన్ని అనుసరించారు. చిన్న పరిమాణంలో ఉండే, ప్రధానంగా మూడు అక్షరాల పదాలను ఎంచుకుని వాటిని స్టిక్కీ నోట్‌పై జాగ్రత్తగా అమర్చారు. దీంతో తక్కువ స్థలంలో ఎక్కువ పదాలను రాయడంతో పాటు, ప్రతి పదాన్ని సులభంగా చదివేలా చేయగలిగారు.

చిన్నప్పటి కల నెరవేరింది

దుబాయ్‌లో నివసిస్తున్న పుష్పజ్యోతి రవికుమార్‌కు చిన్నప్పటి నుంచే గిన్నిస్ వరల్డ్ రికార్డ్స్ పై ఎంతో ఆసక్తి ఉండేదట. ప్రపంచవ్యాప్తంగా వ్యక్తులు వివిధ రంగాల్లో రికార్డులు సాధించడం చూసి తాను కూడా ఒకరోజు ఈ ప్రపంచ వేదికపై తన పేరు నమోదు చేసుకోవాలని కలలు కనేవారని ఆమె తెలిపారు. తనకు ఉన్న చేతిరాత నైపుణ్యాన్ని ఉపయోగించి గిన్నిస్ రికార్డు సాధించాలని నిర్ణయించుకున్న పుష్పజ్యోతి.. అందుకోసం ప్రత్యేకంగా సాధన చేశారు.

తొలి ప్రయత్నంలోనే రికార్డు

అత్యంత ఆసక్తికరమైన విషయం ఏమిటంటే, తొలి ప్రయత్నంలోనే పుష్పజ్యోతి ఈ రికార్డును సాధించారు. పరిమిత స్థలంలో 150 పదాలను స్పష్టంగా రాయడం ద్వారా తన నైపుణ్యాన్ని నిరూపించుకున్నారు. ఆమెకు విభిన్న రకాల చేతిరాత స్టైల్స్ తో ప్రయోగాలు చేయడం కూడా ఇష్టమని తెలుస్తోంది. ఈ రికార్డు ప్రయత్నం ద్వారా తన ప్రతిభను ప్రపంచానికి చూపించే అవకాశం లభించిందని ఆమె పేర్కొన్నారు.

ఆత్మవిశ్వాసం పెరిగింది

గిన్నిస్ వరల్డ్ రికార్డ్ సాధించడం తనలో మరింత ఆత్మవిశ్వాసాన్ని పెంచిందని పుష్పజ్యోతి తెలిపారు. తన ప్రతిభకు అంతర్జాతీయ స్థాయిలో గుర్తింపు లభించడం గర్వంగా ఉందని చెప్పారు. క్లౌడ్ ఇంజనీర్‌గా పనిచేస్తూనే తన ప్రత్యేకమైన చేతిరాత నైపుణ్యంతో ప్రపంచ రికార్డు సాధించడం ద్వారా పుష్పజ్యోతి రవికుమార్ టెక్నాలజీతో పాటు సృజనాత్మకత, పట్టుదల ఉంటే ప్రత్యేకమైన విజయాలను సాధించవచ్చని నిరూపించారు. ఒక చిన్న స్టిక్కీ నోట్‌తో ప్రారంభమైన ప్రయత్నం.. ఇప్పుడు గిన్నిస్ వరల్డ్ రికార్డ్స్‌లో ఒక ప్రత్యేకమైన గుర్తింపుగా మారింది.