Flydubai: పైలట్ స్మిత్ మచ్చర్ ఆరోగ్యంపై భారత ఎంబసీ కీలక ప్రకటన

ఫ్లైదుబాయ్ విమానంలో కో-పైలట్ చేతిలో గాయపడ్డ భారత పైలట్ స్మిత్ మచ్చర్ ఆరోగ్యంపై యూఏఈలోని భారత రాయబార కార్యాలయం స్పందించింది. పైలట్ స్మిత్ మచ్చర్ ప్రస్తుతం ఆరోగ్యంగా ఉన్నారని, వేగంగా కోలుకుంటున్నారని భారత రాయబారి దీపక్ మిత్తల్ తెలిపారు. యూఏఈలోని ఓ ఆసుపత్రిలో చికిత్స పొందుతున్న మచ్చర్‌ను దీపక్ మిత్తల్.. ఆయన కుటుంబ సభ్యులతో కలిసి పరామర్శించారు. ఈ విషయాన్ని భారత రాయబార కార్యాలయం సోషల్ మీడియా ద్వారా వెల్లడించింది.

“కెప్టెన్ మచ్చర్ ఆరోగ్యంగా ఉన్నారు. బాగా కోలుకుంటున్నారు. కొనసాగుతున్న వైద్య చికిత్స, ఆరోగ్య పరిస్థితిని పర్యవేక్షించేందుకు స్థానిక అధికారులతో సమన్వయం కొనసాగిస్తున్నాం.’’ అని వెల్లడించింది. ఘటన జరిగిన అనంతరం మచ్చర్‌ను తొలుత వాయవ్య సౌదీ అరేబియాలోని టబుక్‌లో ఆసుపత్రిలో చేర్చారు. అనంతరం ఒక రోజు తర్వాత మెరుగైన వైద్య చికిత్స కోసం ఆయనను యూఏఈకి తరలించారు.

కో-పైలట్‌తో జరిగిన ఘర్షణలో మచ్చర్ తీవ్రంగా గాయపడ్డారు. అయినప్పటికీ ఆయన విమానాన్ని నియంత్రించేందుకు, పరిస్థితిని అదుపులోకి తీసుకునేందుకు ప్రయత్నించినట్లు నివేదికలు పేర్కొంటున్నాయి. బుధవారం రాత్రి రియాద్‌లోని భారత రాయబార కార్యాలయం మచ్చర్ టబుక్‌లోని ఆసుపత్రిలో చికిత్స పొందుతున్నారని వెల్లడించింది. అప్పటికి ఆయన పరిస్థితి స్థిరంగా ఉందని తెలిపింది. తాజాగా యూఏఈలో భారత రాయబారి మిత్తల్ ఆయనను పరామర్శించిన అనంతరం.. మచ్చర్ ఆరోగ్యంగా ఉన్నారని, కోలుకుంటున్నారని రాయబార కార్యాలయం వెల్లడించింది.

ఇజ్రాయెల్ అధికారులు తెలిపిన వివరాల ప్రకారం.. కో-పైలట్ ఒమన్ జాతీయుడిగా గుర్తించారు. ఈ ఘటన అనంతరం విమానం అత్యంత వేగంగా కిందికి దిగింది. 30 సెకన్లలోపే దాదాపు 14,000 అడుగుల ఎత్తు కోల్పోయినట్లు నివేదికలు పేర్కొన్నాయి. అయితే మచ్చర్ తీవ్రంగా గాయపడినప్పటికీ కాక్‌పిట్ తలుపు తెరిచి పరిస్థితిని అదుపులోకి తీసుకున్నట్లు సమాచారం. ఇజ్రాయెల్ ప్రధాని బెంజమిన్ నెతన్యాహు ప్రతినిధి డోరన్ స్పీల్‌మన్ పేర్కొన్న వివరాలను ఉటంకిస్తూ ది టైమ్స్ ఆఫ్ ఇజ్రాయెల్ కథనం ప్రచురించింది. మచ్చర్ రక్తసిక్త స్థితిలో ఉన్నప్పటికీ తన దగ్గర మిగిలిన శక్తినంతా ఉపయోగించి కాక్‌పిట్ తలుపు తెరిచినట్లు అందులో పేర్కొన్నారు.

కాక్‌పిట్‌లో జరిగిన ఘటనను అదుపులోకి తీసుకున్న అనంతరం విమానాన్ని టబుక్‌కు మళ్లించారు. అక్కడ అత్యవసర ల్యాండింగ్ చేశారు. అనంతరం విమానంలోని ప్రయాణికులు సురక్షితంగా ఇజ్రాయెల్ చేరుకున్నారు. ఈ ఘటనపై సంబంధిత అధికారులు దర్యాప్తు కొనసాగిస్తున్నారు. కో-పైలట్ విమానాన్ని ప్రమాదానికి గురిచేయాలనే ఉద్దేశంతోనే దాడి చేశాడా? ఘటనకు కారణం ఏమిటి? అనే అంశాలపై దర్యాప్తులో స్పష్టత రావాల్సి ఉంది.