China: ‘హై పవర్ మైక్రోవేవ్’ వెపన్ తయారు చేసిన చైనా.. దీని వల్ల ప్రమాదం ఏంటంటే.?

China: చైనా మరో కొత్త రకం ఆయుధాన్ని తయారు చేసినట్లు తెలుస్తోంది. ‘‘హైపవర్ మైక్రోవేవ్ సిస్టమ్’’ అనే ఆయుధాన్ని అభివృద్ధి చేసింది. దీని ద్వారా అంతరిక్షంలోని శాటిలైట్లను దెబ్బ తీయవచ్చు. ముఖ్యంగా స్పేస్ఎక్స్ స్టార్ లింక్ వంటి శాటిలైట్ నెట్వర్క్‌కు అంతరాయం కలిగించవచ్చు. చైనా నిపుణులు చెబుతున్న దాని ప్రకారం.. ఒక గిగావాట్ (1 GW) కంటే ఎక్కువ శక్తి కలిగిన గ్రౌండ్-బేస్డ్ మైక్రోవేవ్ ఆయుధం భూమి దిగువ కక్ష్యలో పనిచేసే స్టార్‌లింక్ ఉపగ్రహాలను దెబ్బతీసేంత సామర్థ్యాన్ని కలిగి ఉంటుందని సౌత్ చైనా మార్నింగ్ పోస్ట్ నివేదించింది.

Read Also: Charlapalli Case Solved: వీడిన చర్లపల్లి తల్లీపిల్లల సూసైడ్ మిస్టరీ.. ఆ మరణశాసనం వెనుక కారణం ఇదే.!

షాంగ్జీ ప్రావిన్స్‌లోని జియాన్‌లోని నార్త్‌వెస్ట్ ఇన్‌స్టిట్యూట్ ఆఫ్ న్యూక్లియర్ టెక్నాలజీలో వాంగ్ గ్యాంగ్ నేతృత్వంలోని పరిశోధకులు TPG1000Cs అని పిలిచే హైపవర్ మైక్రోవేవ్ వ్యవస్థను తయారు చేశారు. సాధారణ మైక్రోవేవ్ వ్యవస్థలు చాలా కొద్ది సెకన్లు మాత్రమే పనిచేస్తాయి, కానీ చైనా తయారీ వ్యవస్థ ఒక నిమిషం పాటు నిరంతరంగా 20 గిగావాట్ల శక్తిని విడుదల చేయగలదు. దీంతో పాటు ఇది చిన్న పరిమాణం అంటే 4 మీటర్ల పొడవు, 5 టన్నుల బరువు ఉంటుంది. దీనిని ట్రక్కులు, నౌకలు, విమానాలు, అంతరిక్షంలో కూడా ఏర్పాటు చేసేలా చిన్నగా తయారు చేశారు.

3000 హై ఎనర్జీ మైక్రోవేవ్ పల్స్‌లు ఒక్కో సెషన్‌లో విడుదల చేస్తుందని, ఇది ఇప్పటికే 2 లక్షల టెస్ట్ పల్స్‌ను విడుదల చేసినట్లు పరిశోధకులు చెబుతున్నారు. లో-ఎర్త్ ఆర్బిట్‌లో (LEO) తిరిగే శాటిలైట్లను, ఈ ఆయుధం నుంచి వచ్చే శక్తివంతమైన మైక్రోవేవ్‌లు వాటి ఎలక్ట్రానిక్ వ్యవస్థల్ని దెబ్బతీసే అవకాశం ఉందని చైనా పరిశోధకులు చెబుతున్నారు. దీని ప్రధాన లక్ష్యం శాటిలైట్లు, డ్రోన్లు, కమ్యూనికేషన్ వ్యవస్థల్ని దెబ్బతీయవచ్చు.