Badangpet Warehouse Blast: హైదరాబాద్ శివార్లలోని మీర్పేట్ పోలీస్ స్టేషన్ పరిధిలో ఘోర ప్రమాదం జరిగింది. బడంగ్పేట్లోని ఒక డెకరేషన్ గోదాంలో అకస్మాత్తుగా కెమికల్ బాక్స్ పేలడంతో ఓ కార్మికుడు అక్కడికక్కడే దుర్మరణం పాలయ్యాడు. ఈ పేలుడు తీవ్రత ఎంత బలంగా ఉందంటే, సదరు కార్మికుడి శరీర భాగాలు ఘటనా స్థలంలో చెల్లాచెదురుగా పడిపోయాయి. ఈ ఘోర ఘటన స్థానికంగా తీవ్ర భయాందోళనలు రేకెత్తించింది.
అక్కడికక్కడే మృతి చెందిన అనూప్ ప్రధాన్
ఈ ప్రమాదంలో మృతి చెందిన కార్మికుడిని యూపీ (ఉత్తరప్రదేశ్) కి చెందిన అనూప్ ప్రధాన్ (35) గా పోలీసులు గుర్తించారు. బతుకుదెరువు కోసం ఇటీవలనే కోల్కతా నుండి ఇక్కడికి వచ్చిన అనూప్, బడంగ్పేట్లోని డెకరేషన్ గోదాంలో పనిలో చేరాడు. శనివారం గోదాంలో పని చేసుకుంటున్న సమయంలో అక్కడ ఉన్న ఒక కెమికల్ బాక్స్ ఒక్కసారిగా పేలిపోయింది. ఈ ప్రమాదంలో తీవ్ర గాయాలైన అనూప్ క్షణాల్లోనే ప్రాణాలు కోల్పోయాడు.
రంగంలోకి క్లూస్ టీమ్.. పోలీసుల విచారణ
ప్రమాదంపై సమాచారం అందుకున్న వెంటనే మీర్పేట్ పోలీసులు ఘటనా స్థలానికి చేరుకున్నారు. ప్రమాదం జరిగిన తీరును పరిశీలించి, కేసు నమోదు చేసుకున్నారు. పేలుడుకు గల కారణాలను శాస్త్రీయంగా విశ్లేషించేందుకు క్లూస్ టీమ్ను రంగంలోకి దించారు. క్లూస్ టీమ్ సభ్యులు ఘటనా స్థలం నుండి కీలక ఆధారాలను సేకరించారు. అసలు ఆ గోదాంలో ఎలాంటి రసాయనాలు నిల్వ చేశారు? నిబంధనలకు విరుద్ధంగా కెమికల్స్ ఉంచారా? అనే కోణంలో పోలీసులు లోతైన విచారణ జరుపుతున్నారు.