Loans : ఇప్పటివరకు బ్యాంకు లోన్ అంటే ఇంట్లో పురుషుడే ముందుండే వ్యవహారం అన్న భావన భారతీయ సమాజంలో బలంగా ఉండేది. ఇంటి ఆర్థిక బాధ్యతలు, ఆదాయం, అప్పులు, పెట్టుబడులు అన్నీ ఎక్కువగా మగవాళ్ల చేతుల్లోనే ఉండేవి. కానీ ఇప్పుడు బ్యాంకులు, ఫిన్టెక్ కంపెనీలు నిశ్శబ్దంగా ఒక పెద్ద మార్పును గమనిస్తున్నాయి. లోన్లు తీసుకునే విషయంలోనే కాదు, వాటిని తిరిగి చెల్లించే విషయంలో కూడా మహిళలు మరింత క్రమశిక్షణతో వ్యవహరిస్తున్నారని డేటా చెబుతోంది. ఇదే ఇప్పుడు దేశంలోని రుణ రంగంలో కొత్త చర్చకు దారితీస్తోంది.
బ్యాంక్బజార్ సీఈఓ ఆదిల్ శెట్టి వెల్లడించిన వివరాలు ఈ మార్పును స్పష్టంగా చూపిస్తున్నాయి. ఆర్థిక లక్ష్యాలను చేరుకునే సామర్థ్యాన్ని కొలిచే బ్యాంక్బజార్ అటైన్మెంట్ ఇండెక్స్లో మహిళలు 84.3 స్కోర్ సాధించగా, పురుషులు 82.1 వద్ద నిలిచారు. సంఖ్యల పరంగా ఇది చిన్న తేడాలా కనిపించినా, బ్యాంకుల దృష్టిలో ఇది చాలా కీలకం. ఎందుకంటే రుణాల వ్యాపారంలో నమ్మకమే పెద్ద ఆస్తి. ఒకరు అప్పు తీసుకుని సమయానికి చెల్లిస్తారా లేదా అన్న అంచనా బ్యాంకులకు అత్యంత ముఖ్యం.
లోన్ ఈఎంఐలు మిస్ చేసే విషయంలో కూడా మహిళలు మెరుగైన ట్రాక్ రికార్డ్ చూపిస్తున్నారు. బ్యాంక్బజార్ డేటా ప్రకారం మహిళల్లో కేవలం 10.98 శాతం మంది మాత్రమే లోన్ చెల్లింపులు మిస్ చేసినట్టు వెల్లడైంది. అదే పురుషుల విషయంలో ఈ సంఖ్య 14.29 శాతంగా ఉంది. వరుసగా పలుమార్లు చెల్లింపులు మిస్ చేసే వారి శాతం మహిళల్లో 3.25 మాత్రమే ఉండగా, పురుషుల్లో అది 7.14 శాతానికి చేరింది. అంటే అప్పు తీసుకోవడమే కాదు, దాన్ని బాధ్యతగా తీర్చడంలో కూడా మహిళలు ఎక్కువ శ్రద్ధ చూపిస్తున్నారనే అభిప్రాయం బ్యాంకుల్లో బలపడుతోంది.
ఈ ధోరణికి మరో ప్రధాన కారణం మహిళలు అప్పు తీసుకునే ఉద్దేశ్యమేనని నిపుణులు చెబుతున్నారు. పురుషులతో పోలిస్తే మహిళలు ఎక్కువగా అత్యవసర అవసరాల కోసం, కుటుంబ భద్రత కోసం, విద్య లేదా వైద్య అవసరాల కోసం లోన్లు తీసుకుంటారని బ్యాంక్బజార్ డేటా చెబుతోంది. మహిళల్లో 29.27 శాతం మంది అత్యవసర పరిస్థితుల కోసం రుణాలు తీసుకుంటే, పురుషుల్లో ఈ సంఖ్య 25.43 శాతంగా ఉంది. మరోవైపు పురుషులు కొంతవరకు ఖర్చు ప్రాధాన్యపు అవసరాల కోసం కూడా క్రెడిట్ ఉపయోగిస్తున్నారని విశ్లేషణలు సూచిస్తున్నాయి.
రూపీ112 సంస్థ కూడా మహిళా రుణగ్రహీతల గురించి ఆసక్తికర విషయాలను వెల్లడించింది. మహిళలు సాధారణంగా అప్పు తీసుకునే ముందు ఎక్కువ ప్రణాళికతో వ్యవహరిస్తారని, రిస్క్ తీసుకునే విషయంలో జాగ్రత్తగా ఉంటారని సంస్థ చెబుతోంది. ముఖ్యంగా అప్పును త్వరగా ముగించాలనే ఆసక్తి మహిళల్లో ఎక్కువగా కనిపిస్తోందని వెల్లడించింది. బ్యాంక్బజార్ గణాంకాల ప్రకారం మహిళల్లో 18.29 శాతం మంది ముందుగానే లోన్ క్లోజ్ చేయాలని ప్రయత్నిస్తుంటే, పురుషుల్లో అది 17.43 శాతంగా ఉంది. చిన్న మొత్తాలైనా ముందుగా చెల్లించడం ద్వారా వడ్డీ భారం తగ్గించుకోవాలనే ఆలోచన మహిళల్లో ఎక్కువగా కనిపిస్తోందని నిపుణులు చెబుతున్నారు.
లెండింగ్ప్లేట్ సీఈఓ కౌశిక్ చటర్జీ కూడా ఇదే విషయాన్ని ప్రస్తావించారు. గత నాలుగేళ్లుగా లక్షలాది రుణ ఖాతాల డేటాను పరిశీలించిన తర్వాత మహిళలు తమ ఆర్థిక బాధ్యతల పట్ల ఎక్కువ నిబద్ధత చూపుతున్నారని ఆయన పేర్కొన్నారు. అయితే రుణ చెల్లింపు ప్రక్రియ కేవలం జెండర్ తో మాత్రమే కొలవలేమని కూడా స్పష్టం చేశారు. ఆదాయం స్థిరత్వం, క్రెడిట్ హిస్టరీ, ఆర్థిక క్రమశిక్షణ, అప్పు తీసుకునే ఉద్దేశ్యం వంటి అంశాలన్నీ కలిసి ప్రభావం చూపుతాయని చెప్పారు.
ఇప్పుడు ఈ మార్పును బ్యాంకులు కూడా తమ వ్యూహాల్లో భాగంగా ముందుకు తీసుకెళ్తున్నాయి. ఒకే రకమైన రుణాలకు బదులు, మహిళల అవసరాలకు సరిపోయే ఫ్లెక్సిబుల్ రీపేమెంట్ ఆప్షన్లు, చిన్న మొత్తాల రుణాలను ప్రవేశపెడుతున్నాయి. ఎకనామి డేటా ఆధారంగా మహిళలకు కొంత ఎక్కువ అర్హత కల్పిస్తున్న సంస్థలు కూడా పెరుగుతున్నాయి.
అయితే దీని అర్థం మహిళలని చూసి లోన్లు ఇస్తున్నారనేది కాదు. బ్యాంకులు ఇప్పటికీ ఆదాయం, ఉద్యోగ స్థిరత్వం, క్రెడిట్ స్కోర్, చెల్లింపు సామర్థ్యం అన్నింటినీ పరిశీలిస్తూనే ఉన్నాయి. కానీ వరుసగా వస్తున్న డేటా మహిళలు తక్కువ డిఫాల్ట్ రిస్క్ కలిగిన రుణగ్రహీతలుగా నిలుస్తున్నారని సూచిస్తుండటంతో, రుణాలను మహిళలకు ఇచ్చేందుకు బ్యాంకింగ్ సంస్థలు ఆసక్తి చూపిస్తున్నాయి.
ఇక్కడ అసలు పెద్ద కథ మహిళలు పురుషుల కంటే మెరుగైనవారా అన్నది కాదు. భారత క్రెడిట్ ఆర్థిక వ్యవస్థలో మహిళలు ఇప్పుడు మరింత ఆత్మవిశ్వాసంతో, స్వతంత్రంగా, చురుకుగా ముందుకు వస్తుండటం. ఒకప్పుడు బ్యాంకు లోన్ అనే మాటకు భయపడిన మహిళలు ఇప్పుడు తమ ఆర్థిక భవిష్యత్తును తామే నిర్మించుకునే దిశగా అడుగులు వేస్తున్నారు. బ్యాంకులు కూడా ఆ మార్పును గమని స్తూ తమ లెక్కలను మెల్లగా మార్చుకుంటున్నాయి.