US Pharma Tariff: అమెరికా తమ దేశంలోకి దిగుమతి అయ్యే కొన్ని రకాల ప్రాణాంతక వ్యాధుల మందులు, వాటి తయారీలో వాడే కీలక పదార్థాలపై ఎలాంటి అదనపు రవాణా పన్నులు (యాడ్ వాలొరెమ్ టారిఫ్లు) వేయకూడదని కీలక నిర్ణయం తీసుకుంది. భారత్తో సహా 20 దేశాలకు ఈ రాయితీ ఇస్తున్నట్లు అమెరికా వాణిజ్య శాఖ అధికారికంగా ఒక నోటీసు విడుదల చేసింది. సెప్టెంబర్ 29 నుంచి పేటెంట్ పొందిన కొన్ని రకాల మందుల దిగుమతులపై ఏకంగా 100 శాతం పన్ను విధించేందుకు వాషింగ్టన్ సిద్ధమవుతున్న సమయంలో ఈ నిర్ణయం రావడం విశేషం.
అసలు ఈ జీరో పర్సెంట్ టారిఫ్ దేనిదేనికి వర్తిస్తుందంటే..?
తీవ్రమైన జబ్బులకు వాడే మందులు, సంతానలేమి చికిత్సలు, సెల్ థెరపీ, జీన్ థెరపీ, యాంటీబాడీ-డ్రగ్ కాంజుగేట్స్, అలాగే జంతువులకు వాడే మందులతో పాటు వీటి తయారీకి ఉపయోగించే కీలక కాంపొనెంట్లకు కూడా పన్నుల నుంచి పూర్తిగా మినహాయింపు లభించింది. ఇక్కడ ‘యాడ్ వాలొరెమ్’ పన్ను అంటే ఒక వస్తువు ధర ఆధారంగా నిర్ణయించే ఒక నిర్దిష్ట శాతం. అమెరికాతో ఇప్పటికే వర్తక, భద్రతా ఒప్పందాలు ఉన్న లేదా భవిష్యత్తులో చేసుకోబోయే దేశాలకే ఈ పన్ను మినహాయింపు ప్రయోజనం లభిస్తుందని అధికారులు స్పష్టం చేశారు. ఈ జాబితాలో భారతదేశంతో పాటు అర్జెంటీనా, బంగ్లాదేశ్, కంబోడియా, ఈక్వెడార్, ఎల్ సాల్వడార్, యూరోపియన్ యూనియన్, గౌతమాలా, ఇండోనేషియా, జపాన్, జోర్డాన్, మలేషియా, నార్త్ మాసిడోనియా, దక్షిణ కొరియా, స్విట్జర్లాండ్, లీచ్టెన్స్టెయిన్, తైవాన్, థాయ్లాండ్, బ్రిటన్, వియత్నాంలు ఉన్నాయి.
దీని వెనుక అసలు కథేంటంటే..?
తమ దేశీయ పరిశ్రమలను ప్రోత్సహించే లక్ష్యంతో అమెరికా మాజీ అధ్యక్షుడు డొనాల్డ్ ట్రంప్ ఏప్రిల్ 2న ఒక కీలక ఆదేశం ఇచ్చారు. ట్రేడ్ ఎక్స్పాన్షన్ యాక్ట్లోని సెక్షన్ 232 కింద పేటెంట్ పొందిన ఫార్మా ఉత్పత్తులపై 100 శాతం పన్ను విధించాలని నిర్ణయించారు. ఈ పన్ను జూలై 31 నుంచే కొన్ని కంపెనీలకు అమల్లోకి రాగా, మిగిలిన సంబంధిత కంపెనీలన్నింటికీ సెప్టెంబర్ 29 నుంచి వర్తించనుంది. అయితే సాధారణంగా అందరూ వాడే జెనెరిక్ మందులకు మాత్రం ఈ 100 శాతం టారిఫ్ బాదుడు నుంచి ఊరట లభించింది. జెనెరిక్ ఫార్మా ఉత్పత్తులకు ఈ పన్నులు వర్తించవని వాణిజ్య శాఖ స్పష్టం చేసింది. అంతేకాకుండా పేటెంట్ లేని జంతువుల ఆరోగ్య ఉత్పత్తులను కూడా ఈ మినహాయింపు పరిధిలోకి తెస్తూ కొన్ని సాంకేతిక మార్పులు చేసింది. ఈ నిబంధనల కింద ఫార్మా ఉత్పత్తులు అంటే కేవలం సిద్ధంగా ఉన్న మందులే కాకుండా, వాటి తయారీకి వాడే యాక్టివ్ ఫార్మాస్యూటికల్ ఇంగ్రీడియంట్స్ (API), ప్రాథమిక ముడి పదార్థాలు మాత్రమే వస్తాయని అమెరికా స్పష్టతనిచ్చింది.